Inte sha kwa Yehova mu fyalo ukucila pali 200 balabomba umulimo uwacindama sana uwakwafwa abantu. Lelo Inte sha kwa Yehova ababa mu fyalo fye nalimo 35 e bakumanisha ukusangwilako indalama isho bakabila pa kubomba uyu umulimo mu fyalo fyabo. Inga ifi ifyalo fimbi ifishikumanisha indalama shikabilwa fifumya kwi indalama fibomfya pa kubomba uyu mulimo?

 Ibumba Litungulula lyalibika sana amano ku fyo Inte sha kwa Yehova mwi sonde lyonse bakabila pa kuti balepepa Yehova no kubomba umulimo wa kubila imbila nsuma. Balapekanya ifya kubomfya indalama kabili balashibomfya ukulingana ne fyo bapekenye. Nga ca kuti iofeshi lya musambo lyapokelela imisangulo iingi ukucila pa sho lilekabila ukubomfya mu calo cabo, lilatuma ishipulilepo ku fyalo ifishikumanishe indalama filekabila. Ifi bacita e fyo na Bena Kristu ba mu nshiku sha batumwa balecita, baleafwana ‘pa kuti kube ukulingana.’ (2 Abena Korinti 8:14) Balepeela ifyalepula pa fyo bakwete ku Bena Kristu banabo abakwete ifinono.

 Bushe bamunyinefwe abapokelela indalama ukufuma ku maofeshi ya musambo yambi bomfwa shani? Ku ca kumwenako, mu Tanzania abantu abengi bapiina sana ica kuti indalama bakwata isha kushitamo ifyo bakabila cila bushiku tashifika na kuli K41. E ico indalama isho babomfeshe ku kuwamya Ing’anda ya Bufumu iyo icilonganino ca Mafinga cibomfya, shafumine ku misambo imbi. Aba muli ici cilonganino balembele ukuti: “Ukufuma apo twawamishe Ing’anda ya Bufumu, impendwa ya basangwa ku kulongana yalikulilako! Tulatasha nga nshi pa fyo icilonganino ca kwa Yehova na ba bwananyina baba na bukapekape pantu balilenga twakwata icifulo icisuma sana ica kupepelapo.”

 Bamunyinefwe na bankashi bamo mu Sri Lanka tabalekwata ifya kulya pa mulandu wa cikuko ca Korona. Nkashi Imara Fernando no mwana wakwe umwaume, Enosh, bali pa bashalekwata ifya kulya. Lelo balabapeele ifya kulya ifyo bashitile ukubomfya indalama isho bamunyinefwe na bankashi aba mu fyalo fimbi basangwile. Balembele muli kardi bapangile ukuti: “Tuletasha nga nshi bamunyinefwe na bankashi pa fyo balanga ukuti balitutemwa muli ino inshita iya-afya. Twaliba ne nsansa icine cine pa kuba muli ulu lupwa, kabili lyonse tulapepa kuli Yehova ukuti atwalilile ukusakamana aba bwananyina bonse muli shino nshiku sha kulekelesha.”

 Te mulandu na kuntu bamunyinefwe na bankashi bekala, balaitemenwa ukupeelako Abena Kristu banabo ifyo bakwata. Ku ca kumwenako, Enosh alipangile akabokoshi akanono umo alebika indalama pa kuti na o alesangwilako indalama isha kubomfya kukwafwa indupwa shimbi abashikwete ifyo bakabila. Nkashi Guadalupe Álvarez na o ni kapekape. Uyu nkashi ekala mu citungu ca mu Mexico umo abantu abengi bafola indalama ishinono sana kabili umo abengi bashikwata indalama lyonse. Na lyo line alasangwilako ukulingana ne ndalama akwata. Nkashi Álvarez alembele ukuti: “Ndatasha Yehova pa busuma bwakwe no kutemwa kwakwe. Nalishiba ukuti indalama nsangula bakashibika pamo ne sho bambi basangula kabili bakashibomfya kukwafwa bamunyinefwe na bankashi abalekabila ubwafwilisho.”

 Amaofeshi ya musambo ayakwata indalama ishipulapo yalaitemenwa ukutuma isho ndalama ku misambo imbi. Ba Anthony Carvalho ababa mu Komiti ya Musambo iya ku Brazil, batile: “Pa myaka iingi twalekabila indalama ukufuma ku fyalo fimbi pa kuti tubombe umulimo wa Bufumu mu calo cesu. Ishi indalama shalilengele umulimo wa Bufumu mu calo cesu ukulunduluka sana. Pali ino inshita ifintu fyalyaluka kabili tulakwata indalama ishingi ica kuti shilashalapo ne shakwafwilisha ifyalo fimbi ifyakwata indalama ishinono. Bamunyinefwe mu Brazil balamona ifyo umulimo wa kubila imbila nsuma ubombwa mwi sonde lyonse kabili apo basambi ba kwa Yesu balaipeelesha ukutungilila uyu mulimo.”

 Ni nshila nshi iisuma iyo Inte sha kwa Yehova bengafwilamo bamunyinabo na bankashi abalekabila ubwafwilisho? Inshila iisuma kusangwilako ku mulimo wa mwi sonde lyonse, ukucila ukutuma indalama kwi ofeshi lya musambo ilya ku calo cimbi. Kuti mwabika indalama mu kabokoshi ka misangulo ku Ng’anda ya Bufumu ako balembapo ukuti “Umusangulo wa Mulimo wa mwi Sonde Lyonse” nelyo kuti mwabomfya donate.mt1130.com. Tulatasha sana pali iyi imisangulo yonse iyo musangula.