Bushe Icitetekelo Cinshi?

KUTI mwalondolola shani icitetekelo? Bamo batila icitetekelo kucetekela fye ifintu fyonse ifyo bakweba nangu taufishibe na bwino bwino. Umwina America umo uwaishibikwa sana mu kulemba utumalyashi utusuma kabili uulemba na malyashi pa ficitika mu calo, H. L. Mencken inshita imo atile icitetekelo “kusumina mu cintu ico ushishibe bwino bwino nga ca cine nelyo iyo ukutila cikacitika nangu cibe shani.”

Lelo Baibolo tailanda ukuti ukuba ne citetekelo kusumina icintu icisuminesumine nelyo ukusumina mu fishingacitika. Icebo ca kwa Lesa citila: “Icitetekelo kulolela kwashininkishiwa ukwa kuti ifintu tulesubila fikacitika, kabili e bushininkisho bwa kuti ifintu nangu tafilamoneka, fya cine cine.”—AbaHebere 11:1.

Apo abantu balalanda ifyapusanapusana pa citetekelo, natulande pa mepusho yakonkapo:

• Bushe ifyo Baibolo ilondolola icitetekelo fyapusana shani ne fyo abengi balanda ukuti e fyo icitetekelo caba?

• Mulandu nshi cacindamina ukutila tukwate icitetekelo ico Baibolo yalandapo?

• Bushe kuti mwakosha shani icitetekelo cenu?

Ubushininkisho Ubwaishibikwa

Pa nshita balelemba ibuuku lya mu Baibolo ilya AbaHebere, balebomfya sana ishiwi lya ciGriki ilyo balepilibula ati “ukulolela kwashininkishiwa.” Ilingi line ili ishiwi lyalelembwa mu mapepala ya fipangano fya makwebo kabili lyalelenga uushitile ashininkisha ukuti cine cine icipe ashita caba cakwe. E mulandu wine icitabo cimo citila ilembo lya AbaHebere 11:1 kuti lyapilibulwa ukuti: “Icitetekelo caba bushininkisho bwine bwine ubwa kuti ifyo umuntu ale-enekela fikacitika.”

Nga ca kuti mwalishitapo icipe ku kampani kamo ako mwacetekela sana e lyo mwalelolela ukuti bamuletele ico cipe pa ng’anda, ninshi mwalilangile icitetekelo. Icipepala bamupeele apo mwashitiile ico cipe ku kampani calengele ukuti mucetekele akampani uko mwashitile icipe. Kanshi kuti twatila icipepala bamupeele ilyo mwashitile icipe, e calengele mushininkishe ukuti mukapokelela ico cipe mwashitile. Nga ca kuti mwalilufishe icipepala mwashitiilepo nelyo nga mwalipoosele, ninshi nga tamwakwete ubushininkisho bwa kuti mwalishitile ico cipe. E fyo caba kuli balya abakwata icitetekelo muli Lesa no kulolela ukuti akafikilisha ifyo abalaya kabili abashininkisha ukuti nangu cibe shani fikacitika. Lelo balya abashakwata icitetekelo bena, e lyo na balya abo icitetekelo capwa, baba kwati balilufya icipepala bashitilepo icipe, tabakapokelele ifyo Lesa alaya.—Yakobo 1:5-8.

Amashiwi yambi ayaba mwi lembo lya AbaHebere 11:1, bayapilibula ati ‘bushininkisho bwa kuti fya cine,’ aya mashiwi yalanga ukuti pali fimo ifilelenga umuntu ukusumina ukuti icintu ca cine cine. Natulangilile, akasuba kamoneka kwati kaleshinguluka icalo ukutula ku kabanga, ukupita mu muulu no kuwila ku masamba. Lelo ukulingana ne fyo abasambilila ifyaba mu muulu balanda, batila icalo tacaba pa kati e lyo ifyabumbwa fimbi filecishinguluka. Kanshi nga mwasanga ifishinka kabili mwacetekela ukuti fya cine, mulakwata icitetekelo ca kuti icalo e cishinguluka akasuba nangu ca kuti lintu mulolesha mu muulu mumona ukuti akasuba e kasela. Ukutetekela ifi te kutila ninshi mwatetekela fye ukwabula ukwishiba bwino. Lelo icitetekelo cenu cilenga mwatendeka ukumona ifintu ukulingana ne fyo fyaba, te kukonka fye ifyo mwaishiba ukwabula ukushininkisha.

Bushe Ukuba ne Citetekelo Cakosa Kwacindama Shani?

Baibolo itukoselesha ukuba ne citetekelo ca musango yu, ukuba ne icitetekelo pa mulandu wa kuti natukwata ubushininkisho bwa cine cine, ica kutila nga twasanga icishinka twayaluka mu fyo twasuminamo. Icitetekelo ca musango yu calicindama nga nshi. Umutumwa Paulo alembele ukuti: “Kabili ukwabula icitetekelo te kuti tusekeshe Lesa, pantu uupalamina kuli Lesa afwile ukusumina ukuti e ko aba no kuti alalambula abamufwaisha.”—AbaHebere 11:6

Kwaba ifintu ifingi ifingalenga ukuti mufilwe ukuba ne citetekelo icakosa. Nomba nga ca kuti mwakonka ifishinka fine ifyo twalalandapo mu fipande fikonkelepo, kuti mwaba ne citetekelo cakosa.