Abengi abo tulandilepo pa mabula yafumineko muli cino citabo bacaice ‘abaibukishe Kabumba Lesa wabo mu nshiku sha bulumendo bwabo.’ (Luk. Mil. 12:1) Na kuba, pali bapainiya 3,197 ababa mu Georgia, abali nalimo 1,065 bali ne myaka 25 nelyo ukucepako. Cinshi calenga abacaice abengi balebombesha mu fya kwa Lesa?

Fingi fyalenga abacaice abengi balebombesha. Cimo icalenga ni co indupwa mu Georgia shalikatana sana. Ba Konstantine abakusha abana babo 5 mu cine balondolwele ukuti: “Icalengele nsambilile icine ni co nalishibe ukuti Yehova ni Wishi uwaba no kutemwa. Kanshi ilyo na ine natendeke ukukwata abana, ico nalefwaisha kulaumfwana nabo sana.”

Ba Malkhazi na bena mwabo balikwata abana batatu kabili balesha na maka yonse ukwikatana mu lupwa. Batile: “Limo limo tulepusha abana besu ukutontonkanya pa fyo batemwa  pali ifwe nga abafyashi babo e lyo na pa bana banabo. Lyena tulabeba ukulanda ifyo batontonkanya ilyo tuli pa mapepo ya lupwa. Ne ci calenga balemona ifisuma mu bantu no kubatemwa.”

Pa kuti baeluda bengafwa abafyashi ukukusha bwino abana, balapeelako abacaice imilimo imo imo mu cilonganino. Ba Nestori ababatishiwe ilyo bali fye ne myaka 11 batile: “Ukutula fye ku bwaice, baeluda balempeela imilimo iinono iyalekanalekana. Ifi balecita fyalingafwa ukwishiba ukuti na ine nalicindama mu cilonganino.”

Bamunyinefwe abakwata imibele iisuma e lyo na baeluda balafwa sana abacaice. Ba Koba bandume ya ba Nestori batile: “Ilyo nali umusepela, nshapooseleko amano ku fya kwa Lesa nge fyo abo nafyalwa nabo balecita. Eluda umo uwali uwacaice pali ilya inshita, uo nalefwaya sana ukulapashanya alinjishibe bwino kabili aleesha sana ukungafwa nga nalufyanya.  Alibombele umulimo uukalamba sana pa kungafwa ukubwelela kuli Yehova.”

Pali ino nshita, ba Nestori na ba Koba babombela pamo na bankashi yabo ba Mari ku cifulo icabela ukutali sana. Ba Koba batile, “Pali nomba naliba sana ne nsansa!”

Iofeshi lya musambo lilabomfya Abena Kristu bacaice mu milimo ya kwa Lesa iyalekanalekana pa kuti lingafwa abafyashi ukukusha bwino abana. Munyinefwe umo uwaba muli Komiti ya Musambo atile: “Twalitemwa sana abacaice kabili tulesha na maka yesu yonse ukubatungilila no kubafwa ukufishapo ifyo bafwaya ukucita mu mulimo wa kwa Lesa.”

Abacaice nga balebombela pamo na bamunyina na bankashi abakalamba mu fya kwa Lesa no kubishanya nabo, balasambililako ifingi ifyo tabalaba. Ba Mamuka ababombelepo na bamunyinefwe abaya mu kubombela ku fyalo fimbi ilyo balekuula Icikuulwa ca Kulonganinamo mu Tbilisi batile: “Ukubombako umulimo wa makuule na bamunyinefwe abafumine ku fyalo fimbi kwalilengele nakwata ishuko lya kusambilila kuli bambi. Ukulunda pa kusambilila ifya kubomba umulimo wa makuule, nalisambilile ifingi ifya kwa Lesa.”

Icilenga abacaice abengi mu Georgia ukulabomba bwino mu fya kwa Lesa, ni fintu baikatana mu lupwa, ifyo babakoselesha kuli baeluda, ne fyo abo bapashanya mu filonganino baba ne mibele iisuma. Abafyashi ba aba bana bomfwa nga filya fyaumfwile umutumwa Yohane uwalembele ukuti: “Takuli icintu nangu cimo icinsansamusha nga nshi ukucila pa kumfwa ukuti abana bandi baleenda mu cine.”—3 Yoh. 4.

