Ukukuula Amayanda ya Kupepelamo Yehova

“We cintu ulawama. Nshaletontonkanya ukuti tukakwatapo ing’anda yawame fi iya kupepelamo Yehova. Nangu ningakwata indalama shafula shani, te kuti mbe ne nsansa nga shino nkwete!”—E FYASOSELE BA MARIA ABEKALA KU MEXICO.

INTE SHA KWA YEHOVA balitemwa ukulongana no kusambilila pamo Icebo ca kwa Lesa, Baibolo. (Amalumbo 27:4; AbaHebere 10:23-25) Kabili balomfwa bwino sana nga balepepela mu mayanda ayasuma, ayalinga ukupepelamo. Mu myaka fye iinono iyapita balikuula amayanda ya kupepelamo ayengi nga nshi, mu fyalo ifingi mwi sonde lyonse, kabili aya mayanda bayeta ati Amayanda ya Bufumu.

Cinshi calenga ukuti balekuula amayanda ya kupepelamo yonse aya? Ni bani babomfya pa kukuula? Kabili busuma nshi abakuula basanga muli uyu mulimo? Pa kuti mwishibe ifyo uyu mulimo ubombeka, umfweni ifilecitika ku calo ca Mexico ne ca Belize.

Baalekabila Amayanda ya Bufumu Ayengi Sana!

Kale, baNte ba ku Mexico balelonganina fye apali ponse apo balesanga incende. Limo balelonganina ku lukungu lwa ng’anda, mu mayanda ya baNte, mu fikuulwa umo basungila ifipe, e lyo na mulya basungila imyotoka. Kabili limo balesonkela fye ifikuulwa. Pali iyi nshita, baNte ba cishinka bale-elenganya fye ifyo cingawama ukulapepela mu Mayanda ya Bufumu ayabo.

Ilyo umwaka wa 1994 walefika, mu Mexico mwali baNte 388,000. Ulya wine mwaka, abalolekesha pa mulimo wa kukuula Amayanda ya Bufumu basangile ukuti, pa kuti baNte bonse bakakwate umwa kupepela, balekabila ukukuula Amayanda ya Bufumu ayapya 3,300. We mulimo ulakula!

Ilya nshita baNte mu filonganino fimo fimo abalekwanisha baleikuulila Amayanda ya Bufumu. Lelo pa myaka isano iyakonkelepo, abalelolekesha pa mulimo wa kukuula balimwene ukuti Amayanda ya Bufumu ayengi nga nshi yalefwaikwa, kabili twalekabila ukuyakuula bwangu bwangu. Baacita shani pa kuti uyu mulimo ubombeke?

Kwaliba Abaishiba Ukukuula Abaipelesha

Mu 1999 abalolekesha pa mulimo wa kukuula bapangile amabumba yalekanalekana aya bakukuula Amayanda ya Bufumu mu Mexico. Inte sha kwa Yehova mu calo ca Mexico abaishiba imilimo ya kukuula, baliipeleshe ukubombako uyu mulimo usuma nga nshi. Pali ino nshita mu Mexico mwaba amabumba 35 aya bakuula Amayanda ya Bufumu, e lyo na ku Belize kwaliba ibumba limo.

Muli aya mabumba ya bakuula Amayanda ya Bufumu ilingi muba fye abantu napamo 8, abaume na banakashi, abaipelesha ukubomba ukwabula ukubalipila. Aba bantu ba nsansa baya mu  fifulo fyalekanalekana mu Mexico ku kukuula Amayanda ya Bufumu no kusambilisha bambi ifya kukuula. Bonse ababa muli aya mabumba babomba ama-awala 8 cila bushiku ukutula fye pali Cimo ukufika pali Cisano, kabili limo balabomba na pa Cibelushi. Ico babalilapo ukucita ulucelo, kubelenga ilembo limo ilya mu Baibolo pa 7 koloko, kabili pa numa balalya umwikulo. Bonse fye balakonka ifyo babeba ukucita ku balelolekesha pa bukuule. Nangu fye banakashi na bo bene babombela fye pamo na baume mu milimo ya kushingula, ukuwamya pa nshi e lyo kupenta.

Aba mu cilonganino ico balekuulila Ing’anda ya Bufumu balasakamana abalekuula. Balabafwaila umwa kusendama, ukubacapila ifya kufwala, no kubepikila ifya kulya. Aba muli ico cilonganino balaipakisha ukupepela pamo na balekuula no kulaya mu kushimikila abantu icebo mu mayanda bekala.

