Mu 2008 mu Indonesia mwali bakasabankanya 21,699. Kabili abantu abalebombela pe ofeshi lya musambo nabo balifulile sana ica kuti umusambo walicepele. Na kabili, apo bakuulile ili ofeshi ninshi ubuteko bwalibinda ba Nte, balikuulile ukutali sana no musumba ukalamba uwa Jakarta. Cine cine balingile ukukuula amaofeshi mupepi no musumba wa Jakarta.

 Mu 2010, bamunyinefwe balishitile icikuulwa icishali nge ofeshi lya musambo ilyo bakwete. Bashitile amaofeshi yonse ayaba pa ntunti yalenga 31 mu cikuulwa icabela mu Central Jakarta ica ntunti 42. Na kabili bamunyinefwe bashitile icikuulwa ca ntunti 12 mu cikuulwa icikalamba umwakwikala ababomfi ba pa musambo 80 no kucilapo. Balishitile ne cikuulwa ca ntunti 5 umwaba amaofeshi ya Dipartimenti Iisakamana Ababomfi ba pa Musambo.

Ibumba lya babomfi ba mu makuule abafumine mu fyalo ifyalekanalekana balibombele pamo no twampani tumo utwa makuule utwa mu Indonesia pa kuwamya ifi fikuulwa. Ba Darren Berg abaleyangalila umulimo wa kuwamya ifikuulwa batile: “Yehova aletwafwa sana na lintu twalekwata amafya ayakalamba ilyo twalebomba uyu mulimo. Ku ca kumwenako, kwali inshita ilyo twalefwaya ukubika fimashini ifipya ifibomba bwino ifyakuwamishako amenshi aya fiko pa kuti abantu bengayabomfya na kabili. Lelo ababomfi ba mu buteko bena tabatusuminishe pantu tabaishibe bwino ifyo ifi fimashini fibomba. Lyena munyinefwe uubomba incito ya bu injiniya ailelanshanya no mukalamba wa mu buteko umo, uyu mukalamba alitusuminishe, alandile no kuti ifyo bamunyinefwe balefwaya ukucita fili fye bwino.”

Pa 14 February 2015, e lyo bapeele ifi fikuulwa kuli Yehova. Ba Anthony Morris III aba mwi Bumba Litungulula e balandile ilyashi lya kupeela ifi fikuulwa. Ba Vincent Witanto Ipikkusuma aba muli Komiti ya Musambo batile, “Pali lelo amaofeshi ya musambo wesu yali mu ncende iisuma nga nshi kabili  nomba tatufisama no kufisama pantu abantu bonse nabatwishiba bwino. Nabeshiba no kuti fwe Nte sha kwa Yehova tukatwalilila ukulabila imbila nsuma mu Indonesia.”

Mu myaka yafumako aba bwananyina abengi abafuma mu fyalo ifyalekanalekana balikuukila ku Indonesia. Ba Lothar Mihank batile, “Aba bwananyina abaya mu kubombela ukwaba ukukabila, balafwilisha bakasabankanya ababa mu fyalo ifyaba mu kukabila nge calo cesu. Balafwilisha sana mu filonganino umo baba kabili balalenga twaishiba ukuti tuli ba bwananyina aba mwi sonde lyonse.” Finshi fyalengele ukuti bakuukile ku Indonesia? Kabili babomba shani muli ici calo? Natumone fimo fimo ifyo abene bailandila.

Ba Jason Gibbs na bena mwabo ba Casey abafuma ku United States batile: “Ilyo twalebelenga mu citabo ca kuti, Ilyashi Lya Nte Sha Kwa Yehova, twalimwene ukuti kasabankanya umo mu Indonesia afwile ukushimikila abantu abengi nga nshi. Kabili abanensu ababombeleko mu Indonesia batwebele ukuti abantu abengi muli ici calo balafwaya ukwishiba ifyo Baibolo isambilisha. E ico twalitumine aba kwi ofeshi lya musambo ku Indonesia kabili balitutumine ukuya mu kubombela ku Bali. Pali iyi nshita ninshi bakasabankanya e lyo batendeke fye ukubomfya ululimi lwa ciNgeleshi pa kubila  imbila nsuma kanshi twali no kubafwa sana pantu twalishibe ululimi lwa ciNgeleshi. Ilyo twaishile twalefwaya fye ukubombelako pa mwaka umo nomba natwikalako imyaka itatu. Abantu abengi abo tubilako imbila nsuma tabaishiba nangu cimo pa Nte sha kwa Yehova. Ala abantu kuno balitemwa ukusambilila icine!”

