Baibolo itila: “Nga mwalomba icintu conse kuli Tata, akamupeela mwi shina lyandi.”—Yohane 16:23.

Amashiwi Yesu alandile, yalatulanga ukuti tulingile ukulapepa kuli Yehova ukupitila mwi shina lya kwa Yesu Kristu, te kupepa ukupitila mu fimpashanya, abatakatifu, bamalaika, nelyo ifikolwe fyesu ifyafwa. Nga tulepepa kuli Lesa ukupitila mwi shina lya kwa Yesu, ninshi tulelanga ukuti twalishiba umulimo wacindama uo Yesu akwata. Yesu atile: “Takuli uwisa kuli Tata kano aishila muli ine.”—Yohane 14:6.

Baibolo itila: “Mupongolweleni ifyaba mu mitima yenu.”—Amalumbo 62:8.

Ilyo tulepepa kuli Yehova, tulingile ukulalanda nge fyo twingalanda no mufyashi uwatutemwa. Mu nshita ya kulabelenga fye amapepo nelyo ukulapepa fye amapepo ya kusungila, tulingile ukulalanda nankwe mucinshi mucinshi, kabili ukufuma pa nshi ya mutima.

Baibolo itila: “Conse ico twalomba, cikulu fye nacilingana no kufwaya kwakwe, alatumfwa.”—1 Yohane 5:14.

Muli Baibolo, Yehova alitweba ifyo akatucitila, ne fyo afwaya tulecita. Pa kuti Lesa alekutika ku mapepo yesu, ifyo tulepepela filingile ukulingana no “kufwaya kwakwe.” Pa kuti tumwishibe bwino no kwishiba ifyo afwaya, tulingile ukulasambilila Baibolo. Nga tulecita ifi, Lesa akalakutika ku mapepo yesu.

Mulepepa Ukuti Lesa Alemupeela Ifyo Mukabila. Kuti twapepa ukuti Lesa atupeele ifyo tukabila cila bushiku pamo nga ifya kulya, ifya kufwala, no mwakwikala. Na kabili kuti twapepa ukuti Lesa atupeele amano pa kuti tupingule bwino pa fintu, nelyo ukutupeela amaka ya kushipikisha amafya tukwete. Kuti twapepa ukuti Lesa atwafwe ukuba ne citetekelo, atwelele imembu, nelyo ukutwafwa.—Luka 11:3, 4, 13; Yakobo 1:5, 17.

Mulepepelako Abantu Bambi. Abafyashi abatemwa abana babo, balaba sana ne nsansa nga bamona ukuti abana balitemwana. Na Yehova afwaya fwe bana bakwe aba pe sonde tuletemwana. Tulingile ukulapepelako abena mwesu, abana besu, balupwa lwesu ne fibusa fyesu. Umutumwa Yakobo alembele ukuti: ‘mulepepelana.’—Yakobo 5:16.

Mulepepa Amapepo ya Kutootela. Baibolo ilanda pali Kabumba wesu ukuti: “Acitile icisuma, pa kumupeela imfula ukufuma mu muulu ne nshita sha kutwala ifisabo, ukumupeela ifya kulya ifingi no kulenga imitima yenu ukusangalala.” (Imilimo 14:17) Nga tuletontonkanya pa fyo Lesa atucitila, tukalapepa amapepo ya kumutasha. Na kabili, tulingile no kulacita ifintu ifilanga ukuti tulatasha pa fyo Lesa atucitila.—Abena Kolose 3:15.

Inshita shimo kuti twaumfwa ububi nga twamona kwati Lesa taleasuka bwangu amapepo ayo tupepa ukufuma pa nshi ya mutima. Bushe nga caba ifi tulingile ukumona kwati Lesa tatubikako amano? Awe nakalya. Natulandeko pali fimo ifyacitike ifilanga ukuti tulingile ukutwalilila fye ukupepa.

Ba Steve abo twacilandapo mu cipande ca kubalilapo batile: “Nkana kulapepa ilyo nali sana na mafya, nga nalemona kwati nshakatale mbapo ne nsansa.” Cinshi calengele ba Steve batendeke ukupepa na kabili? Balitendeke ukusambilila Baibolo kabili balisambilile ukuti balingile ukulapepa ukwabula ukuleka. Ba Steve batile, “Ndapepa kuli Lesa no kumutasha pa fyo ifibusa fyandi fyangafwa. Pali ino nshita, naliba sana ne nsansa ukucila ifyo naali.”

Bushe ba Jenny, abalemona kwati Lesa te kuti asuke amapepo yabo pa mulandu ne fyabipa ifyo balecita kale, nabo balyalwike no kutendeka ukupepa? Ee, umfweni ifyo balandile, batile: “Nga naumfwa sana ububi pa fyo nalecita, nalepepa kuli Lesa ukuti angafwe ukumfwako bwino?” Bushe ipepo lyalibafwile? Batile: “Ukupepa kuli Lesa kwalingafwa ukumona ukuti, nangu ca kuti umutima wandi ulampeela imilandu pa fyo nalecita, Lesa alimbelela uluse.” Balandile no kuti: “Ipepo lyalingafwa ukwishiba ukuti, Yehova e ko aba kabili mufyashi umusuma. Na kuba apo ni cibusa wandi kabili ni Lesa wa kutemwa akatwalilila ukungafwa, kulila fye ndecita ifyo afwaya.”

Tontonkanyeni na pa fyacitike kuli ba Isabel. Ilyo bali pa bukulu, badokota babebele ukuti bakakwata umwana uwalemana. Ne ci calilengele bomfwe sana ububi. Abantu bamo balebeba ukuti bafumye fye ifumo. Ba Isabel batile: “Naleumfwa kwati nalafwa ku bulanda ubo nakwete.” Bushe ilyo ifi fyalecitika, bacitile shani? Balandile ukuti: “Nalipepele kuli Lesa imiku iingi ukuti angafwe.” Mu kuya kwa nshita balikwete umwana umwaume uo bainike ati Gerard. Nga fintu babebele, afyelwe uwalemana. Bushe ba Isabel bomfwa ukuti Lesa alyaswike amapepo yabo? Ee. Cinshi twalandila ifi? Batile: “Pali ino nshita umwana wandi ali ne myaka 14, kabili nga namumona ali ne nsansa nangu ca kuti alilemana, nshitwishika ukuti Lesa alyaswike amapepo yandi. Kabili imumona ukuti lipaalo ilyo Yehova Lesa ampeela.”

Amashiwi ya musango uyu ayo abantu balanda ukufuma pa nshi ya mutima, yalalenga twatontonkanya pa fyo uwalembeleko Amalumbo alandile, atile: “Mukakutika ku kufwaya kwa bafuuka, mwe Yehova. Mukateyanye mitima yabo. Mukapeepekako ukutwi kwenu.” (Amalumbo 10:17) Twamona ukuti kwaliba imilandu iisuma iilingile ukulenga twatwalilila fye ukulapepa.

Muli Baibolo mwaliba amapepo ayengi ayo Yesu apepele. Ipepo abantu abengi baishiba, ni lilya asambilishe abasambi bakwe. Finshi twingasambilila kuli ili ipepo?