Mulemona Ifintu nge fyo Lesa Afimona

PA SEPTEMBER 14, 2002, kwalikabile na kasuba kalibalike mu New York, United States of America. Pali ubu bushiku, impuka ya bantu 6,521 ukufuma mu fyalo fyalekanalekana balongene pa Patterson Educational Center ne fifulo fimbi fibili ifya Nte sha kwa Yehova ifyaba muli cilya citungu. Ibumba lyalilongene ku kumonako abalepwisha amasambililo yabo mwi kalasi lya Watchtower Bible School of Gileadi ilyalenga 113. Abasambi bafumine mu fyalo 14 kabili bapoosele imyeshi yapita isano ku kuiteyanishisha umulimo wa bumishonari uo bali no kuyabomba mu fyalo 19 umo babatumine.

Ba Carey Barber, abali ne myaka 98 kabili ababa mwi Bumba Litungulula ilya Nte sha kwa Yehova e bali ba ceyamani pali uyu programu. Balandile pe Sukulu lya Gileadi ilyaba nge ca bupyani pa myaka nalimo 60, ilyapangasha abengi ukuya muli bumishonari. Munyinefwe Barber atile: “Takuli ku kukumya ukusosa ukuti ukukanshiwa kwabo ukwalundwapo kwalifumamo ifikalamba. Na kuba imintapendwa ya bantu bafuuka mwi sonde lyonse baliipeela kuli Yehova kabili balyamba no kupepa kwa cine kabili balabombako no mulimo washila pantu bamishonari bakanshiwa balibafwa.”

Ilyo bashilaya ku Gileadi, abasambi abengi balangile ukuti balefwaisha ukulundako ubutumikishi bwabo. Abaupana babili bapoosele ukucila pa mwaka umo ukuya ku sukulu pa kuti bengasambilila ululimi lwa Mandarin no kulanda na bantu abengi abaishiba ululimi lwa ku China abekala ku mwabo mu Canada. Abaupana bambi nabo batendeke ukuisambilisha ululimi lwa ku Albania kabili mu kuya kwa nshita bakuukile ku Albania mu kuyasambilisha abantu abengi abalefwaya ukusambilila Baibolo kulya. Bambi abali mu kalasi ku Gileadi bafumine ku Hungary, Guatemala, na ku calo ca Dominican Republic, ifi e fyalo baileko ukwali ukukabila kukalamba ukwa bakasambilisha wa Cebo ca kwa Lesa.

Nomba, ilyo bashilaya ku milimo yabo mu Afrika, ku Kabanga ka Bulaya, ku Central na South Amerika, na ku Kabanga Sana, bonse abapwishishe isukulu bakoseleshiwe ukulaibukisha ukuti Lesa akeshiba fyonse ifyo bacita.

Mulemona Ifintu nge fyo Lesa Afimona

Pa numa ya mashiwi ya kwiswila, Munyinefwe Barber aitile Maxwell Lloyd, uwaba muli Komiti wa Musambo mu United States. Akomaile pa mutwe waleti “Mulemona Ifintu Fyonse nge fyo Lesa Afimona.” Munyinefwe Lloyd alandile pa ca kumwenako ca kwa Davidi no Mwana wa kwa Lesa, Yesu. (1 Samwele 24:6; 26:11; Luka 22:42) Pa numa ya kucinkulako abasambi ukuti ifyo basambilile mu Baibolo pa myeshi isano fyabakansha ukumona ifintu nge fyo Lesa afimona, abalelanda ilyashi baipwishe ati: “Ilyo muletungulula amasambililo ya Baibolo ku bantu mu mulimo wenu uupya, bushe mwakulabafwa ukuti balepelulula pa fintu ukulingana ne fyo Lesa afimona?” Kabili pa lwa kufunda bambi, bapandile abasambi amano ukuti: “Mwilatila, ‘ukulingana ne fyo  ndemona, ndetontonkanya ukuti . . . ’ Lelo, bafweni ukumfwikisha ifyo Lesa amona ifintu. Nga mwacite fi, mukaafwa sana abo mukalabishanya na bo mu mulimo wenu.”

