Naliba ne Nsansa Nangu ca Kuti Nalilemana

Abashimika ili lyashi ni ba Paulette Gaspar

Nangu ca kuti ilyo nafyelwe nafinine ama kg yatatu, dokota alimwene ukuti kwali icintu icikalamba icalubene kuli ine. Ilyo nalefyalwa, amafupa yandi yalilepwike. Nalilwala ubulwele bwa kunaka kwa mafupa ubo beta ati osteogenesis imperfecta. Bambutushishe mu kundepula, nomba badokota batile nshali na kupola. Baleti nali no kufwa bulya bwine bushiku nafyelwe.

NAFYELWE pa 14 June mu 1972, mu musumba ukulamba uwa Canberra, mu calo ca Australia. Icapapwishe ca kuti nshafwile bulya bushiku dokota atile e bo nali no kufwilapo. Nomba kabili naishilelwala akalaso. Apo badokota baleti nshali na kupusuka, tabalempeelako no muti uuli onse, baleti fye nalafwa. Lelo nshafwile, nalipuswike.

Ndatontonkanya nati abafyashi bandi bafwile baliculile sana pali iyi nshita. Abalebomba mu cipatala bale-eba abafyashi bandi ukuti bempoosako sana amano pantu nali no kufwa. Na kuba mu myeshi ya kubalilapo itatu iyo bantekele mu cipatala, tabalesuminisha na bafyashi bandi ukunjikatamo. Amafupa yalinakiishe ica kuti umuntu mu kukanaishiba kuti ayakontola. Ilyo badokota bamwene ukuti nali no kupusuka, baebele abafyashi bandi ukuti bantwale uko basungila abana abalemana.

Lelo abafyashi bandi basalilepo ukunsenda fye ku ng’anda. Pali iyi nshita, e lyo bamayo ba-ambile fye ukusambilila Baibolo ne Nte sha kwa Yehova. Ifyo basambilile fyalengele ukuti bampoosesheko amano. Lelo kwena cifwile calibakoseele sana ukuti bantemwishe, pantu amaka yabo yonse na mano babikile sana ku kunsakamana. Ilingi line balentwala ku cipatala. Amafupa yandi yalekontoka nangu fye ni pa ku nsamba. No kutesula fye kwalelenga ifupa ukutobeka.

Naishileba no Bulanda nga Nshi

Ilyo nalekula, incinga ya balemana yali kwati e munandi. Kabili nshali na maka ya kusambilila ukwenda. Nangu ca kuti nali na ya amafya, abafyashi bandi balensunga bwino icine cine.

E lyo kabili bamayo bale-esha sana ukunsambilisha amashiwi ya mu Baibolo aya kunsansamusha. Pa fyo bansambilishe pali ne fya kuti ku ntanshi, Lesa akapanga isonde ukuba paradaise umo abantu bonse bakaipakisha ukulapepa Lesa kabili bakaba no bumi ubusuma. (Amalumbo 37:10, 11; Esaya 33:24) Lelo kwena bamayo balelanda fye icishinka ukuti ubumi bwandi bukaba fye bwino nga ca kuti Lesa aleta icalo cipya.

 Pa kubala, nalisambilileko pa sukulu lya balemana. Bakafundisha bandi tabampandileko na mano pa fyo nalingile ukucita ku ntanshi pa mikalile yandi, kabili na ne mwine nshaishibe ifya kucita. Na kuba calikosele nga nshi ukushipikisha amafya nalekwata pa sukulu. Abana be sukulu banandi abengi balensunga buluku buluku. Pa numa, na-ambile ukusambilila pa sukulu lya bashalemana. Nalimwene ukuti ukulasambilila na bantu tacali cintu ica-anguka. Lelo napampamine fye pa kupwisha isukulu.

