“Imbila Nsuma” Yabilwa mu Fishi Fyaba ku Kapinda ka ku Kuso aka Australia

YESU atile: “Imbila nsuma iyi iya bufumu ikabilwa ku bantu bonse aba pe sonde.” (Mateo 24:14) Inte sha kwa Yehova shilomfwila ifunde lya kwa Yesu kabili balesha na maka ukushimikilako abantu abekala ukuli konse amashiwi yaba mu Baibolo. (Mateo 28:19, 20) Ababomba uyu mulimo baitemenwa fye, kabili limo limo balapita mu mafya e lyo balabomfya ne ndalama shabo.

Ku ca kumwenako, ba Nathan na ba Carly balekele imilimo balebomba pa kuti baleshimikilako abantu abekala pa fishi fyabela ukutali ifya Torres Strait Islands. Mu 2003, umwiminishi wa pa maofeshi ya Nte sha kwa Yehova mu Australia aebele ba Nathan na ba Carly ukuti baye mu kubombela pa cilonganino caba pa cishi ca Thursday Island. Ici cishi caba pa fishi fyaba pa kati ka calo ca Australia ne ca New Guinea.

Mu 2007, bashitile ubwato bwa kale ubukalamba ubo beta ati Teisan-Y. Baliwemye ubu bwato ukubomfya indalama shabo, kabili batendeke ukuya mu kushimikila ku fishi fimbi 10 ifyaba ukutali sana. Pa kuya mu kushimikila kuli ifi fishi, balefuma pa cishi ca Thursday Island apo baleikala. Ifi e fyo balondolwele ifyo bale-enda pa kuya mu kushimikila.

January 2008: Nafumine pa cishi ca Thursday Island na kabwato akanono, naile ku Bamaga ku kusenda ba Nte banandi 6 abekala kulya. Naendele amakilomita 80 ukuya no kubwela. Awe e fyo twaninine muli Teisan-Y no kulola ku fishi fibili, ica Warraber ne ca Poruma, ninshi natwisusha na mafuta mu bwato. Twashitile amalita 5,500 aya mafuta kabili lita imo yaleshitwa amadola yabili. Ubwato tabwalebutuka, twale-enda fye amakilomita 10 mwi awala limo. Lelo imiceele yena yali bwino, pantu takwali icimwela.

Ilyo twafikile pa cishi ca Warraber, twashiikile ubwato ubukalamba mupepi no lulamba, no kusenda akabwato akanono na bantu fye abanono abakwete balupwa pali ici cishi kabili twailelanda no mukalamba wa pa cishi pa kuti atusuminishe ukushimikilapo. Uyu muntu ni pasta lelo alitusuminishe ukushimikila ku bekala pali ici cishi. Ifi fine e fyo twacitile ilyo twaile ku cishi ca Poruma kabili nako kwine balitusuminishe ukushimikila. Abantu ba pali ifi fishi baliba bwino kabili balefwaya nga nshi ukubelenga impapulo shesu. Twalitendeke ukusambilisha abantu abengi Baibolo.

April 2008: Twapangile ukuti tukaye ku cishi ca Dauan, icishi ca Saibai, ne cishi ca Boigu. Ifi fishi fitatu fyaba ukutali sana, mupepi no mupaka wa calo ca Papua New Guinea. Nomba imiceele tayaweme, e co twaile ku cishi ca Mabuiag Island. Ukufuma pa Thursday Island ukufika kuli ici cishi, paba fye amakilomita 70,  lelo pa mulandu wa kushoka amabwe twaendele amakilomita 140.

Amabimbi yalisensenwine akabwato ako twakakile ku bwato ubukalamba. Nangu cingati kwali sana amabimbi, twalipindulwile ubwato pa kuti tuyekasenda. Abengi abo twali nabo balilwele pa mulandu wa kuba pa menshi.

Pa cishi ca Mabuiag, balitusuminishe ukushimikilapo, kabili abekalapo balitupokelele bwino ica kuti twalabile na ku fyo twaculile pa mulandu wa mabimbi. Umwanakashi umo alitemenwe sana ifyo twamushimikile ica kuti atulombele impapulo na shimbi isha kuti akabike mu laibrali umo abomba.

May-October 2008: Pa mulandu wa miceele ububi, tatwaile ku fishi twalefwaya ukuya. Twashimikile fye pa cishi twaleikala, kabili pa numa twatendeke ukuwamya ubwato ubukalamba.

Ubwato ubukalamba bwalekabila ukubuwamya sana, e ico twaile ku cabu icikalamba ica Weipa no kubufumisha ku nse. Umulimo wa kuwamya walikulile! Ba Nte aba mu cilonganino cali mupepi bali-ipeeleshe ukutwafwa ukuwamya imipaipi, ukupenta, ne milimo imbi. E lyo bambi batuletele ifya kulya. Bambi nabo batuletele ifya kubomfya pa lwendo lwa kushimikila ulwali no kukonkapo. Tulatasha nga nshi pa fyo batwafwile na pali bukapekape bwabo.

