Apo “Mwalishiba Lesa” Finshi Fimbi Ifyo Mufwile Ukucita?
Apo “Mwalishiba Lesa” Finshi Fimbi Ifyo Mufwile Ukucita?
“Mwalishiba Lesa.”—GAL. 4:9.
KUTI MWAYASUKA SHANI?
Mulandu nshi cacindamina ukulaiceeceeta mu nshita mu nshita?
Mulandu nshi Abena Kristu abakosoka nabo bafwile ukutwalilila ukulalunduluka?
Mulandu nshi tufwile ukulatontonkanishisha pa citetekelo cesu na pa kuipeela kwesu kuli Yehova?
1. Mulandu nshi kensha wa ndeke akonkela ifyalembwa pa mutande ilyo aleceeceeta indeke?
LYONSE ilyo indeke ishilaima, kensha wa ndeke alaiceeceeta. Alaceeceeta ifintu 30 ifyaba pa mutande uo bakonka pa kuceeceeta indeke. Nga ca kutila kensha wa ndeke taceeceetele bwino indeke ilyo ishilaima, kuti kwacitika ubusanso ubwabipa sana. Bushe muletontonkanya ukuti ni kensha wa ndeke uwa musango nshi uo bakoselesha sana ukuceeceeta fyonse ilyo indeke ishilaima? Ni ulya uwaensha indeke pa myaka iingi! Kensha wa ndeke uwaensha pa myaka iingi nalimo kuti aba no muleele wa kuceeceeta fyonse ilyo indeke ishilaima.
2. Finshi ifyo fwe Bena Kristu tulingile ukuiceeceetamo?
2 Nga filya fine kensha wa ndeke uwabika amano ku mulimo wakwe aceeceeta indeke lyonse, na imwe bene mufwile ukulaiceeceeta pa kuti mwingaba ne citetekelo icakosa icingamwafwa na lintu mwaba na mafya. Nampo nga mwabatishiwe nomba line atemwa kale mwabatishiwa, calicindama lyonse ukulaceeceeta ifyo icitetekelo cenu caba ne fyo mubombela Yehova Lesa. Nga tatuleiceeceeta lyonse kuti calenga twaleka ukuba ifibusa fya kwa Lesa. Baibolo itusoka ukuti: “Uuletila naiminina ndi acenjele epali awa.”—1 Kor. 10:12.
3. Finshi Abena Kristu mu Galatia balekabila ukucita?
3 Abena Kristu abali mu Galatia balekabila ukuceeceeta ifyo icitetekelo cabo cakosele no kwishiba ubuntungwa ubo Lesa abapeele. Ilambo lya cilubula ilya kwa Yesu lyalengele ukuti bonse abamucetekele beshibe Lesa mu nshila iyaibela, e kutila baali no kuba abana ba kwa Lesa! (Gal. 4:9) Pa kuti batwalilile ukuba abana ba kwa Lesa, abena Galatia balekabila ukukaana ifisambilisho fya baYuda abalepatikisha abantu ukulakonka Amafunde ya kwa Mose. Na kuba, abena Fyalo abashasembulwilwe abali mu cilonganino ca Bena Kristu tababalile abakonkapo Amafunde ya kwa Mose! AbaYuda kumo na bena Fyalo balekabila ukwishiba bwino icine. Ici calolele mu kuti balingile ukwishiba ukuti pa kuba abalungama tabalekabila ukulakonka Amafunde ya kwa Mose.
IFYO TWACITILE PA KWISHIBA LESA
4, 5. Finshi Paulo afundile abena Galatia, kabili cinshi uku kufunda kwacindamina kuli ifwe?
4 Ifyo umutumwa Paulo afundile abena Galatia fyalilembelwe mu Baibolo pa kuti Abena Kristu ba cine tabasuulile icine icacindama ico basambilila muli Baibolo na pa kuti tababwelele ku fya kale. Ifyo Yehova aebele umutumwa Paulo ukulemba filakoselesha fwe Bena Kristu bonse ukutwalilila ukuba ne citetekelo icakosa.
5 Ifwe bonse tufwile ukulaibukisha ifyo twasambilile icine no kuba Inte sha kwa Yehova. Tontonkanyeni pali aya mepusho yabili: Bushe muleibukisha ifyo mwacitile pa kuti mufikepo ukubatishiwa? Bushe muleibukisha ifyo mwacitile pa kwishiba Lesa ne fyo mwaumfwile ilyo mwaishibikwe kuli Lesa?
