Ifyo Tusambilila Kuli Yesu

Pa Kupepa kwa Cine

Bushe Lesa alitemwa imipepele yonse?

▪ Yesu alyumfwilile uluse abantu abali mu mipepele ya bufi. Asokele abalekutika kuli ena pali “bakasesema ba bufi abesa . . . nabafwala ifya kufwala fya mpaanga, lelo mu kati mimbulu iikatila fye ubonaushi.” (Mateo 7:15) Bushe mwamona ukuti abantu bamo babomfya imipepele pa kucita ifyabipa?

Yesu apepele kuli Lesa, ati: “Icebo cenu e cine.” (Yohane 17:17) E ico, Lesa alipata imipepele iipilika icine caba mu Baibolo. E mulandu wine Yesu aebele bashimapepo aba bumbimunda amashiwi Lesa alandilepo kale aya kuti: “Kwa fye ukupepa uko bampepa, pantu ifisambilisho basambilisha mafunde ya bantu.”—Mateo 15:9.

Bushe kwaliba imipepele ya cine?

▪ Ilyo Yesu akumenye umwanakashi umwina Samaria uwali mu mipepele ya bufi, amwebele ukuti: “Imwe mupepa ico mushaishiba . . . Bakapepa bene bene bakapepela Tata mu mupashi na mu cine, pantu Tata afwaya aba musango yu balemupepa.” (Yohane 4:22, 23) Aya mashiwi yalelanga fye apabuuta ukuti imipepele ya cine e ko yaba.

Yesu atile: “Nshicita kantu nangu kamo neka; lelo filya fine Tata ansambilishe, e fyo na ine nanda.” Kanshi Yesu alishibe ukuti imipepele alesambilisha abantu, e yali fye iya cine. (Yohane 8:28) E ico, atile: “Nine nshila ne cine no mweo. Takuli uwisa kuli Tata kano aishila muli ine.” (Yohane 14:6) Apo bakapepa bene bene bapepela Lesa mu nshila imo fye, ninshi bafwile no kuba mu mipepele imo ine iya cine.

 Kuti mwaishiba shani imipepele ya cine?

▪ Umwina Kristu ni ulya uukonka Yesu Kristu. Natulande pa nshila shine isho abasambi ba kwa Yesu aba cine bamupashanyamo.

1. Ilyo Yesu Kristu apepele kuli Yehova, atile: “Nalenga beshibe ishina lyenu.” (Yohane 17:26) Ifi fine e fyo na Bena Kristu ba cine bacita.

2. Yesu aleshimikila pa Bufumu bwa kwa Yehova kabili atumine abasambi bakwe ukuya baleshimikila pa Bufumu ku ng’anda ne ng’anda. Atile: “Mu musumba onse nelyo umushi umo mwaingila, fwayenimo umuntu uulefwaya ukumfwa.” Pa numa, aebele abasambi bakwe ukuti: “E ico kabiyeni, kalengeni aba nko shonse ukuba abasambi.” (Mateo 10:7, 11; 28:19) Kuti camwangukila ukwishiba Abena Kristu ba cine pantu balitwalilila ukubomba umulimo umo wine.

3. Yesu alikeene ukuibimba mu fikansa fya mitekele ya calo. Kabili alandile pa basambi bakwe ukuti: “Tabali ba muli ici calo, ifyo na ine nshili wa muli ici calo.” (Yohane 17:14) Cimo ico Abena Kristu ba cine beshibikilwako, kukanaipoosa mu fikansa fya mitekele ya calo.

4. Yesu alitemenwe sana abantu ica kuti ali-ipeeleshe no kubafwila. Atile: “Nga muletemwana, e lyo bonse bakeshiba ukuti muli basambi bandi.” (Yohane 13:35) Abena Kristu ba cine balasakamanana kabili tabalwako inkondo.

Bushe kuti mwanonkelamo shani mu mipepele ya cine?

▪ Pa kuti mube mu mipepele ya cine, intanshi mufwile ukwishiba Yehova bwino. Ukwishiba Lesa kukalenga mukalekonkelela imikalile isuma kabili kukalenga mukatemwe Lesa no mutima wenu onse. Yehova alaya ukuti akapeela abantu bonse abamutemwa umweo wa muyayaya. E co Yesu alandiile ukuti: “Nomba pa kuti babe no mweo wa muyayaya, kano baishiba imwe mwe Lesa wa cine mweka.”—Yohane 17:3.

Nga mulefwaya ukwishibilapo na fimbi, belengeni icipandwa 15 mu citabo citila Bushe Cinshi Baibolo Isambilisha? Abalemba ici citabo ni Nte sha kwa Yehova

[Icikope pe bula 16]

“Cenjeleni kuli bakasesema ba bufi abesa kuli imwe nabafwala ifya kufwala fya mpaanga, lelo mu kati mimbulu iikatila fye ubonaushi.”—Mateo 7:15