BUSHE mwalisumina ukuti Baibolo yafuma kuli Lesa, nelyo mwaishiba ukuti libuuku umwaba ifyebo ifyo abantu abailembele baletontonkanya?

Nangu fye bantu abatila Bena Kristu balakansana pali uyu umulandu. Ku ca kumwenako, mu 2014, ilyo aba mu kabungwe ka Gallup aka ku America bafwailishe pali uyu mulandu, basangile ukutila Abena Kristu abengi batila “muli Baibolo mwalibako amashiwi ya kwa Lesa.” Na lyo line, basangile no kuti umuntu umo pa bantu 5 abo baipwishe bamona ukutila Baibolo libuuku umwaba “inshimi, amalyashi ya kale, na mafunde ayo abantu balembele.” Uku ukukansana kulalenga abantu ukulafwaya ukwishiba umwalola amashiwi ya kuti Baibolo “yafuma” kuli Lesa.—2 Timote 3:16.

Muli Baibolo mwaba amabuuku ayanono 66 ayo balembele ku bantu 40, mu myaka 1,600. Nomba nga ca kuti abantu e balembele Baibolo, kuti twalanda shani kuti “yafuma kuli Lesa”? Amashiwi ya kuti “yafuma kuli Lesa” yalola mu kuti ifyebo fyaba muli Baibolo fyafuma kuli Lesa. Baibolo itila: “Umupashi wa mushilo e walengele ukuti balande ayo mashiwi ayafumine kuli Lesa.” (2 Petro 1:21) Kanshi kuti twatila, Lesa alebomfya amaka yakwe ayashimoneka, e kutila umupashi wa mushilo, pa kweba abantu ifya kulemba mu mabuuku ya mu Baibolo. Kuti twapashanya ifyo Lesa acitile kuli shimakwebo uuleeba sekritare ukumulembelelako kalata. Umwine wa ilya kalata ni shimakwebo, sekritare alemulembelako fye.

Lesa alebomfya bamalaika ukweba bakalemba ba Baibolo bamo ifyo balingile ukulemba. Bambi balemona ifimonwa ukufuma kuli Lesa. Inshita shimo, Lesa aleeba abantu ifya kulemba ukubomfya ifilooto. Nangu ca kuti limo Lesa aleleka abantu ukulemba ubukombe bwakwe ukubomfya amashiwi yabo abene, limo alebeba na mashiwi ya kubomfya. Kanshi kuti twatila ifyebo ifyo abantu balelemba te fyabo, lelo fya kwa Lesa.

Kuti twashininkisha shani ukuti ifyo abalelemba Baibolo balembele fyafumine kuli Lesa? Natulande pa fintu ifingalenga twashininkisha ukuti Baibolo yafuma kuli Lesa.