Mu mwaka wa mulimo uwa 2021, a mwi sonde lyonse mwali icikuko ca COVID-19. Nga fintu balondolwele mu cipande citila “Ukwafwilisha Aba Bwananyina mwi Sonde Lyonse mu Nshita ya Cikuko,” twalibomfeshe indalama ishingi b ku kwafwilisha aba bwananyina ili kuli icikuko kabili twalipanga Amakomiti ya Kwafwilisha Abaponenwe na Masanso Ayakalamba ukucila pali 950.

 Na kabili na lintu kwali icikuko, kwali na masanso ayesako pa mulandu wa kubipa kwa micele e lyo na masanso yambi. Aya nayo amasanso yalikumine aba bwananyina mwi sonde fye lyonse. Kwali amasanso ukucila pali 200, e ico pa kuti Komiti ya Bakampanya iye Bumba Litungulula yalisuminisha ukuti tubomfye indalama K146,293,440 ($8 milioni) ukulunda pa shabomfiwe ku kwafwilisha aba bwananyina abashakwete ifyo balekabila mu cikuko ca COVID-19. Moneni ifyo indalama musangula shabombele ukwafwilisha abaponenwe na masanso ayakalamba ayacitike nomba line.

 Pa 22 May mu 2021, ulupili beta ukuti Nyiragongo ulwaba mu calo ca Democratic Republic of the Congo lwalitendeke ukupuulika. Fimunyela nangu munsungwensungwe iifumine mu lupili ilyo lwapuulike yalyonawile amayanda, amasukulu e lyo ne fimatanki basungilamo amenshi. Kwena, te fimunyela fye fkyaletele ubusanso. Pa numa ya nshiku ishinono ukutula apo ulu lupili lwa puulikiile, ulukungu ulwalefuma mu lupili lwalisalangene mu musumba wa Goma kabili abantu abengi balilwele ubulwele bwa kuli bongobongo. Abantu ukucila pali hafu abekala mu musumba wa Goma balibebele ukufulumukamo mu musumba. Kabili abantu abengi nga nshi balifumineko kuli iyi ncende, bamo balile na ku calo ca Rwanda.

 Pali aba abafulumwike pali Inte sha kwa Yehova nalimo 5,000. Bamo amayanda yabo yalyonaike; kabili bamo balibebile ifipe mu mayanda yabo ilyo bafulumwikemo. Komiti iyafwilisha abaponenwe na masanso iya mu Rwanda yalibombele pamo na komiti iyafwilisha abaponenwe na masanso mu calo ca Democratic Republic of the Congo pa kuti basakamane aba aba bwananyina. Bethel ya ku Congo (Kinshasa) yalandile pa mulimo wa kwafwilisha abaponenwe na masanso ukuti: “Nangu ca kuti mu musumba mwali icimfulunganya na lintu tabalaeba abantu ukufulumukamo, komiti yalitendeke ukupeela abaponenwe no busanso ifya kulya, amenshi, ifya kulaalapo no kufimbana e lyo ne fya kufwala.” Mu musumba umo, umo aba bwananyina ukucila pali 2,000 balongene, komiti ya kwafwilisha abaponenwe na masanso yalitweleko amatenti, amamasiki no kubalondolwela ifya kucita pa kuti tabambwile ubulwele bwa COVID-19 no bwa kolela.

 Mu myeshi itatu ilyo kwali ubu busanso, bamunyinefwe balipeela abaponenwe no busanso umupunga ukucila pa makilogramu 6,000, ubunga amakilogramu 6,000, saladi amakilogramu 3,000, na menshi 3,000. Pa kuti bengabomfya bwino indalama, bethel yasalilepo ukulashita ifya kulya ifingi mu calo cabo mwine mu nshita ya kulashita ifya kulya ifyakosa umutengo ku fyalo fimbi.

 Nkashi uo ing’anda yakwe iyo apwile fye ukukuula yaonaike ilyo ulupili lwapuulike atile: “Twalifuupwike sana kabili twali no bulanda.” Lelo uyu nkashi no lupwa lwakwe balibapeele ifyo balekabila kabili balibakoseleshe na mu fya kwa Lesa. Uyu nkashi atile: “Yehova alitwafwa, kabili tucili twalikwata ifyo tukabila. Twalimona ukuti Yehova alatusendela ifisendo kabili ici cilalenga ukuleshipikisha.”

 Pa myaka iingi, imikalile mu calo ca Venezuela yalyafya icine cine. Bamunyinefwe balashipikisha pantu muli ici calo mwaliba icipowe, imikalile yalibipa kabili no bunkalwe nabo bwaba fye mpanga yonse. Lelo icilonganino ca kwa Yehova tacalekelesha aba bwananyina.

 Mu mwaka wa mulimo uwapwile, indalama ukucila pali K27,609,600 (nelyo amadola 1.5 milioni aya ku America) e sho bashitilemo ifya kulya na sopo no kutwala ku ndupwa ishali mu kukabila. Aba pa Bethel ya ku Venezuela balembele ukuti: “Ala tacayanguka ukulatwala ifya kulya ifyafina amakilogramu 130,000 cila mwenshi ku ba bwananyina mu calo conse ica Venezuela, no kushininkisha ukuti fyafika ku ba bwananyina abali mu kukabila.” Pa kuti ifya kulya bashitile tafyonaike bwangu, bamunyinefwe lyonse balashininkisha ukuti bashita ifya kulya ifishonaika bwangu. Aba pa Bethel balandile no kuti “Tushita ifya kulya ifingi pa muku umo mu myeshi ilyo ifyo fya kulya fifula e lyo na lintu imitengo iliko bwino. Kabili pa kusenda tubomfya imyendele iyo tushipoosapo indalama ishingi.”

 Ba Leonel ababa muli Komiti ya Kwafwilisha Abaponenwe na Masanso Ayakalamba ku Venezuela balitemwa sana umulimo babomba. Batile: “Umulimo wa kwafwilisha abaponenwe na masanso wali-ibela. Ukutula apo umwina mwandi uo natemenwe sana afwila ku cikuko ca COVID-19 uyu mulimo ulankosha sana. Ulalenga ndekwata ifya kucita ifingi kabili ulalenga ndeafwa aba bwananyina. Nalimona ifyo Yehova afikilisha ifyo alaya ukuti takalekeleshe abantu bakwe.”

 Munyinefwe umo uwapokelele ifyo balepeela abaponenwe na masanso kale alibombelepo muli komiti ya kwafwilisha abaponenwe na masanso. Atile “Nomba nine ndekabila ukungafwa. Te fya kulya fye twapokelele. Lelo bamunyinefwe balitwafwile no mwina mwandi ukuteka imitima. Balitusakamene, balitusansamwishe no kutukoselesha.”

 Inshita shimo amasanso yacitika fye ukwabula ukwenekela e lyo limo kulaba ukwishibako panono ukuti ubusanso bukacitika. Na lyo line, icilonganino ca kwa Yehova ilingi line cilashita no kutwala ifilekabilwa ku ncende ukuponene ubusanso mu kwangufyanya. Icilenga ifi filecitika misangulo musangula ku kwafwilisha umulimo wa mwi sonde lyonse. Inshila shimo isho mwingabomfya pa kusangula kuti mwashisanga donate.mt1130.com. Tuletasha sana pali bukapekape bwenu.