Ilyo nali mupepi no kupwisha isukulu, e lyo maka maka namwene ukuti ubumi bwa bana be sukulu banandi tapali uko bwalelola. Na kabili naletontonkanya pa fyo ba mayo bansambilishe muli Baibolo. Ilyo naletontonkanyapo, nalishibe ukuti ifyo balenjeba fya cine. Nomba ifyo balensambilisha mu Baibolo, tafyalemfika pa mutima ilya nshita. E ico iyi nshita nabikile fye amano pa kwangala no musamwe, nshaletontonkanya na pa fya ku ntanshi.

Ilyo nali ne myaka 18, nafumine pa ng’anda pa bafyashi, no kuya mu kwikala na banandi bambi abalemana mu ng’anda imbi. Ukwikala na aba banandi kwaliweme lelo kwalentiinya no kuntiinya. Ukukwata ubuntungwa bwa kucita ifyo ndefwaya, ukuba ne fibusa no kwangala nabo fyonse fyaliweme icine cine. Abanandi abengi basukile baupwa. Na ine nalefwaisha ukupwa no kutemwikwa. Lelo ifi nalemeene, calyafishe sana ukusanga uwa kungupa. Ici calendetela ubulanda.

Lelo kwena nshalepeela Lesa umulandu pa kulemana kwandi. Nalisambilile ifingi pali Lesa kabili nalishibe ukuti te kuti cibe bwino ukumupeela umulandu pantu te wa lufyengo. (Yobo 34:10) Nale-esha ukulabako no kulamona fye ukuti ifi fine e fyo napangwa. Lelo nangu naletontonkanya ifi, naleba no bulanda sana.

Ifintu Fya-ambile Ukubako Bwino Panono Panono

Icaweme ca kuti bamayo balishibe ifyo naleumfwa ububi, e pa kwebako abakalamba mu cilonganino cali mupepi no ko naleikalila. Aba abakalamba ba mu cilonganino balintumine foni banjeba no kuti nkayesangwa ku kulongana kwa Bena Kristu pa Ng’anda ya Bufumu iya Nte sha kwa Yehova. E lyo kabili nkashi nandi mu cilonganino aambile ukusambilila Baibolo na ine cila mulungu.

Ilyo natampile ukwibukisha icine ca mu Baibolo ico bamayo bansambilishe kale, ifyo naletontonkanya pa bumi bwandi fya-ambile ukubako bwino. Nalitemenwe ukulaaba na Bena Kristu banandi. Nomba kwena naleshipikisha fye pa kuti bambi beishiba ifyo naleumfwa pantu nga naleba fye no bulanda. Nalimo ifyo nalepitamo e fyalengele cinkosele ukutemwisha Lesa. Lelo nangu naleumfwa ifi, nalishibe ukuti nalingile ukuipeela kuli Lesa. E calengele ukuti mu December 1991, mbatishiwe ku kulanga ukuti nali-ipeele kuli ena.

Nafumine mu ng’anda naleikala na banandi abalemana no kwamba ukuikalila ne mwine. Ifintu fyaliweme ilyo naleikalila lelo nalikwete na mafya. Ubwafya bumo bwali bwa kuti naleba sana uwa nkumbabulili. E lyo kabili naletiina ukunyingilila ku baume. Ici canengele ukuba uwa bulanda sana na kabili. Nangu ca kuti nalemoneka uwa nsansa kabili uwashipa, nshali bwino. Nalefwaisha umuntu umusuma kabili uwashintililwapo uwingaba cibusa wandi.

Yehova Lesa alimpeele umunandi ulya wine fye nalefwaya. Baeluda mu cilonganino baebele bankashi nandi bamo abaupwa abe shina lya Suzie, ukutwalilila ukulasambilila Baibolo na ine. Ba Suzie tabali fye ni bakasambilisha wandi. Lelo bali banandi abo twaleumfwana nabo icine cine kabili nalibatemenwe sana.

