Baibolo Ilaalula Abantu

CINSHI calengele umurasta ukubeya imishishi yakwe iitali no kuleka ukupata abantu babuuta? Kabili cinshi calengele umulumendo uwalepokela abaleshitisha imiti ikola indalama ukuti aaluke? Yumfwileni ifyo abene balondolola.

“Nalilekele no Kupata Abantu Babuuta.”—HAFENI NGHAMA

IMYAKA: 34

ICALO: ZAMBIA

IFYO BALI: BALI BA RASTA

INKULILO YANDI: Nafyalilwe mu Zambia mu nkambi ya mbutushi. Bamayo babutwike ukufuma mu Namibia ilyo mwali inkondo kabili baingile mu kabungwe ka South West Africa People’s Organization (SWAPO). Aka kabungwe kalelwisha icalo ca South Africa icaleteka icalo ca Namibia pali ilya nshita.

Naikele mu nkambi sha mbutushi ishalekanalekana ukutula ilyo nafyelwe ukufikila lintu nali ne myaka 15. Fwe baice balekulila mu nkambi umwali aba mu kabungwe ka SWAPO baletusambilisha ukuti tufwile ukulatungilila akabungwe akalelwisha ubuntungwa. Batusambilishe ukutemwisha ifikansa fya mitekele ya calo no kupata abantu babuuta.

Ilyo nali ne myaka 11, nalefwaya ukuti na ine mbe Umwina Kristu mwi calici ilyali mu nkambi. Muli ili calici mwali abalepepa ku Katolika, kuli baLutheran, ku Anglican e lyo na balepepa ku macalici yambi. Ilyo naebele shimapepo ukuti ndefwaya ukuba Umwina Kristu, alinkenye. Ukutula lilya line, nalilekele ukusumina muli Lesa. Nomba ilyo nali ne myaka 15, naingile mu kabungwe ka barasta, ne calengele ca kuti nalitemenwe sana inyimbo sha reggae kabili nalefwaya ukupwisha amafya ya bantu bafiita pantu balebacusha. Nalitekele imishishi, natendeke ukupeepa ibange, nalilekele ukulya inama kabili nalebombesha pa kuti abantu bafiita nabo bakwate ubuntungwa bwa kuicitila ifintu. Lelo nshalekele imibele yandi iyabipa no kutamba amafilimu umwaba sana ulubuli. Kabili nshalekele ukutukana insele.

IFYO BAIBOLO YA-ALWILE UBUMI BWANDI: Mu 1995, ilyo nali ne myaka nalimo 20, natendeke ukutontonkanya sana pa fyo mfwile ukucita mu bumi bwandi. Nalebelenga impapulo shonse isha barasta isho nasanga. Mu mpapulo shimo balelembamo ne fya mu Baibolo, lelo ifyo balelondolola nshalefyumfwa. Ici calengele ukuti mpingulepo ukulaibelengela Baibolo ne mwine.

Pa numa, umunandi umo umurasta ampeele icitabo ca kusambililamo Baibolo icalembwa ne Nte sha kwa Yehova. Natendeke ukubelenga ici citabo pamo na Baibolo. Umuye nshiku, nalisukile  nakumanya Inte sha kwa Yehova natendeka no kusambilila na bo Baibolo.

Nalibombeshe sana pa kuti ndeke ukupeepa ibange no kunwesha ubwalwa. (2 Abena Korinti 7:1) Natendeke ukulamoneka bwino, nalibeyele imishishi, nalilekele ukutamba amafilimu umwaba ifye shiku no lubuli kabili nalekele no kutukana insele. (Abena Efese 5:3, 4) Mu kuya kwa nshita, nasukile naleka no kupata abantu babuuta. (Imilimo 10:34, 35) Pa kuti ndeke fyonse ifi, nalipoosele inyimbo shonse ishalelanda pa kuba na kapaatulula kabili nalilekele no kwangala na banandi abalefwaya ukuti mbwelele ku mibele ya kale.

Pa numa ya kucita fyonse ifi, nafwaile Ing’anda ya Bufumu iya Nte sha kwa Yehova, kabili nalitendeke ukupepa nabo. Ilyo napingwilepo ukubatishiwa pa kuti mbe Inte ya kwa Yehova, balupwa lwandi tabatemenwe. Bamayo banjebele ukuti nsaleko imipepele imbi iya “Bena Kristu” ukucila ukuba Inte ya kwa Yehova. Bayama abakwete icifulo icikalamba mu buteko, lyonse fye balenjebaula pali ifi napingwilepo ukuba Inte ya kwa Yehova.

Lelo, ifyo nasambilile pa fyo Yesu alecita ku bantu bambi e lyo no kukonka ifyo alefunda, fyalingafwile ukushipikisha ilyo balenkaanya no kumpumya. Ilyo nalingenye ifyo baNte basambilisha ku fyo Baibolo ilanda, nalishininkishe ukuti nalisangile ukupepa kwa cine. Ica kumwenako, balakonka ifunde lya mu Baibolo ilya kushimikila ku bantu bambi. (Mateo 28:19, 20; Imilimo 15:14) Kabili tabaitumpa mu fikansa fya mitekele ya calo.—Amalumbo 146:3, 4; Yohane 15:17, 18.

IFYO NANONKELAMO: Ukukonka ifyo Baibolo isambilisha kwalingafwa nga nshi. Ku ca kumwenako, ifi naleka ukupeepa ibange, nalileka ukonawila indalama ishingi ku kushita ibange. Ino nshita nalileka ukumona ifinjelengwe nalemona pa mulandu we bange, kabili no bumi bwandi bwaliwama.

