Lesa wa cine e wabumbile ifintu fyonse. Takwata intendekelo ne mpela. (Amalumbo 90:2) Imbila nsuma iisangwa mu Baibolo yafuma kuli ena. (1 Timote 1:11) Apo Lesa e watupeele ubumi, e o tufwile ukulapepa fye.—Belengeni Ukusokolola 4:11.

Takwaba umuntu uwamonapo Lesa pantu Lesa Mupashi, ici cilolele mu kuti umubili Lesa akwata walipusana sana no wa bantu. (Yohane 1:18; 4:24) Na lyo line, nga twamona ifyo Lesa apanga kuti twaishiba ifyo atontonkanya ne fyo omfwa. Ku ca kumwenako, ifisabo fyalekanalekana na maluba fitulanga ukuti alitutemwa kabili wa mano. Ifyo apanga mu muulu fitulanga ukuti alikwata sana amaka.—Belengeni Abena Roma 1:20.

Kuti twasambilila ifingi pa fyo Lesa aba nga tulebelenga Baibolo. Ku ca kumwenako, ilatweba ifyo Lesa atemwa ne fyo apata, ifyo asunga abantu, ne fyo omfwa nga twacita ifyabipa nangu twacita ifisuma.—Belengeni Amalumbo 103:7-10.

Yesu atile: “Shifwe wa mu muulu, ishina lyenu libe ilya mushilo.” (Mateo 6:9) Nangu ca kuti Lesa alikwata amalumbo ya ku mucindikilako ayengi, ishina lyakwe lyaba fye limo. Ifyo abantu beta ishina lyakwe, ciba fye ukulingana ne citundu. Mu Cibemba batila “Yehova.” Lelo abantu bamo bamwita ati “Yahweh.”—Belengeni Amalumbo 83:18.

Ishina lya kwa Lesa balilifumya mu ma Baibolo ayengi no kubikamo amashina ya ku mucindikilako pamo nga Shikulu nelyo Lesa. Lelo ilyo Baibolo bailembele, ishina lya kwa Lesa lyalimo imiku mupepi na 7,000. Yesu alilengele ishina lya kwa Lesa ukwishibikwa ilyo alesambilisha abantu pali Lesa.—Belengeni Yohane 17:26.

Tambeni vidio ileti: Bushe Lesa Alikwata Ishina?

Bushe ifi abantu abengi bacula filanga ukuti Yehova tatusakamana? Abantu bamo batila e ulenga tulecula pa kuti amone nga twalimucetekela, lelo ubu bufi.—Belengeni Yakobo 1:13.

Lesa alicindika abantu. E mulandu wine abapangile ukuti baleisalila ifya kucita. Bushe tatutasha sana ifi Lesa atupeela ubuntungwa bwa kuisalila ukuti tulemubombela? (Yoshua 24:15) Nomba abengi basalapo ukulacusha abanabo, e calenga abantu abengi ukulacula. Yehova alomfwa ububi nga amona abantu balecula.—Belengeni Ukutendeka 6:5, 6.

Yehova alatusakamana. Afwaya ukuti tuleba ne nsansa. Nomba line ali no kufumyapo amacushi no konaula abacita ifyabipa. Lelo kwaliba umulandu alekela ifyabipa ukulacitika. Mwi sambililo 8, emo tukasambilila ico Lesa alekela ifyabipa ukulacitika.—Belengeni 2 Petro 2:9; 3:7, 13.

Yehova alibika amano kuli ifwe fwe bantu. E mulandu wine atwebela ukuti nga tulefwaya ukupalama kuli ena tufwile ukulapepa. (Amalumbo 65:2; 145:18) Alatwelela na lintu twalufyanya. Alamona ifyo tuibikilishako ukucita ifyo afwaya, nangu cingati limo tulalufyanya. Kwena tuli babembu, lelo kuti twaba ifibusa fya kwa Lesa.—Belengeni Amalumbo 103:12-14; Yakobo 4:8.

Apo Yehova alitupeela ubumi, tufwile ukumutemwa ukucila ifyo twatemwa umuntu uuli onse. (Marko 12:30) Nga mulesambilila pali Lesa no kulacita ifyo alemweba ninshi mwalitemwa Lesa kabili mukapalama sana kuli ena.—Belengeni 1 Timote 2:4; 1 Yohane 5:3.