6. Finshi twingabomfya pa kuiceeceeta ifyo twalalandapo?
6 Kwali ifintu 9 ifyo twacitile pa kuti twishibe Lesa. Ifi fintu fili mu kabokoshi akaleti “Ifyo Twacitile pa Kuti Tubatishiwe Kabili Ifingatwafwa Ukulalunduluka.” Nga ca kutila lyonse tuletontonkanya pali ifi fintu 9 no kulaiceeceeta, ninshi te kuti tubwelele ku fintu twasha mu calo. Nga filya fine uwensha indeke lyonse aceeceeta indeke ilyo ishilaima, e fyo na ifwe tufwile ukulaiceeceeta pa kuti tutwalilile ukubombela Lesa ne cishinka.
ABAISHIBIKWA KULI LESA BALATWALILILA UKULUNDULUKA
7. Cipasho nshi tulingile ukukonka, kabili mulandu nshi?
7 Umutande uo kensha wa ndeke akwata ulamwibukishako ukuti lyonse ilyo ashilatendeka ukwensha indeke afwile ukuceeceeta bwino bwino fyonse ifili pa mutande. Na ifwe bene tufwile lyonse ukulaibebeta, nelyo ukulaiceeceeta no kumona ifyo tubomba ukutula apo twabatishiwilwa. Paulo alembeele Timote ukuti: “Uleikatisha icipasho ca mashiwi ayatuntulu ayo waumfwile kuli ine. Uleyekatisha ne citetekelo no kutemwa ifyaba muli Kristu Yesu.” (2 Tim. 1:13) “Amashiwi ayatuntulu” yaba mu Cebo ca kwa Lesa. (1 Tim. 6:3) Nga twalolesha pa cikope ico umo alengele, tuleshiba ifyo ico cintu cimoneka. E fyo ne ‘cipasho ca cine’ caba, cilalenga twaishiba no kulacita ifyo Yehova afwaya. E ico, twalasambilila pa fintu ifyo twacitile pa kuti tubatishiwe no kumona nga ca kuti tulakonka icipasho ca cine.
8, 9. (a) Mulandu nshi tufwile ukutwalilila ukulaishibilako Lesa ne citetekelo cesu ukulakulilako? (b) Langilileni ifyo ukulunduluka kwacindamina no mulandu tufwile ukutwalilila ukulalunduluka.
8 Ica kubalilapo ico twacitile, kwishiba Lesa. Ukwishiba Lesa kwalengele ukuti tube ne citetekelo. Lelo tufwile ukulaishibilako Lesa kabili icitetekelo na co cifwile ukulakulilako. (2 Tes. 1:3) Pa kukula, kulaba ukwaluka mu fingi. Kanshi ilyo twabatishiwa, tulingile ukutwalilila ukulalunduluka pa kuti bucibusa bwesu na Lesa bulekulilako.
9 Kuti twapashanya bucibusa bwesu na Lesa kuli filya umuti ukula. Umuti kuti wakula sana, maka maka nga ca kuti imishila yaliya pa nshi nelyo ingi. Ku ca kumwenako, imikedari imo iya ku Lebanone ilakula sana, ilalepa ica kutila kuti yalingana ne cikuulwa ica ntunti 12 kabili mu bufumo iba amamita 12, e lyo imishila na yo ilaya pa nshi sana. (Ulwimbo 5:15) Pa kubala, umuti ulakula bwangu, lelo mu kuya kwa nshita ulaleka ukumoneka ukuti ulekula. Cila mwaka, umuti ulakulilako, imishila ilaya ileingila pa nshi no kusalangana mu mushili ica kuti umuti ulakosa icine cine. Ifi fine e fyo no kukula kwa Mwina Kristu mu fya kwa Lesa kwaba. Ilyo twatendeka ukusambilila Baibolo kuti twalunduluka bwangu bwangu no kubatishiwa. Bonse mu cilonganino balamona ifyo tulelunduluka kabili balatemwa. Nalimo kuti twatendeka na bupainiya nelyo ukubombako imilimo imbi mu cilonganino. Ilyo imyaka ilepita, nalimo abantu te kuti balemona ukuti tulelunduluka. Na lyo line, icitetekelo cesu cifwile ukulakulilako kabili tufwile ukulaishibilako Lesa mpaka twaba nga “bakalamba, ukufika ku ciimo ca kwa Kristu.” (Efes. 4:13) Kanshi filya fine umuti uunono ukula mpaka waba umuti uukalamba kabili uwakosa, e fyo na ifwe tukula no kuba Abena Kristu bakosa.
