IFYA KUCITA PA KUBA NE NSANSA

Isubilo

TINIKENI

Isubilo

“[Nimukwatila] amatontonkanyo ya mutende, te ya bubi iyo, aya kumupeela inshita ya ku ntanshi iisuma ne subilo.”—Yeremia 29:11.

“UKUBA NE SUBILO . . . KWALICINDAMA SANA PA KUTI TULECITA BWINO MU FYA KWA LESA. Na kabili isubilo kuti lyatwafwa sana nga tuleumfwa abapelelwa, natutalalilwa nelyo tuli no bulanda.”—E filanda icitabo citila Hope in the Age of Anxiety

Baibolo yalilanda ukuti tulingile ukuba ne subilo, lelo ilatusoka no kuti tatulingile ukusubila fye muli fyonse. Baibolo pa Amalumbo 146:3 itila: “Mwitetekela bakankaala, nangu muntunse, uushingamupususha.” Mu nshita ya kutetekela abantu ukutila kuti batupususha, tulingile ukucetekela Kabumba wesu pantu ena kuti afikilisha fyonse ifyo atulaya. Finshi atulaya? Lekeni tulandeko pali fimo.

AKAFUMYAPO UBUBIFI KABILI AKALENGA ABALUNGAMA BAKEKALE MU MUTENDE UMUYAYAYA: Pa Amalumbo 37:10, 11 patila: “Pashala fye panono no mubifi takabepo . . . Lelo abafuuka e bakekala mu calo, kabili bakasekelela nga nshi pantu umutende ukafula.” Na kabili, pa Amalumbo 37:29 patila, “abalungama e bakekala mu calo . . . umuyayaya.”

AKAFUMYAPO INKONDO: “Yehova . . . alelenga inkondo ukupwa ukufika ku mpela sha pano isonde. Ubuta abukontola kabili aputaula ne fumo; Aoca na maceleta mu mulilo.”—Amalumbo 46:8, 9.

TAKWAKABE UKULWALA, UKUCULA, NELYO UKUFWA: “Itenti lya kwa Lesa lili pamo na bantunse . . . Akafuuta ifilamba fyonse ku menso yabo, ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili.”—Ukusokolola 21:3, 4.

ABANTU BONSE BAKAKWATA IFYA KULYA IFINGI: “Ingano shikafula nga nshi pano isonde; Pa muulu wa mpili shikafula icine cine.”—Amalumbo 72:16.

UBUFUMU BWA KWA KRISTU UBUKALATEKA NO MULINGANYA, E BUKALATEKA ISONDE LYONSE: “[Yesu Kristu] bamupeele ukuteka no bukata no bufumu, pa kuti abantu na bantu bonse, aba nko ne ndimi bamubombele. Ukuteka kwakwe kuteka kwa muyayaya ukushakapite, no bufumu bwakwe tabwakonaulwe.”—Daniele 7:14.

Twaishiba shani ukuti aya amalayo yakafikilishiwa? Ilyo Yesu ali pano calo, alilangile ukuti alilinga ukuba Imfumu ya Bufumu bwa kwa Lesa. Alyundepe abalwele, alilishishe abapiina, e lyo no kubuusha abafwa. Ne cacindamishe masambilisho alesambilisha abantu, pantu yalelanda pa fyo abantu bengacita pa kuti bakekale mu calo umo abantu bakalaumfwana no kulaikala mu mutende. Yesu alisobeele ne fikalacitika ku ntanshi, ukubikako fye ne fintu ifikalalanga ukuti tuleikala mu nshiku sha kulekelesha.

IFINTU FIKABIPA E LYO FIKAWAME PA NUMA

Yesu asobele ukuti mu nshiku sha kulekelesha tamwakabe umutende no mutelelwe. Alandile ukutila pa fyo tukeshibilako ukuti “icalo cili ku mpela,” pakaba ne nkondo, ifipowe, ifikuko e lyo ne finkukuma ifikalamba. (Mateo 24:3, 7; Luka 21:10, 11; Ukusokolola 6:3-8) Yesu alandile no kuti: “Pa mulandu wa kufulisha kwa bubi, ukutemwa kwa bengi kukacepa.”—Mateo 24:12.

Kwaliba ifintu ifingi ifilanga ukuti ukutemwa kwa bengi kwalicepa kabili umuntu umbi uwalembeleko Baibolo alisobeele pali ifi. Pali 2 Timote 3:1-5 palanda ukuti, “mu nshiku sha kulekelesha” abantu bakaba abaitemwa, abatemwa indalama kabili bakatemwa ukwangala. Bakaba aba cilumba kabili abankalwe. Aba mu ndupwa tabakatemwane kabili abana tabakaleumfwila abafyashi babo. Aba mu mipepele bakaba sana no bumbimunda.

Ifi ifyabipa ifilecitika filelanga ukuti tuleikala mu nshiku sha kulekelesha. Na kabili filelanga ukuti Ubufumu ubukalenga ifintu ukuwama, nabupalama. Yesu alisobele na pa cintu icisuma icikalacitika mu nshiku sha kulekelesha ilyo atile: “Imbila nsuma iyi iya bufumu ikabilwa ku bantu bonse aba pe sonde ku kuba ubunte ku nko shonse; e lyo impela ikesa.”—Mateo 24:14.

Iyi imbila nsuma ilalenga ababifi basokwa kabili ilalenga abalungama baba ne subilo lya kuti nomba line amalayo Lesa atulaya yalafikilishiwa. Bushe kuti mwatemwa ukwishibilapo na fimbi pali aya amalayo? Nga kuti mwatemwa, belengeni ifyebo fili pe bula lya kulekeleshako ilya ino magazini.