Ubu E Bupyani Bwesu Ubwafuma Kuli Lesa
Ubu E Bupyani Bwesu Ubwafuma Kuli Lesa
“Ubu e bupyani bwa babomfi ba kwa Yehova.”—ESA. 54:17.
KUTI MWAYASUKA SHANI?
Finshi Lesa aacita pa kucingila Icebo cakwe?
Bushe Yehova aacingilila shani ishina lyakwe pa kuti abantu bakwe balishibe?
Londololeni ifyo Lesa aacingilila icine.
1. Cinshi Yehova apeela abantu ica kubafwa?
YEHOVA, “Lesa wa mweo, uwabako umuyayaya,” alicingilila imbila nsuma iikalenga abantu ukuba no mweo. Iyi mbila nsuma ikatwalilila pantu “icebo ca kwa Yehova caikalilila pe.” (1 Pet. 1:23-25) Ala tulatasha pa fyo Yehova acingilila ifyebo ifyacindama ifyaba mu Cebo cakwe, Baibolo!
2. Cinshi Lesa acingilila mu Cebo cakwe pa kuti abantu bakwe balecibomfya?
2 Mu Cebo cakwe, Lesa alicingilila ishina ilyo aipeela pa kuti abantu balelibomfya. Umuku wa kubalilapo uyo Baibolo yalanda pali “Yehova Lesa” ni lilya “umuulu na pano isonde fyapangilwe.” (Ukute. 2:4) Ishina lya kwa Lesa lyalilembelwe imiku iingi mu cipesha amano pa mabwe apali Amafunde Ikumi. Ku ca kumwenako, ifunde lya kubalilapo lyatendekela na mashiwi ya kuti: “Nine Yehova Lesa obe.” (Ukufu. 20:1-17) Ishina lya kwa Lesa lyalitwalilila pantu Shikulu Mulopwe Yehova alicingilila Icebo cakwe ne shina lyakwe nangu ca kuti Satana alyesha na maka ukonaula Baibolo.—Amalu. 73:28.
3. Nangu ca kuti imipepele iingi isambilisha ubufi, cinshi Lesa acingilila?
3 Yehova alicingilila ne cine icaba mu Cebo cakwe. Nangu ca kuti imipepele iingi mu calo fye conse isambilisha ifya bufi, tulatasha sana ukuti Lesa alitupeela icine icaba mu Baibolo kabili alatwafwa no kucumfwikisha! (Belengeni Amalumbo 43:3, 4.) Abantu abengi sana baba mu mfifi, lelo ifwe twaliba ne nsansa pantu twenda mu lubuuto ulo Lesa atupeela.—1 Yoh. 1:6, 7.
TWALIKWATA UBUPYANI UBWACINDAMA
4, 5. Bupyani nshi ubwacindama twapeelwa ukutula mu 1931?
4 Fwe Bena Kristu, twalikwata ubupyani ubwacindama. Dikishonari imo itila: “Ubupyani bwa calo mibele, intambi, nelyo imikalile iya muli ico calo iyo abafyashi basambilisha abana kufyalwa.” (Collins Cobuild English Dictionary) Mu bupyani bwesu ubwafuma kuli Lesa mwaba ukwishiba bwino bwino Icebo ca kwa Lesa, ukumfwikisha icine e lyo no kwishiba ubufwayo bwakwe. Kabili alitupeela no bupyani bumbi ubwacindama sana.
5 Ubu bupyani batupeele pa kulongana kwa citungu ukwa mu 1931 ukwali ku Columbus ku Ohio, ku U.S.A. Pali programu ya uku kulongana palembelwe ifilembo fya kuti “JW.” Nkashi umo atile: “Tatwaishibe bwino bwino ifyo ifi filembo fyalepilibula.” Twaleitwa ukuti Abasambi ba Baibolo, lelo pa Mulungu, pa 26 July mu 1931 twapeelwe ishina lya kuti Inte sha kwa Yehova (Jehovah’s Witnesses). Twalitemenwe icine cine ukulaitwa ili shina lya mu Baibolo. (Belengeni Esaya 43:12.) Munyina umo atile: “Nshakalabe ifyo twapundile no kutoota pali kulya kulongana.” Takwali imipepele imbi iyalefwaya ukubomfya ili shina, lelo pa myaka ukucila pali 80 iyo twabomfya ili shina, Lesa alitupaala. Ala mwandini lipaalo icine cine ukuba Inte sha kwa Yehova!