Mu 2013, Ibumba Litungulula lyaebele imisambo yonse ukufwailisha nga kuti cakabilwa ukupilibula impapulo mu  ndimi na shimbi isho balanda mu ncende isho cila musambo wangalila. Ico bacitile ifi, ni co balefwaya abantu na bambi ukumfwa imbila nsuma.

Ici calengele umusambo wa ku Georgia ukutendeka ukupilibula impapulo mu ciSvan ne ciMingrelian ifyapalana sana ne ciGeorgian.

Bapainiya abacincila mu citungu ca Svaneti, balembele ukuti: “Abena Sva balitemwa sana ifya kwa Lesa kabili balicindika Icebo ca kwa Lesa. Nangu ni balya pa kubalilapo abaleshimunuka ukupoka impapulo shesu balitendeke ukulapokako ishali mu lulimi lwabo.”

Bonse bakasabankanya abalanda iciMingrelian balitemenwe sana ilyo batendeke ukulabomfya ululimi lwabo pa  kulongana. Giga painiya wacaice atile: “Nomba nalileka ukubelenga fye ifyasuko ilyo ndeyasukapo pa kulongana. Nalileka no kubalilapo ukutontonkanya ifyo mfwile ukwasuka mu lulimi lumbi.”

Ba Zuri baeluda ababa mu cilonganino ca ciMingrelian mu Tkaia batile: “Pa fibi ne fisuma ifyancitikilapo mu bumi tapaba nangu cimo icalengele nalukusha ifilamba. Nomba ilyo twaimbile inyimbo sha Bufumu pa muku wa kubalilapo mu ciMingrelian, bonse fwe balongene twalilukwishe ifilamba.”

Cimo icacindama icacitike ku Nte sha kwa Yehova mu Georgia cacitike pa 6 April mu 2013 pa Cibelushi ilyo munyinefwe David Splane uwa mwi Bumba Litungulula alandile  ilyashi lya kupeela umusambo uo bawemye no kukusha, Icikuulwa ca Kulonganinamo ne fikuulwa fya kusambililamo amasukulu ya Bufumu. Ba Nte abengi mu Georgia balipokelele no kusunga bwino ba Nte 338 abafumine ku fyalo 24 abasangilwe kuli uku kulongana.

Ubushiku bwakonkelepo, abantu 15,200 balitemenwe ukukutika ku lyashi lyaibela ilyo munyinefwe Splane alandile ica kuti na bali ku filonganino fya kutali baletamba no kukutika kuli iyi programu pa fifulo balonganina. Uyu wali e muku wa kubalilapo ba Nte balongene abengi ukucila ifyo balelongana lyonse mu Georgia. Caliweme nga nshi ukumona ifyo bamunyinefwe na bankashi bali ne nsansa ne fyo balekoseleshanya pali uku kulongana. Munyinefwe umo uwacaice atile, “Nomba naishiba ifyo mu calo cipya mukaba.”

Abantu ba kwa Yehova mu Georgia balinonkelamo sana mwi Sukulu lya Bakabila ba Mbila Nsuma ya Bufumu ilyo twaleita ukuti Isukulu lya Bena Kristu Abaupana. Ukutendekela mu 2013, bamunyinefwe na bankashi ukucila pali 200 balisangwa kuli ili isukulu. Pa kulanga ukutasha pa fyo basambilila, balaitemenwa ukuya mu kubombela ukuli konse uko aba kubila imbila nsuma bacepa.

Bamunyinefwe ababalilepo ukubila imbila nsuma iya Bufumu mu Georgia balibombeshe icine cine ica kuti abantu abengi mu Georgia balikutika ku mbila nsuma. Yehova alipaala bamunyinefwe pa fyo bamutemwa ne fyo batemwa abantu, ifyo baba ne citetekelo e lyo ne fyo bashipa pa kumubombela.

Bamunyinefwe na bankashi ukucila pali 18,000 mu Georgia baliba ne nsansa ilyo babombela Yehova no kwafwa abantu bambi ukwishiba amaka Icebo ca kwa Lesa cakwata.—Fil. 3:13; 4:13.