Abakonkelepo muli uyu programu ni ba Gerrit Lösch, ababa mwi Bumba Litungulula. Balandile pa mutwe waleti “NDI na Iwe,” batontomeshe pa miku iingi iyo Yehova aebele ababomfi bakwe aba cishinka ukuti, “Ndi na iwe.” (Ukutendeka 26:23, 24; 28:15; Yoshua 1:5; Yeremia 1:7, 8) Pali lelo, na ifwe kuti twacetekela muli Yehova nga ca kuti lyonse tuli aba cishinka. Munyinefwe Lösch aipwishe ati: “Bushe mulasakamikwa nga kuti mwasanga abantu bakusambilila na bo Baibolo? Ibukisheni, Yehova atile, ‘ndi na iwe.’ Bushe mulasakamikwa pa kukwata fye ifikwatwa ifinono? Yehova atile: ‘Nshakakushe nakalya nangu kukulekelesha nakalya.’” (AbaHebere 13:5) Munyinefwe Lösch pa kusondwelela ilyashi acinkwileko abasambi ukuti Yesu alaile ukuba na basambi bakwe aba cishinka mu mulimo wa kupanga abasambi.—Mateo 28:20.

Umutwe we lyashi lya ba kafundisha ba pa Gileadi, ba Lawrence Bowen waleti: “Bushe Kuti Mwasanga Umutelelwe Wenu mu Mulilo?” Batile pa mulandu wa fyacitike mu Eden, abo bonse abaipeelesha mu kupepa Yehova balaponenwa na mafya kabili, limo limo, baponenwa na mesho ayaba ngo mulilo. Bakoseleshe  abasambi bapwishishe isukulu ukukonka ica kumwenako ca kwa Yesu, uwasangile umutelelwe wa cine ukupitila mu kucetekela Yehova umupwilapo no kusuminisha amesho yaba ngo mulilo ayo Yehova asuminishe ku kulenga icumfwila ca Mwana wakwe ukuba icapwililika. (AbaHebere 5:8, 9) Yehova kuti apashanishiwa kuli kalopolola wa lubwe lwa golde uubomfya icikabilila calinga pa kuti afumyeko bamunyela. Kwena, icitetekelo cayeshiwa no mulilo citupeela umutelelwe ukalamba ukucila golde walopolwa. Mulandu nshi? Munyinefwe Bowen atile “pantu icitetekelo calopolwa citulenga ukushipikisha amesho yonse, kabili citulenga ukushipikisha mpaka ‘na ku mpela’.”—Mateo 24:13.

Ba kafundisha bambi aba pa Gileadi, ba Mark Noumair, baipwishe ati: “Bushe Mukaba Abasuma?” Umutwe wa lyashi lyabo wafumine pa mashiwi yaba pali 1 Samwele 2:26, ayalanda pali Samwele ukuti ali “umusuma kuli Lesa na ku bantu pamo.” Pa numa ya kulanda pa ca kumwenako ca kwa Samwele, Munyinefwe Noumair, uwabombele umulimo wa bumishonari mu Afrika pa myaka ukucila 10, atile: “Na imwe bene kuti mwaba abasuma sana kuli Lesa nga ca kuti lyonse mulebomba ne cishinka umulimo Lesa amupeela. Alimupeela umulimo wacindama uwa bumishonari.” Lyena munyinefwe Noumair akoseleshe abalepwisha ili sukulu ukulamona umulimo wabo uwashila ukuti wafuma kuli Lesa no kulatontonkanya nga Lesa ilyo balebomba imilimo yabo.

Pa nshita ye sukulu, abasambi bali ne shuko likalamba ilya kuti lyonse pa mpela ya mulungu baleeba abantu muli ilya ncende “ifyapuulama fya kwa Lesa” ifyaba mu Baibolo. (Imilimo 2:11) Na kuba, balelanda ifi fintu mu ndimi 10. Ba Wallace Liverance, bakafundisha na bambi aba pa Gileadi, pa kulanda ilyashi lyaleti “‘Ifyapuulama fya kwa Lesa’ Filenga Abantu Ukucitapo Cimo,” baipwishe ibumba lya basambi ukuti bengashimika ifyo basangile mwi bala. Batile: “Umupashi e walengele balya bali mu muputule wa pa muulu pa Pentekoste ukulanda pa ‘fyapuulama fya kwa Lesa.’ Ulya mupashi umo wine ulabomba na lelo line mu babomfi ba kwa Lesa aba cishinka.” Walenga na bamo ukusambilila indimi shipya pa kuti bengashimikila ku bantu abengi.

