Bushe Abantu Bonse Abasuma Balaya ku Muulu?

ICUNGULO bushiku ilyo Yesu na batumwa bapwishishe ukulya nankwe ica kulya ca kulekelesha kabili ilyo tabalamwipaya, abalaile ukuti ali no kubapekanishisha apa kwikala mu muulu. Atile: “Mu ng’anda ya kwa Tata mwaba apa kwikala apengi. Nga tacali ifi, nga nalimwebele, pantu ndeya ku kumupekanishisha apa kwikala.” (Yohane 14:2) Mulandu nshi Yesu ali no kubapekanishisha apa kwikala mu muulu? Finshi bakalacita kulya?

Yesu alikwatile abasambi bakwe umulimo uwaibela mu muulu. Pali cilya cine cungulo, atile: “Ni mwe mwe batwalilila na ine mu fya kunjesha; kabili ndepangana na imwe icipangano, ifyo na Tata apangana na ine icipangano ca bufumu.” (Luka 22:28, 29) Lesa alaile Yesu ukuti akaba Imfumu kabili akalateka abantu bwino. Ici e cimo pa fintu ifyo abantu bakabila sana. Yesu akalubula abantu ku macushi kabili akonaula abaliila abanabo amasuku pa mutwe. Nangu cingati Yesu akalateka abantu abengi “ukufika ku mpela sha pano isonde,” icipuna cakwe ica bufumu cikaba mu muulu.—Amalumbo 72:4, 8; Daniele 7:13, 14.

Lelo, Yesu takaleteka eka. E co alaile abatumwa ukuti akabapekanishisha apa kwikala mu muulu. E bali aba ntanshi ukusalwa ukuba “bashamfumu abakalateka isonde.”—Ukusokolola 5:10.

Ni banga bakaya ku muulu? Nga filya fine ciba mu buteko bonse, abakalateka mu Bufumu bwa kwa Lesa mu muulu banono, lelo abo bakalateka bena bengi. Yesu aebele abakalateka nankwe ukuti: “Mwilatiina, mwe mukuni unono, pantu Shinwe afwaya ukumupeela ubufumu.” (Luka 12:32) Muli ulya “mukuni unono” mukaba abantu 144,000. (Ukusokolola 14:1) Iyi mpendwa inono nga kuilinganya ku mintapendwa ya bantu ba cumfwila abakaba no mweo wa muyayaya pano calo ilyo Ubufumu bukalateka.—Ukusokolola 21:4.

Kanshi, te bantu bonse abasuma abakaya ku muulu. Ilyo umutumwa Petro alelanda pa Mfumu Davidi, umuntu uwali umusuma, atile: “Davidi taninine mu muulu.” (Imilimo 2:34) Yohane Kabatisha na o ali muntu umusuma. Lelo, amashiwi Yesu alandile yalanga ukuti takaye ku muulu ku kuyaba imfumu. Yesu atile: “Pa bafyalwa ku banakashi tapatala apamoneka uwacila pali Yohane Kabatisha; lelo uwacepesha mu bufumu bwa mu muulu mukalamba ukumucila.”—Mateo 11:11.

Bushe na Imwe Mukapokelela Icilambu ico Bakapeela Abantu Abasuma?

Cinshi mufwile ukucita pa kuti mukapokelele icilambu ca kwikala pano calo umuyayaya? Yesu atile: “Lesa atemenwe nga nshi aba pano calo ica kuti apeele Umwana wakwe uwafyalwa eka, ukuti onse uumutetekela ekonaika lelo akabe no mweo wa muyayaya.” (Yohane 3:16) Mwamona ukuti icalenga Lesa ukulaya abantu umweo wa muyayaya ni co alitemwa aba pano calo, lelo abakapokelela fye ici cilambu ni balya ‘abatetekela.’

Pa kuti umuntu abe ne citetekelo kano aishiba Lesa bwino bwino. (Yohane 17:3) Kuti mwalanga ukuti muli bantu basuma nga ca kuti mwatwalilila ukusambilila na fimbi pa mulandu Yehova abumbile abantu. Lyena mulelanga ukuti namutetekela ifyo mulesambilila ukupitila mu kulacita ifyo fine mwasambilila. Nga mulecita ifi, ninshi mukakwata ishuko lya kupokelela umweo wa muyayaya.

 [Akabokoshi pe bula 7]

Bushe Baibolo Yalandapo Shani?

Icipusho:

Cinshi cicitika abantu abasuma nga bafwa?

Icasuko:

“Abafwa, tabaishiba akantu nangu kamo.”—LUKALA MILANDU 9:5.

Icipusho:

Lisubilo nshi abantu abasuma bakwata?

Icasuko:

“Inshita ileisa ilyo bonse ababa mu nshiishi bakebukishiwa kabili bakomfwa ishiwi [lya kwa Yesu] no kufumamo.”—YOHANE 5:28, 29.

Icipusho:

Ni kwi abantu abasuma abengi bakekala?

Icasuko:

“Abalungama e bakekala mu calo, kabili bakekalamo umuyayaya.”—AMALUMBO 37:29.