Nalishiba nomba ico nabela pano calo ne fyo mfwile ukwikala, kabili ifi fine e fyo nalefwaisha ukutula fye ilyo nali umwaice. Ne cacindamisha ca kuti, nalipalama kuli Lesa.—Yakobo 4:8.

“Nalisambilila Ukukanaba ne Cipyu.”—MARTINO PEDRETTI

IMYAKA: 43

ICALO: AUSTRALIA

IFYO BALI: BALESHITISHA IMITI IKOLA

INKULILO YANDI: Ilyo nalekula, twalekuukakuuka. Twalikelepo mu matauni ayanono, mu musumba ukalamba kabili inshita imo twalikeleko na pa minshoni ya ba Aborijini iyabelele mu mpanga. Ndebukisha bwino ifyalecitika pali ilya nshita ilyo twali na bafyala bandi na bayama. Kwali ukwipaya isabi, ukulunga no kupanga ifya kupangapanga.

Batata bali ni bakapoosa wa nkonya kabili batendeke  ukunsambilisha ifya kupoosa inkonya ilyo nali fye umwaice. Nalitemenwe sana ulubuli. Ilyo nali umulumendo, nalepoosa inshita iikalamba mu fikuulwa fya bwalwa. Ine na banandi twalitemenwe sana ukucita ulubuli. Twalebomfya imyele ne nkoli shilya bateyelako ubwangalo bwa baseball ukusansa abantu 20 nelyo ukucilapo.

Pa kusanga indalama, naleshitisha imiti ikola e lyo ne fipe ifyo abalebomba pa cabu baleiba. Kabili nine nalepokela abaleshitisha imiti ikola indalama kubo baleshitishako, kabili pa kuti abantu balipile indalama, nalebatiinya ne mfuti. Nalefwaisha fye ukulaipaya abantu. Ico naimininepo kwipaya, pantu nga te ifyo ninshi nine bali no kwipaya.

IFYO BAIBOLO YA-ALWILE UBUMI BWANDI: Ilyo nalekula, nalyumfwilepo ukuti kwaliba Inte sha kwa Yehova. Lintu nali ne myaka nalimo 20, ndebukisha ukuti nalipwishepo bamayo nga ca kutila balishibeko baNte. Ilyo papitile inshiku shibili, Nte umo uwe shina lya Dixon alishile pa mwesu. Pa numa ya kulanshanya nankwe, alindalike ku kulongana kwa Nte sha kwa Yehova. Awe e fyo naile kabili nalitwalilila ukulongana ukucila pa myaka 20 nomba. BaNte balinjaswike amepusho yonse ayo nakwete ukubomfya Baibolo.

Nalitemenwe ilyo nasambilile ukuti Yehova alitemwa umuntu uuli onse, nangu fye ni balya abashipepa. (2 Petro 3:9) Naishileishiba ukuti ni Shifwe uwakwata ukutemwa, uwingansakamana, na lintu kushili uuli onse uwa kunsakamana. Kabili nalitemenwe sana ukwishiba no kuti Lesa kuti ambelela uluse nga ca kutila nayaluka. Amashiwi yaba pa Abena Efese 4:22-24 yalimfikile sana pa mutima. Ili lembo lyankoseleshe ‘ukufuula ubuntu bwa kale,’ no ‘kufwala ubuntu bupya ubwalengelwe ukulingana no kufwaya kwa kwa Lesa.’

Palikokwele pa kuti njaluke. Umulungu walepwa ukwabula ukubomfyapo imiti ikola, nomba pa mpela ya mulungu nga ndi na banandi, nalenwa pa mulandu wa kuti balempatikisha. Nailwike ukuti nalingile ukutaluka aba banandi pa kuti ningawamya imikalile yandi, e ico natontonkenye ukukuukila ku citungu cimbi. Abanandi bamo baliipeeleshe ukunshindika, na ine nalisumine. Ilyo twaleya batendeke ukupeepa ibange kabili balimpeeleko. Nabebele ukuti nali pa kuleka ukupeepa ibange no kunwesha ubwalwa, kabili e fyo twalekene ilyo twafikile pa mupaka wa kwingila mu citungu cimbi. Pa numa naumfwile ukuti aba banandi balileiba indalama mu banki ukubomfya imfuti.

IFYO NANONKELAMO: Ilyo nalekele ukwangala na ba banandi, calyangwike ukwalula ubumi bwandi. Mu 1989, nalibatishiwe no kuba Inte ya kwa Yehova. Pa numa ya kubatishiwa, nkashi yandi, bamayo e lyo na batata nabo balitendeke ukubombela Yehova.

Nalyupa, nalikwata na bana batatu abasuma, kabili napapita ne myaka 17 ukutula apo naupila. Nalisambilila ukukanaba ne cipyu nangu bankalifya. Kabili nalisambilila no kutemwa abantu ba ‘mitundu yonse, indimi na bafuma ku fyalo fimbi.’ (Ukusokolola 7:9) Nalishininkisha ukuti amashiwi Yesu alandile ya cine. Atile: “Nga mwaikalilila mu fyo nsosa, ninshi ca cine muli basambi bandi, kabili mukeshiba icine, ne cine cikamulenga ukuba abantungwa.”—Yohane 8:31, 32.

[Amashiwi pe bula 19]

Pa kuleka fyonse ifi, nalipoosele inyimbo shonse ishalelanda pa kuba na kapaatulula

[Amashiwi pe bula 20]

Ine na banandi twalitemenwe sana ukucita ulubuli. Twalebomfya imyele ne nkoli shilya bateyelako ubwangalo bwa baseball ukusansa abantu 20 nelyo ukucilapo