10. Mulandu nshi cacindamina na ku Bena Kristu bakosoka ukulalunduluka?
10 Ici tacilolele mu kuti nga twaba Abena Kristu bakosoka ninshi tulingile ukuleka ukulunduluka. Tufwile ukutwalilila ukwishiba Icebo ca kwa Lesa kabili icitetekelo cesu cifwile ukulakoselako. Nga tulecita ifi tukaba abakosa nga nshi, nga filya fine umuti ukosa imishila nga yalingila sana mu mushili. (Amapi. 12:3) Mu cilonganino, mwaliba bamunyinefwe na bankashi abengi abatwalilila ukulunduluka. Ku ca kumwenako, munyinefwe umo uwabomba bueluda pa myaka ukucila pali 30 atile acili alekula mu fya kwa Lesa. Atile: “Pali ino nshita, nalishiba ifingi ifya mu Baibolo ukucila ifyo naishibe kale. Lyonse ndasambililamo amafunde ayapya ne fishinte ifyo momfya mu nshila ishalekanalekana. Ndaya ndetemenwako fye umulimo wa kushimikila.”
TWALILILENI UKULAKOSHA BUCIBUSA BWENU NA LESA
11. Finshi tufwile ukulacita pa kuti tutwalilile ukulaishiba Yehova bwino?
11 Pa kuti tulunduluke, tufwile no kulapalama kuli Yehova nga Cibusa wesu kabili nga Shifwe. Afwaya tuleumfwa ukuti twalicingililwa no kuti alitutemwa, nga filya umwana omfwa nga ca kuti umufyashi uwamutemwa namukumbatila nelyo filya tumfwa nga tuli na cibusa wesu uo twacetekela. Nga fintu mwaishiba, palapita inshita pa kuti tube na bucibusa bwa musango uyu na Yehova, pantu pa kuti tumwishibe no kumutemwa pafwile ukupita inshita. Kanshi pa kuti mwishibe bwino Yehova, mufwile ukulalubula inshita iya kubelenga Icebo cakwe cila bushiku. Kabili mulebelenga na magazini yonse iya Ulupungu lwa kwa Kalinda na Loleni! ne mpapulo shimbi.
12. Cinshi icacindama ico tufwile ukulacita pa kuti Yehova atwishibe?
12 Ukupepa ukufuma pa nshi ya mutima no kula-ampana pamo na bantu abasuma kuti kwalenga bucibusa bwesu na Lesa ukukoselako. (Belengeni Malaki 3:16.) “Amatwi [ya kwa Yehova] yomfwa ukupapaata kwabo.” (1 Pet. 3:12) Nga filya fine umufyashi acita, Yehova alakutika ilyo tulelilila kuli ena mwi pepo. Kanshi tufwile ukuba “no mute wa kupepa.” (Rom. 12:12) Pa kuti tube Abena Kristu bakosoka, kano Lesa atwafwa. Amafya yaba muli cino calo yalifula sana ica kuti te kuti tuyacimfye ku maka yesu. Nga twaleka ukulapepa lyonse, Lesa te kuti aletupeela amaka ayalenga ukuti tube abakosa. Bushe mulemona ukuti amapepo yenu yaliba fye bwino nelyo mulemona ukuti mufwile ukuwamyako amapepo mupepa?—Yer. 16:19.
13. Mulandu nshi ukwampana pamo na Bena Kristu banensu kwacindamina pa kuti bucibusa bwesu na Lesa bukose?
13 Yehova alitemwa bonse “abooba muli ena”; kanshi na lintu twaishiba Lesa, tufwile ukutwalilila ukula-ampana pamo na bantu abamwishiba. (Nahu. 1:7) Apo muno calo mwaliba ifintu ifingi ifyabipa, calicindama ukulaba na ba bwananyina abengatukoselesha. Busuma nshi bwaba mu kuba na ba bwananyina? Mu cilonganino mwaliba bamunyinefwe abatucincisha “ku kutemwa kabili ku kubomba imilimo iisuma.” (Heb. 10:24, 25) Pa kuti tulange ukutemwa uko Paulo alandilepo muli kalata alembeele abaHebere, tufwile ukulaba pamo na ba bwananyina, abatontonkanya cimo cine, ababa mu cilonganino. Kanshi mufwile ukulasangwa mu kulongana lyonse no kwasukapo.
