UKUCILA pa myaka 3,000 iyapita, Yobo alishibe ukuti ifyuni fya mulwelele kuti fyatusambilisha ifingi pa fyo Lesa abumba. Na kabili ifyo ifyuni ficita ifintu kuti fyalenga twalafibomfya mu filangililo. Ifyo Baibolo yalanda pa fyuni fya mulwelele filatusambilisha pa fyo tulingile ukwikala na pa fyo twingakwata bucibusa busuma na Lesa. Lekeni tumone ifya kumwenako fimo.

Abaleikala mu Yerusalemu balishibe sana utumimbi, utuni utwatemwa ukupanga ifisansala mu mbali ya mutenge wa fikuulwa. Tumo twapangile ifisansala mwi tempele lya kwa Solomone. Cimoneka kwati cila mwaka utuni utwaleikala mu fisansala ifyo twapangile pe tempele tabaletwipaya, kabili twalekusha utwana ukwabula ubusanso nangu bumo.

Umo pa bana ba kwa Kora uwalembele Amalumbo 84 kabili uwalebombela pe tempele umulungu umo mu myeshi 6, alimwene ifisansala ifyali pe tempele. Alefwaisha ukuba kwati ni tulya utumimbi utwaleikala mu ng’anda ya kwa Yehova. Atile: “Ing’anda yenu iya lulumbi nali-itemwa nga nshi, Mwe Yehova wa mabumba! Umweo wandi wafuluka kabili wanaka nga nshi ku kufwaya imansa sha kwa Yehova.  . . . Nangu fye cuni nacipangamo ing’anda, na kamimbi nakapangamo icisansala, umo kabikile abana ba kako, mupepi ne cipailo cenu icikalamba, Mwe Yehova wa mabumba, mwe Mfumu yandi kabili Lesa wandi!” (Amalumbo 84:1-3) Bushe na ifwe, ukubikako na bana besu, tulomfwa nge fyaumfwile uwalembele Amalumbo 84, kabili bushe tulalanga ukuti tulafwaisha kabili tulatasha pa kulalongana pamo na bantu ba kwa Lesa?—Amalumbo 26:8, 12.

Kasesema Yeremia alembele ukuti, “Kabaso wa mu lwelele ena alishiba inshita yakwe.” Alishibe bwino ifyo ifi fyuni fyaleenda mu Calo ca Bulayo. Muli ba February ukufika muli ba April, fikabaso ifyabuuta ukucila pali 300,000 filapita mu Mupokapoka wa Yordani, ukufuma ku Africa ukuya ku Northern Europe. Ifi ifyuni filaishibila fye ifine fyeka ukuti fifwile ukubwelela kulya fibikila amani lyonse. Nga filya ifyuni fimbi fyaba, fikabaso “filasunga inshita ya kwisa kwa fiko.”—Yeremia 8:7.

Icitabo ca Collins Atlas of Bird Migration citila, “Ca kupapusha sana ukwishiba ukuti ifyuni fileshiba ifiine fyeka ukuti nomba ni nshita ya kukuukila ku ncende imbi.” Yehova Lesa e walenga ifyuni ifikuukila ku ncende shimbi ukulaishiba inshita fifwile ukukuuka, lelo apeele abantu amano ya kwiluka inshita ne miceele. (Luka 12:54-56) Ifwe tatwaba nge fyuni ifyakwata fye amano ya kwishiba inshita ya kukuukila kumbi, lelo ifyo tusambilila mu Cebo ca kwa Lesa e filenga tuleiluka inshita tuleikalamo. Abena Israele abaliko mu nshiku sha kwa Yeremia  tabaleiluka ifishibilo fya nshita baleikalamo. Lesa alilondolwele icalengele ukuti beiluka ilyo atile: “Nabakaana icebo ca kwa Yehova, kabili mano nshi bakwete?”—Yeremia 8:9.

Pali ino nshita kwaliba ifintu ifingi ifilanga ukuti tuleikala mu nshita iyo Baibolo ita ukuti “inshiku sha kulekelesha” (2 Timote 3:1-5) Bushe mwakulabika amano ku fishibilo fya nshiku tuleikalamo nga filya kabaso aaba?