6. Malyashi nshi aya cine cine ayaba bupyani ubo Lesa atupeela?
6 Ubupyani na bumbi ubo Lesa atupeela, malyashi ya cine cine kabili ayacindama ayalanda pa babomfi ba kwa Lesa abaliko kale. Ku ca kumwenako, tontonkanyeni pali Abrahamu, Isaki na Yakobo. Aba baume bafwile balelanshanya ne ndupwa shabo pa fyo bengacita pa kuti balecita ifyo Yehova afwaya. E mulandu wine Yosefe akaanine ukucita ubulalelale pa kuti ‘ebembukila Lesa.’ (Ukute. 39:7-9) Mu nshita ya batumwa na mo, abantu pa kuti basambilile ifyo Abena Kristu basuminemo balebeba fye, e lyo limo balesambilila ku fyo Abena Kristu balecita. Ku ca kumwenako, umutumwa Paulo aebele ifilonganino fya Bena Kristu ifya kusefya Umulaalilo wa kwa Shikulu. (1 Kor. 11:2, 23) Muno nshiku, fyonse ifyo tukabila pa kuti tulepepa Lesa “mu mupashi na mu cine” fyalilembwa mu Cebo cakwe. (Belengeni Yohane 4:23, 24.) Ca cine ukuti Baibolo kuti ya-afwa abantu bonse, lelo fwe babomfi ba kwa Yehova tufwile ukutasha sana pali ubu bupe.
7. Bulayo nshi ubutusansamusha ubwaba mu bupyani bwesu?
7 Pa bupyani Lesa atupeela, paba na malyashi ayalanda pa fyo bamunyinefwe bapitamo ayaba mu mpapulo shesu ayalanga ukuti ‘Yehova aba na ifwe.’ (Amalu. 118:7) Aya malyashi yalenga tuleumfwa abacingililwa na lintu baletucusha. Ubulayo bumo ubutusansamusha ubo Yehova atulaya bwa kuti: “Icanso conse ico bakupangila tacakabombe, kabili ululimi lonse ulwakwimina mu bupingushi ukalwebaula. Ubu e bupyani bwa babomfi ba kwa Yehova, no bulungami bwabo bwafuma kuli ine.” (Esa. 54:17) Takwaba icanso nangu cimo ica kwa Satana icingatonaula umuyayaya.
8. Finshi twalasambilila muli cino cipande na mu cikonkelepo?
8 Satana alyesha ukonaula Icebo ca kwa Lesa, ukulofya ishina lya kwa Yehova no kuti abantu beishiba icine. Lelo te kuti alingane amaka na Yehova, e calenga no kuti afilwe. Muli cino cipande na mu cikonkelepo, twalasambilila (1) pa fyo Lesa acingilila Icebo cakwe; (2) pa fyo Yehova acingilila ishina lyakwe; na (3) pa fyo Shifwe wa ku muulu aba e Ntulo ya cine twasambilila ne fyo acicingilila.
YEHOVA ALICINGILILA ICEBO CAKWE
9-11. Finshi ifyacitika ifilanga ukuti Baibolo yalicingililwa ku balwani abengi?
9 Yehova alicingilila Icebo cakwe ku balwani abalefwaya ukuconaula. Icitabo cimo citila: “Mu 1229, Icilye ce calici ica ku Toulouse calikeenye abantu yaweyawe ukulabelenga [Baibolo mu ndimi sha cikaya] pantu tabalefwaya ukuti ifisambilisho fya bena Albigenses na bena Waldo fisalangane. . . . Na pa kukumana ukwaliko mu 1234 mu Tarragona, mu Spain, ukwatungulwilwe na James I, na po pene balikeenye abantu ukulabelenga Baibolo mu ndimi sha cikaya. . . . Umuku wa kubalilapo intungulushi shikalamba isha mwi calici lya Katolika shabindile ukupulinta no kukwata amaBaibolo mu ndimi sha cikaya ni mu 1559, ilyo Paul IV alandile ukuti takuli umuntu uufwile ukucita ifi ukwabula ukupoka insambu kwi Ofeshi lya Mushilo.”