14. Mulandu nshi lyonse tufwile ukuitemenwa ukulapila no kwaluka?
14 Pa kuti tube Abena Kristu, twalilapiile no kwaluka, e kutila twalilekele ukucita imembu. Lelo tufwile ukutwalilila ukulapila. Apo tatwapwililika, tucili twalikwata ulubembu ulwaba kwati ni nsoka iipekenye ukutusuma. (Rom. 3:9, 10; 6:12-14) Kanshi tufwile ukuba abalola, tatufwile ukusuulako fye ku mibele iyabipa iyo tucita. Icawama ca kuti Yehova alatutekanishisha ilyo tulelwisha ukuleka imibele iyabipa iyo twakwata na lintu tule-esha ukwaluka. (Fil. 2:12; 2 Pet. 3:9) Icikalamba icingatwafwa ukuleka imibele yabipa kulabomfya inshita yesu na maka mu mulimo wa kwa Yehova ukucila ku fintu ifyo imitima yesu ifwaya. Nkashi umo atile: “Nakuliile mu lupwa lwa Bena Kristu, lelo ifyo naishibe pali Yehova fyalipusene ne fyo bambi bamwishiba. Naishibe ukuti mfwile ukulamutiina sana, kabili nalemona kwati nshakatale ncita ifikalenga ena ukusekelela.” Mu kuya kwa nshita, uyu nkashi alilekele ukubombela Lesa bwino kabili alilufyenye. Atile: “Te kutila nshatemenwe Yehova, lelo icalengele ndeke ukumubombela ni co nshamwishibe bwino. Nomba pa numa ya kupepa imiku iingi, nalitendeke ukwaluka.” Alandile no kuti: “Naishilemona ukuti Yehova alentungulula ngo mwana umunono, alengafwa lyonse ilyo nakwata ubwafya, ali ne cikuuku kuli ine, kabili alenanga ne fyo mfwile ukucita.”
15. Finshi ifyo Yesu na Wishi baishiba pali ifwe?
15 “Twalilileni ukweba abantu” imbila nsuma. Aya e mashiwi malaika wa kwa Lesa aebele Petro na batumwa bambi ilyo bafumine mu cifungo mu cipesha amano. (Imil. 5:19-21) Cimbi ico tufwile ukuiceeceetamo, kumona nga tulabombako umulimo wa kushimikila cila mulungu. Yesu na Wishi balishiba ifyo icitetekelo cesu caba ne fyo tubomba umulimo wa kushimikila. (Ukus. 2:19) Eluda uo tulandilepo atile: “Umulimo wa kushimikila e mulimo ukalamba uo tufwile ukubomba.”
16. Mulandu nshi cawamina ukulatontonkanya pa kuipeela kwesu kuli Yehova?
16 Muletontonkanya pa kuipeela kwenu. Bucibusa bwesu na Yehova e cintu icacindama sana ico twakwata. Yehova alishiba abakwe. (Belengeni Esaya 44:5.) Ibebeteni no kumona ifyo bucibusa bwenu na Yehova bwaba ne fyo bwakosa. Cimbi ico mufwile ukucita, kulaibukisha ubushiku bwacindama ubo mwabatishiwepo. Ukucita ifi kukalamwafwa ukulaibukisha ukuti ukubatishiwa e cintu icacindama sana ico mwacita mu bumi bwenu.
UKUSHIPIKISHA KULATWAFWA UKUTWALILILA UKUBA IFIBUSA NA YEHOVA
17. Mulandu nshi ukushipikisha kwacindamina pa kuti tube ifibusa fya kwa Yehova?
17 Ilyo Paulo alembeele abena Galatia kalata, alandile pa fyo ukushipikisha kwacindama. (Gal. 6:9) Abena Kristu nabo muno nshiku bafwile ukushipikisha. Mukakwata amafya, lelo Yehova akamwafwa. Lyonse mulelomba umupashi wa mushilo. Ukucita ifi kukalenga mukalesekelela no kuba no mutende na lintu muli na mafya. (Mat. 7:7-11) Taleni tontonkanyeni pali ici: Nga ca kuti Yehova alasakamana ifyuni, bushe kuti akaana ukusakamana imwe mwe bamutemwa kabili abaipeela kuli ena? (Mat. 10:29-31) Kanshi nangu mukwate amafya ya musango nshi, te kwesha ukubwelela inuma, kabili te kwesha ukunenuka. Ala mwandini Yehova alatupaala nga nshi pantu twalishibikwa kuli ena!
18. Apo “mwalishiba Lesa,” finshi nomba mulefwaya ukucita?
18 Nga ca kuti ni nomba line mwishibe Lesa kabili mwalibatishiwa, finshi fimbi ifyo mufwile ukucita? Twalilileni ukwishiba Yehova bwino bwino, no kutwalilila ukulunduluka. Inga ca kuti ni kale mwabatishiwa, finshi fimbi ifyo mufwile ukucita? Na imwe bene mufwile ukutwalilila ukwishibilapo na fimbi pali Yehova. Mwilaimona kwati mwalishiba ifingi pali Yehova ica kuti tamukabila ukwishibilapo na fimbi. Lelo ifwe bonse tufwile ukulaibebeta cila nshita pa kuti tutwalilile ukulundulula bucibusa bwesu na Shifwe, Umunensu, kabili Lesa wesu, Yehova.—Belengeni 2 Abena Korinti 13:5, 6.
[Ifipusho]