Kapumpe balimulumbula imiku ingi mu Baibolo, kabili ifi ifyuni ifimoneka bwino sana filasangwa sana mu Calo ca Bulayo. Kapumpe ‘afwaya ifya kulya’ ninshi ali mu cisansala pa muulu wa cilibwe icasansuka kabili “amenso yakwe yalolesha ukufika apatali.” (Yobo 39:27-29) Amenso ya kwa kapumpe yalamona apatali ica kutila kuti amona na ka kalulu akali apalepele kilomita imo.

Nga filya fine kapumpe ‘alolesha ukufika apatali,’ Yehova na o alamona ifikacitika ku ntanshi. Ici e calenga alande mu Cebo cakwe ukuti: “Ne usobela pa kutendeka ifikacitika ku mpela, no kufuma kale ifintu ifishilacitwa.” (Esaya 46:10) Nga tulekonka ifyo Yehova atusambilisha, kuti twanonkelamo mu fyo atupandako amano na pa fyo eshibila libela ifya ku ntanshi.—Esaya 48:17, 18.

Baibolo na kabili ilapalanya abantu abacetekela Lesa kuli bakapumpe, itila: “Abalecetekela Yehova bakaba na maka na kabili. Bakapupuka na mapindo kwati ni bakapumpe.” (Esaya 40:31) Kapumpe alabomfya umwela uwakaba nga ca kuti alefwaya ukuyilako pa muulu. Nga afika apali umwela uwakaba, alaleka ukupampaila amapindo, lelo ayafungulula fye no kutendeka ukushinguluka apali umwela, kabili ici cilalenga aleilako pa muulu. Kapumpe tashintilila pa maka akwata nga alefwaya ukuya sana mu muulu nelyo nga alefwaya ukupupuka apali intamfu iitali. Na ifwe bene nga twalashintilila pali Yehova, akalatupela “amaka yacila aya bantunse,” nga fintu atulaya.—2 Abena Korinti 4:7, 8.

Ilyo kwashele inshiku shinono ukuti Yesu afwe, aliminine alolesha umusumba uukalamba uwa baYuda no kutila: “We Yerusalemu, we Yerusalemu, we wipaya bakasesema no kupoola amabwe abo bakutumina! Ifyo imiku iingi nafwaile ukulonganika abana bobe, filya nankoko afukatila utwana twakwe mu mapindo yakwe! Lelo imwe tamwalefwaya.”—Mateo 23:37.

Ifyuni filacingilila sana utwana. Ifyuni ifikala pa nshi nga inkoko filalolekesha sana pa kuti ficingilile utwana. Nankoko nga amona pungwa alepupuka, alalila pa kuti asoke utwana kabili nga acita ifi, utwana tulabutukila uko ali pa kuti atufukatile no kutucingilila. Na kabili nakonko alafukatila utwana pa kuti atucingilile ku kasuba nga nakabalika sana e lyo na ku mfula iikalamba. Yesu na o alefwaisha ukucingilila abekashi ba mu Yerusalemu. Pali ino nshita, Yesu alatwita ukuti tuleya kuli ena pa kuti tusange ukutuusha ku fisendo na ku masakamika yesu.—Mateo 11:28, 29.

Kwaliba ifintu ifingi ifyo tusambilila ku fyuni. Ilyo mulemona ifyo ficita, muleesha ukwibukisha amalembo ayalanda pa fyo twingasambililako kuli fyena. Akamimbi kafwile ukulamwafwa ukutemwa sana ing’anda ya kwa Yehova. Mufwile ukulashintilila sana pali Lesa nga filya kapumpe ashintilila pa mwela wa kaba pa kuya mu muulu. Mulingile ukuleka Yesu amusambilisha icine icingamucingilila nga filya nankoko acingilila utwana nga atufukatila. Kabili mulebika amano ku fishibilo fya nshiku tuleikalamo nga filya kabaso acita.