10 Nangu ca kutila abantu balyesha ukonaula Baibolo, Yehova ali-icingilila. Nalimo mu mwaka wa 1382 John Wycliffe na banankwe balipilibwile Baibolo ya kubalilapo mu ciNgeleshi. Na umbi uwapilibwile Baibolo ni William Tyndale, uo baipeye mu 1536. Cashimikwa ukuti ilyo bamukakile ku cimuti apundile ati, “Mwe Shikulu, shibuleni amenso ya mfumu ya mu England.” Pa numa balimukulike no kumoca.
11 Baibolo yalicingililwa kuli bonse abashalefwaya ukuti ipilibulwe mu ndimi shimbi. Ku ca kumwenako, mu 1535, Miles Coverdale alipilibwile Baibolo mu ciNgeleshi. Pa kupilibula iyi Baibolo Coverdale abomfeshe Baibolo iyo Tyndale apilibwile iya “Icipingo Cipya” na “Icipingo ca Kale” umwali ibuuku lya Ukutendeka ukufika kwi buuku lya Imilandu. Apilibwile Amalembo yambi ukufuma mu ciLatini na muli Baibolo ya ciGerman iyapilibwile Martin Luther. Muno nshiku, tulatasha pa kukwata Baibolo ya Amalembo ya Calo Cipya pantu yalyanguka ukumfwa, yalipilibulwa bwino, kabili yalyanguka ukubomfya ilyo tuleshimikila. Tulasekelela pantu Satana nelyo abantu te kuti bonaule Icebo ca kwa Yehova.
YEHOVA ALICINGILILA ISHINA LYAKWE
12. Bushe Baibolo ya Amalembo ya Calo Cipya ya-afwa shani abantu ukwishiba ishina lya kwa Lesa?
12 Yehova alishininkisha ukuti ishina lyakwe lyatwalilila ukuba mu Cebo cakwe. Muli Baibolo ya Amalembo ya Calo Cipya, ili shina e mo lyaba. Mu mashiwi ya kutampilako, abali muli komiti ya kupilibula batile: “Umulimo wacindama sana uo ino Baibolo ibombele kubwesesha ishina lya kwa Lesa mu malembo ya mu Baibolo umo lifwile ukusangwa. Tubomfeshe ishiwi lya Cibemba ilyaishibikwa sana ilya kuti ‘Yehova’ imiku 6,973 mu Malembo ya ciHebere ne miku 237 mu Malembo ya ciGriki aya Bena Kristu.” Ino nshita, Baibolo ya Amalembo ya Calo Cipya yalipilibulwa mu ndimi ukucila pali 116 kabili amaBaibolo ukucila pali 178,545,862 yalipulintwa.
13. Mulandu nshi twingasosela ukuti abantu balishiba ishina lya kwa Lesa ukutula fye apo ababumbiile?
13 Abantu balishiba ishina lya kwa Lesa ukutula fye apo ababumbiile. Adamu na Efa balishibe ishina lya kwa Lesa kabili balishibe ne fya kulishimbula. Ilyo Hamu asaalwile Noa wishi, pa numa ya Lyeshi, Noa atile: “Acindikwe Yehova, Lesa wa kwa Shemu, lelo Kanaani [umwana wa kwa Hamu] ena abe umusha wakwe.” (Ukute. 4:1; 9:26) Lesa umwine atile: “Nine Yehova. Ilyo e shina lyandi; nshakapeele ubukata bwandi kuli umbi.” Na kabili atile: “Nine Yehova, kabili takwaba umbi. Takwaba Lesa umbi kano ine.” (Esa. 42:8; 45:5) Yehova alishininkisha ukuti ishina lyakwe lyacingililwa no kwishibikwa ku bantu mu calo. Ala lishuko nga nshi ukulabomfya ishina lya kwa Yehova no kuba Inte shakwe! Ciba kwati tulesosa ukuti: “Mwi shina lya kwa Lesa wesu e mo tukemisha insalu shesu apalembwa ifishibilo.”—Amalu. 20:5.