Ba Stuart Williams na bena mwabo ba Mandy abafuma ku Australia nabo batile: “Twalefwaya ukulabila imbila nsuma ku bantu abafwaisha ukusambilila ifyaba mu Baibolo, e ico twasalilepo ukwisa ku Indonesia. Ilyo tulebila imbila nsuma mu Malang ku East Java, tulakumanya na bana besukulu aba pa yuniversiti abalanda iciNgeleshi kabili abafwaisha ukukutika ku mbila nsuma. Balitemwa sana webu saiti yesu iya jw.org. Ala tulabomba bwino nga nshi uyu mulimo!”

Ba Takahiro Akiyama na bena mwabo ba Mari, bapainiya mu Yogyakarta, pa cishi ca Java batile: “Kuno tulabomba bwino ukucila na fintu twalebomba ku Japan. Abantu kuno baliba bwino kabili ba cikuuku. Abengi maka maka abacaice balafwaisha ukwishiba pa mipepele. Bushiku bumo ilyo twalebila imbila nsuma pa kalitebulo ka kushimikila ku cintubwingi, twalipeele abantu magazini 2,600 mu maawala fye 5.”

Ba Dan Moore na bena mwabo ba Janine abali ne myaka mupepi na 60 nabo batile: “Nga twaya mu kubila imbila nsuma, abantu balatushinguluka. Nga twabamwentwila nabo balamwentula. Balafwaisha ukwishiba ico twendele kabili balatemwa ukukutika ku mbila nsuma. Nga twababelengela ifyebo fimo mu Baibolo, bamo batila, ‘Lekeni inembe ifyo mwabelenga!’ Balapapa sana pa fintu ifingi ifisuma ifyo bengasambilila mu Baibolo. Kuno natupwako umwaka umo kabili nga caliweme atwisa bwangu. Twalefwaya incende ukwakuya mu kubila imbila nsuma, nomba natuisanga!”

Ba Misja Beerens na bena mwabo ba Kristina abaile mu kubomba bumishonari mu 2009 pali lelo ni ba kangalila ba muputule. Batile, “Nangu fye ni mu Madura Island ku  East Java umwaba abaShilamu abene bene, abantu balitemwa ukusambilila Baibolo. Abantu baleminika imyotoka shabo no kulomba magazini. Batila, ‘Kwena ndi muShilamu lelo nalitemwa sana ukubelenga magazini yenu. Bushe kuti mwampeelako na imbi iyo ningayapeelako ifibusa fyandi?’ Ino ncende isuma sana ukubilamo imbila nsuma!”

Mu 1931 ilyo ba Frank Rice bafikile mu Jakarta, mu Indonesia mwali abantu nalimo 60,000,000. Pali lelo mu Indonesia mwaba abantu nalimo 260,000,000. Indonesia e calo calenga bune pa fyalo ifyakwata sana abantu abengi pano isonde.

Ba Nte mu Indonesia nabo bene nabafula sana. Mu 1946 bakasabankanya aba cishinka balitwalilile na pa numa ya  Nkondo ya Calo iyalenga Bubili. Pali lelo mu Indonesia mwaba bakasabankanya ukucila pali 26,000 kabili ici cilangilila fye ukuti Yehova alebapaala! Na kabili abantu 55,864 abasangilwe ku Cibukisho mu 2015 cilangililo ca kuti umulimo ucili ulelunduluka mu Indonesia.

Yesu atile: “Cine cine, umulimo wa kulobolola ukalamba, lelo ababomfi bena nabacepa. E ico, lombeni umwine wa mulimo wa kulobolola ukuti atume ababomfi mu mulimo wakwe uwa kulobolola.” (Mat. 9:37, 38) Ababomfi ba kwa Yehova mu Indonesia nabo bene e fyo balanda. Balafwaisha ukutwalilila ukubombesha pa kuti abantu abekala pali ici cishi balecindika ishina lya kwa Lesa.—Esa. 24:15.