Ubusuma Bwaba Muli uyu Mulimo

Bushe abakuula Amayanda ya Bufumu bomfwa shani pali uyu mulimo? Ba Daniel ababomba uyu mulimo ukucila pa myaka itatu batila: “Kwena ca cine ukutila limo tubombela mu kasuba kabili limo nalyo kulatalala sana, e lyo tulya ifya kulya ifyo tushabelesha, kabili cila nshita tulaba pa lwendo. Kabili tulasha balupwa lwesu, e lyo limo tatukwata ifintu fimo. Nomba ubusuma tusanga mu mulimo wa kukuula bwingi icine cine ica kuti cimoneka fye kwati aya mafya tapaba.”

Busuma nshi bumo bumo ubo abakuula basangamo? Abengi ababombako uyu mulimo balasambilila imilimo na imbi. Lelo ba Carlos abalolekesha pe bumba limo ilikalamba ilya bakuula Amayanda ya Bufumu balanda pa co bena bamona ukuti e cisuma sana ico basangamo. Batila: “Caba kwati ifwe bonse 20 twaba nga bana bankashi pantu tuliila pamo, tubombela pamo, tusambilila pamo ifya mu Baibolo, no kupepela pamo. Tulomfwana icine cine.”

Abakuula Amayanda ya Bufumu na kabili balapanga icibusa cakosa na bo basanga mu filonganino. Nangu fye ni ba José, ababombako umulimo wa kukuula Amayanda ya Bufumu ukucila pali 100 batila: “Cilawama ukumona ifyo bamunyinefwe batemwa no kulukusha ifilamba ku nsansa ilyo bamona Ing’anda ya Bufumu iyo balefwaisha yakuulwa.” Basosele no kuti: “Tulaba ne nsansa ilyo twamona ukuti icitetekelo ca bantu bambi cilakoselako pa mulandu fye wa mulimo uunono untu twabombeleko pa kukuula ing’anda ya kupepelamo Yehova.”

Umulimo Baabomba wa Kupapa!

Aya mayanda ya kupepelamo tayapikana iyo kabili te ya lulumbi, kanshi cilanguka ukuyakuula bwangu kabili ukwabula ukupoosapo indalama ishingi. Ku ncende balekuulila nga kwaliba ifya kukuulila, e fyo babomfya. Ici cilenga ukuti ing’anda ikuulwe mu milungu napamo 6 fye!

Lintu umwaka wa 2007 wafikile, ifilonganino fyonse ifya mu Belize fyalikwete Amayanda ya Bufumu ayapya, kabili yonse pamo yali 17. Mu Mexico na mo amayanda ukucila pali 1,400 yalikuulwa ukutula mu 1999!

 Nangu ca kuti Amayanda ya Bufumu ayakuulwa yengi, kucili na yambi ayalekabilwa. (Mateo 9:37) Pali ino nshita baNte mu Mexico balicila 600,000, kabili aba bonse balalongana imiku itatu cila mulungu ku kusambilila Icebo ca kwa Lesa. E ico amayanda napamo 2,000 aya kupepelamo yacili yalekabilwa. Kwena amayanda yonse aya nga tayakuulwa nga ca kuti uyu mulimo wa bantu fye abene. Lelo nga twamona amayanda ubwingi yalekuulwa, tulasumina ukuti cine cine Yehova Lesa ‘e ucita ifintu fyonse.’—Mateo 19:26.

[Akabokoshi ne Cikope pe bula 22]

“Balacita Ifyo Balanda”

Ilyo Inte sha kwa Yehova shilekuula Amayanda ya Bufumu, na bantu fye bambi balakoseleshiwa. Umfweni icacitike: Ilyo baNte balekuula Ing’anda ya Bufumu ku Belize, umwaume umo uo umukashi wakwe apepa ku calici ca Pentecostal, aebele umukashi wakwe ukuti ilyo baNte bakapwisha ukukuula “icalici” lyabo, akatendeka ukulapepa na bo. Cinshi calengele alande fi? Atile: “Nimona ukuti aba, bantu ba kwa Lesa. Tabakansana ilyo balebombela capamo. Kabili balacita ifyo balanda.”

[Icikope]

Ing’anda ya Bufumu mwi tauni lya Orange Walk, ku Belize

[Akabokoshi/Fikope pe bula 23]

Ubu Bukuule Buli mu Calo Conse

Amabumba ya bakuula Amayanda ya Bufumu yaliteyanishiwa mu fyalo 120. Pe samba pali ifyalo ifinono umwaba abaipeelesha ukukuula Amayanda ya Bufumu:

Angola, Bolivia, Croatia, Dominican Republic, Ethiopia, Fiji, Ghana, Hong Kong, India, Jamaica, Kazakhstan, Liberia, Moldova, Nigeria, Papua New Guinea, Rwanda, Tuvalu, Ukraine, Venezuela, Zambia.

[Ifikope]

Ing’anda ya Bufumu mu Acapulco, ku Mexico

Abakuula Amayanda ya Bufumu mu Mexico

[Icikope pe bula 23]

Ing’anda ya Bufumu mu musumba wa Tlaxcala, ku Mexico