14. Ni kwi kumbi uko ishina lya kwa Lesa lisangwa?
14 Te mu Baibolo fye mweka musangwa ishina lya kwa Lesa. Ku ca kumwenako, lilasangwa na pe Libwe lya ku Moabu. Ili libwe balisangile ku Dhiban (Dibon), amakilomita 21 ku kabanga ka Bemba Wafwa. Pali ili libwe palembwa ilyashi ililanda pa Mfumu Omri iya bena Israele ne fyo Imfumu Mesha iya bena Moabu yalandile pa fyo yapondokele abena Israele. (1 Isha. 16:28; 2 Isha. 1:1; 3:4, 5) Ifyacindama sana ifyalembwa pali ili Libwe lya ku Moabu, lishina lya kwa Lesa ilyo balemba mu filembo fine YHWH, ifyo beta ukuti Tetragramatoni. Kabili ifi filembo filasangwa imiku iingi na pa fiinga ifyo basangile mu Israele ifyo beta ukuti Lachish Letters.
15. Bushe Septuagint ni cinshi, kabili yaishilebako shani?
15 Ababalilepo ukupilibula Baibolo nabo balibombeleko umulimo wa kucingilila ishina lya kwa Lesa. AbaYuda abengi tababwelelemo ku Yuda na ku Israele ilyo babalubwile muli bunkole ku Babiloni uko babasendele ukutula mu 607 B.C.E. ukufika mu 537 B.C.E. Ilyo calefika muli ba 200 B.C.E., abaYuda abengi baleikala mu Alexandria, mu Egupti, kabili balefwaya ukuti Amalembo ya ciHebere yapilibulwe mu ciGriki pantu e lulimi abantu abengi balelanda sana. Aya Amalembo ya ciGriki bapwile ukuyapilibula muli ba 100 B.C.E., kabili bayeta ukuti Septuagint. Mu Malembo yamo aya Septuagint mwaliba ishina lya kwa Yehova mu ciHebere.
16. Landeni apo babomfya ishina lya kwa Lesa mu citabo babalilepo ukulemba mu 1640.
16 Ishina lya kwa Lesa lilasangwa na mu citabo ca Bay Psalm Book, ico babalilepo ukusabankanya mu fyalo fya ku America ifyaletekwa ne calo ca England. Icitabo ca Bay Psalm Book ico babalilepo ukulemba ico bapulintile mu 1640, mwalembelwe fye ibuuku lya Amalumbo ilyo bapilibwile ukufuma mu ciHebere ukutwala mu ciNgeleshi ico balelanda pali ilya nshita. Icikomo cimo apaba ishina lya kwa Lesa ni pa Amalumbo 1:1, 2, apatila, “umuntu uwapaalwa” tenda mu mano ayapanda ababifi, “lelo atemwa amafunde ya kwa Iehovah (Yehova).” Nga mulefwaya ukwishiba na fimbi pe shina lya kwa Lesa, belengeni broshuwa itila Ishina lya Bulesa Ilikatwalilila Kuli Pe na Pe.
YEHOVA ALICINGILILA ICINE
17, 18. (a) Bushe ishiwi lya kuti “icine” lyalola mwi? (b) Finshi fyaba mu “cine ca mbila nsuma”?
17 Tulasekelela ukubombela ‘Yehova Lesa wa cine.’ (Amala. 7:9) Bushe icine ni cinshi? Mu ndimi isho Baibolo yalembelwemo, ishiwi ilyo bapilibula ukuti “icine” lilosha ku cintu ica cishinka, ico twingacetekela nelyo icalungama.