Ukupanda Amano Kusuma pa fya Kumona Ifintu nge fyo Lesa Afimona

Pa numa ya malyashi ya kubalilapo, ba Gary Beaux na ba William Young, ababa mu lupwa lwa Bethel ku United States, baipwishe ababa mu makomiti yalekanalekana aya misambo ukwaba bamishonari kabili baipwishe na baupana babili ababombele umulimo wa bumishonari pa myaka 41. Cimo ico balandile ca kuti: “Abashifwaya ifingi balakokola. Bangwa ico baishiile. Baishiba ukuti ico baishiile kushimikila imbila nsuma no kwafwa abantu ukwishiba Yehova.”

Ba David Splane, nabo ababa mwi Bumba Litungulula, basondwelele programu ne lyashi lyaleti “Te Kutali Muleya!” Ni mwi baloseshe pa kulanda ayo mashiwi, apo icishinka cali ca kuti abapwishishe isukulu 46 bali no kuya mu fyalo fyalekanalekana mwi sonde lyonse? Pa kulondolola umo ayo mashiwi yalolele batile: “Te mulandu na kuntu muli pano isonde, lyonse mukaba mu ng’anda ya kwa Lesa nga mwaba aba cishinka.” Cine cine, bonse Abena Kristu ba cishinka, te mulandu na kuntu bengaba, babombela mwi tempele lya kwa Lesa ilya ku mupashi, nelyo mu ng’anda, iyapangilwe pa nshita intu Yesu abatishiwe mu mwanda wa myaka uwa kubalilapo. (AbaHebere 9:9) Mwandi abasangilweko balisansamushiwe pa kwishiba ukuti Yehova aba mupepi na babomfi bakwe bonse aba cishinka pe sonde! Nga filya fine Yehova atemenwe Yesu ilyo ali pe sonde, e fyo Atemwa na ifwe bonse ne milimo tumubombela, te mulandu na kuntu twingaba. Kanshi mu fya mapepo, tatwaba kutali ku bantu banensu na kuli Yehova na Yesu.

Pa numa ya kubilisha imitende yafumine mu ncende shapusanapusana mwi sonde lyonse, ukubilisha uko abasambi batuminwe ukuyabombela, no kubelenga kalata walembele abasambi uwa kutasha pa fyo bakanshiwe pa Gileadi, ceyamani asondwelele programu bwino bwino. Akoseleshe bamishonari bapya ukulabomba bwino lyonse no kuba ne nsansa ilyo balebomba umulimo wa kwa Yehova.—Abena Filipi 3:1.

[Akabokoshi pe bula 23]

UKULONGANIKA IFIPENDO FYA BALI MWI KALASI

Bafumine ku fyalo: 14

Bakayabombela mu fyalo: 19

Ubwingi bwa basambi: 46

Imyaka ya kufyalwa nga kwakanya pali umo: 35.0

Imyaka ya kuba mu cine nga kwakanya pali umo: 17.2

Imyaka ya kuba mu mulimo wa nshita yonse nga kwakanya pali umo: 13.7

[Icikope pe bula 24]

Abapwishishe Isukulu mu Kalasi Lyalenga 113 ilye Sukulu lya Baibolo Ilya Gileadi Ilya Watctower

Mu mutande uli pe samba, ukupenda kutampile ku ntanshi ukulola ku numa, amashina yena yatantikwe ukufuma ku kuso ukulola ku kulyo mu mulongo umo na umo.

(1) Ligthart, M.; Hosoi , S.; Berktold, A. ; Liem, C.; Aoki , J. (2) Baglyas, J. ; Bouqué , S.; Bossi, A.; Alton, J.; Escobar, I. ; Escobar, F. (3) Stoica, A.; Stoica, D.; Freimuth, S.; Karlsson, M.; LeBlanc, R. (4) Bianchi, R.; Bianchi, S.; Kaminski, L.; Joseph, L.; Paris, S.; LeBlanc, L (5) Paris, M.; Skidmore, B.; Horton, J.; Horton, L.; Skidmore, G. (6) Liem, B.; Alton, G.; Quirici, E.; Langlois, M.; Steininger, S.; Aoki, H. (7) Langlois, J.; Steininger, M.; Bossi, F.; Kaminski, J.; Bouqué, J.; Ligthart, E.; Hosoi, K. (8) Baglyas, J.; Quirici, M.; Karlsson, L.; Freimuth, C.; Berktold, W.; Joseph, R.