Ba Suzie balinsambilishe ne fya kushimikila abantu bambi pa mayanda na konse fye pa fyo nalesambilila muli Baibolo. Ili e lyo natampile ukwishiba bwino imibele ya kwa Lesa. Nomba nangu ca kuti nalibatishiwe, nali nshilatemwa  sana Lesa. Inshita imo nalefwaya no kuleka ukumupepa. Nalyebeleko ba Suzie ifyo naleumfwa kabili balingafwile nga nshi pa bwafya nakwete.

Na kabili ba Suzie banengele njishibe ukuti icalelenga sana ukuti ndeba no bulanda kwangala na bantu abashatemenwe Yehova. E calengele ukuti nomba mpange icibusa na bantu abatemenwe Lesa, maka maka abakalamba. E lyo kabili natendeke ukumfwana na bamayo abo nshaleumfwana nabo sana kale e lyo na ndume yandi umukalamba. Ilyo nacitile ifi nalipapile sana pantu insansa nakwete nshabalile nshikwatapo. Bamunyinane ne nkanshi nandi mu cilonganino, balupwa lwandi, e lyo maka maka Yehova, balensansamusha no kunkoselesha.—Amalumbo 28:7.

Umulimo Waibela

Ilyo nasangilwe ku kulongana kukalamba ukwa Nte sha kwa Yehova, naumfwile ilyashi pa nsansa abengi bakwata pa mulandu no kubomfya inshita yabo iikalamba mu kushimikila abantu Icebo ca kwa Lesa, natontonkenye ukuti ‘Na ine kuti nabombako uyu mulimo!’ Lelo nalishibe ukutila kuti wankosela. Lelo pa numa ya kupepelapo, nasalilepo ukulemba formu pa kuti ndebombako uyu mulimo wa kusambilisha abantu Baibolo lyonse, kabili mu April 1998 nalitendekeko ukubomba.

Bushe ifi nalemana nshimikila shani? Ne mwine ndaicitila ifintu, kabili nalipata ukuba icisendo ku bantu, ukuti e bo balentwala uko ndefwaya ukuya nelyo ukuncitilako ifintu fimbi. Ba Suzie na balume babo ba Michael, balimpandileko amano ukuti ningile ukushita honda! Nomba nyensha shani iyi honda? Nge fyo icikope cilelanga, iyi honda bapangila abantu ababa nga ine. Kabili nshicula ukufuma pa ncinga no kunina pali honda pantu nafina fye ama Kg 19!

Ifi nakwata iyi honda calinyangukila ukutandalila abantu no kusambilila Baibolo nabo pa nshita iyo bonse tufwaya. Kabili nalitemwa sana ukwensha iyi honda, kabili icintu cimo icindetela insansa pa calo, ndomfwa bwino nga nde-ensha ndeumfwa na kamwela kalepuupa!

Nalitemwa ukulanda na bantu mu misebo pa fya kwa Lesa nelyo tulelanda fye amalyashi yambi, kabili nabo balakutika kabili balampeela umucinshi. Nalitemwa ukwafwa abantu ukusambilila Baibolo. Ndebukisha bushiku bumo ilyo naleshimikila mu mayanda na munyina umutali. Aposeshe umuntu pa ng’anda imo ifi, ilyo uyu muntu andoleshe alipapile, e lyo aipwishe uo twali nankwe ati: “Bushe aba nabo balalanda?” Ine na munyina nalebomba nankwe twasekele fye. Ilyo napwile ukumushimikila, e lyo ashininkishe ukuti kanshi cine cine ndalanda!

Nomba naliba ne nsansa, kabili nalisambilila ukutemwa Yehova Lesa. Ndatasha bamayo pa kunsambilisha icine ca mu Baibolo, kabili ndolela inshita ya ku ntanshi ilyo Lesa akalenga “ifintu fyonse ukuba ifipya,” ukubikako na kamubili kandi kene.—Ukusokolola 21:4, 5.

[Amashiwi pe bula 30]

“Nale-esha ukulabako no kulamona fye ukuti ifi fine e fyo napangwa. Lelo nangu naletontonkanya ifi, naleba no bulanda sana”