18 Yehova alicingilila icine kabili alilenga no kuti tuleishibilako icine. (2 Yoh. 1, 2) Tulaya tuleumfwikisha icine panono panono pantu “inshila ya balungami yaba ngo lubuuto lwa lucelo uluya lulebuutilako fye ukufikila akasuba kasaama”! (Amapi. 4:18) Tulasuminisha ku mashiwi Yesu alandile ilyo apepele kuli Lesa ukuti: “Icebo cenu e cine.” (Yoh. 17:17) Mu Cebo ca kwa Lesa musangwa “icine ca mbila nsuma,” umwaba amasambililo yonse ayo fwe Bena Kristu twasuminamo. (Gal. 2:14) Pali aya masambililo paba, icine pe shina lya kwa Yehova, bumulopwe bwakwe, ilambo lya kwa Yesu, ukubuuka, e lyo na Ubufumu. Lekeni nomba tumone ifyo Lesa aacingilila icine nangu ca kutila Satana tafwaya ukuti abantu bacishibe.
YEHOVA ALIFULUNGANYA AMAPANGE YA KWA SATANA AYA KUTI ABANTU BEISHIBA ICINE
19, 20. Bushe Nimrode ali nani, kabili finshi abantu bafwaile ukucita ilyo aleteka?
19 Pa numa ya Lyeshi, kwaliko insoselo imo abantu balelanda, baleti: “Kwati fye ni Nimrode umubamfi wa maka uwalelwisha Yehova.” (Ukute. 10:9) Nimrode uwalelwisha Yehova, alepepa Satana kabili ali fye cimo cine nga balwani abo Yesu aebele ati: “Imwe shinwe ni Satana Kaseebanya, kabili mufwaya ukucita ifya lunkumbwa fya kwa shinwe. Ulya . . . tatwalilile mu cine.”—Yoh. 8:44.
20 Nimrode aleteka Babele ne misumba imbi iyali pa kati ka mumana wa Tigrisi na Yufrate. (Ukute. 10:10) Nalimo e watendeke ukukuula umusumba wa Babele no lupungu, kabili bafwile batendeke ukukuula mu 2269 B.C.E. Yehova alefwaya abantu ukusalangana pe sonde ponse, lelo abalekuula ulupungu bena batile: “Aleni! Natuikuulile umusumba no lupungu ulutali ulwa kuti lufike na ku muulu, kabili natuipangile ishina, epali twasalanganina pano isonde ponse.” Lelo ipange lyabo talyabombele pantu Lesa ‘alifulungenye ululimi lwa pano isonde ponse’ no kusalanganya abalekuula ulupungu. (Ukute. 11:1-4, 8, 9) Satana alefwaya ukonaula ukupepa kwa cine pa kuti abantu bonse balemupepa, lelo Yehova alicingilile ukupepa kwa cine. Ukutula fye na kale, abantu balitwalilila ukupepa Yehova kabili balafulilako cila bushiku.
21, 22. (a) Mulandu nshi ukupepa kwa bufi kushacimfisha ukupepa kwa cine? (b) Finshi tukasambilila mu cipande cikonkelepo?
21 Ukupepa kwa bufi takwatala akucimfya ukupepa kwa cine. Mulandu nshi? Pantu Kasambilisha wesu Uwapulamo alicingilila Icebo cakwe, alilenga abantu ukwishiba ishina lyakwe, no kwishiba icine. (Esa. 30:20, 21) Ukupepa Lesa mu cine kulalenga tulesekelela. Lelo pa kumupepa mu cine tufwile ukutwalilila ukuba abalola, ukushintilila pali Yehova no kulakonka ifyo umupashi wakwe uwa mushilo ututungulula.
22 Mu cipande cikonkelepo, tukasambilila pa fyo ifisambilisho fya bufi fyatendeke. Tukamona no kuti ifi fisambilisho te fyo Baibolo isambilisha. Na kabili tukasambilila ne fyo Yehova aalenga twaishiba icine pali ena, icaba bupyani bwesu ubwacindama sana.
[Ifipusho]
[Ifikope pe bula 4]
Twalitemenwe sana ilyo batupeele ishina lya kuti Inte sha kwa Yehova pa kulongana kwa citungu mu 1931
[Icikope pe bula 5]
Abaume pamo nga Tyndale bafwilile pa Cebo ca kwa Lesa
[Abatusuminishe]
From Foxe’s Book of Martyrs