December 2008: Na kabili twaimine ubulendo bwa kuya ku Dauan, ku Saibai na ku Boigu. Pa kusengauka ukupita ukwali sana amabimbi, twabomfeshe mashini yesu iya kupiminako imiceele, e lyo pa kushoka amabwe, twalebomfya mashini iya kutwafwa ukwishiba apali ifimabwe. Pa kuyafika ku Dauan, kwendapo ama-awala 12, lelo ici e cishi cayemba sana pa fishi ifyo twamonapo. Pa muulu wa mpili shalepa sana pamoneka kwati pali na makumbi. Abekala pa cishi ca Dauan balekutika sana ku mbila nsuma, kabili ilyo twabwelelemo twatwalilile ukulanshanya na bena pa foni.

Umwanakashi umo, uwe shina lya kuti Lettie, katwishi uko apokele ama magazini, alembeele ku maofeshi ya Nte sha kwa Yehova ya mu Australia pa kuti balemutumina impapulo na shimbi. Nabo balimutumine impapulo e lyo batumine na kalata ku cilonganino twabamo pa kuti twingayamumona. Awe e fyo twasukile twamusanga kabili twalitemenwe sana pantu twalimwafwile ukwishiba ifya kwa Lesa.

Pa cishi ca Saibai, umukalamba wa pali cilya cishi alitukeenye ukushimikila ku bantu bekalapo. Lelo alisuminishe abo tushimikila nabo abakwata balupwa pali cilya cishi ukuyabatandalila no kulanda na bena. Ubuteko bwalimpeeleko umulimo wa kupenta amayanda pa cishi ca Saibai, kabili indalama nalesangamo shaleafwilishako ilyo twaleba pa nyendo sha kushimikila.

Nkashi yesu umo, uwe shina lya kuti Tassie, afuma ku mushi wa mu Papua New Guinea apaba fye amakilomita 4 ukufuma ku Saibai. Ubuteko bwa mu Australia bwalisuminisha abena Papua New Guinea ukulaya mu kucita amakwebo pa cishi ca Saibai. Ba Tassie balikumene na bengi abafuma ku mushi ku mwabo, lelo tabakwete impapulo ishingi isha kubapeela. Apo ba Tassie babelele Inte ya kwa Yehova, uyu e muku wa kubalilapo bakumene na bafumine ku mushi ku mwabo. Twabwelele ukwali ubwato no kubaletela icibokoshi umwali impapulo. Ishingi shali mu lulimi lwa ku Papua New Guinea ulo beta ati  Tok Pisin. Ba Tassie balishimikile amashiwi ya mu Baibolo ku bantu ukucila pali 30 abafumine ku Papua New Guinea, kabili abatemenwe amashiwi baumfwile balisendele impapulo shonse ishali mu cibokoshi. Pa kuya ku mushi bekala kano namukwata ubwato kabili nalimo Inte sha kwa Yehova tashatalile ashiyako.

Twaliculile pa kuti fye tufike ku cishi ca kulekelesha ica Boigu. Twashiikile ubwato ubukalamba apali amakilomita 4 kabili apashikile amamita 2.5. Twalipalamike ubwato mpaka twafika apashikile amamita 1.8. Ine na umo pa bo twali nabo twaninine mu kabwato akanono no kutendeka ukumona umo twingapita pa kuya pa cishi. Imfula yaleloka kabili twalibombele icine cine! Papitile ama-awala yabili pa kuti fye tusange umo twingapita.

Ilyo twafikile, aba pa cishi balipapile kabili batwebele ati mashini ya kutwafwa ukwishiba apali ifimabwe ilafilwa ukubomba e lyo nangu fye ni balya balinda ululamba nelyo abashilika ba pa menshi balafilwa ukufika pa cishi. Umukalamba wa pa cishi alitukenye ukushimikila lelo alisuminishe abo twali nabo abakwete balupwa pali ici cishi ukuyabatandalila no kubashimikila. Twalikonkele ifyo atwebele kabili twailetandalila fye balupwa. Umwaume umo alipokeleko icitabo citila Bushe Cinshi Baibolo Isambilisha?, * alibelengele, kabili atampile ukulemba amepusho ku numa ya Baibolo yakwe. Pa numa twalitwalilile ukulanshanya no yu mwaume lintu atandele pa cishi ca Thursday Island.

January 2009: Twabwelele ku cishi ca Moa ne ca Mabuiag ku kulanshanya na balefwaya ukusambilila amashiwi ya mu Baibolo. Balitupokelele bwino sana pali ifi fishi fibili. Abengi mu mushi wa St. Paul pa cishi ca Moa batwebele ukuti twikakokola ukubwelelako. Umukalamba wa pa cishi atwebele ati muleisa mu kushimikila lyonse ilyo mwatemwa.

Pa fishi fya Torres Strait, ni pa fishi fye 17 e pekala abantu. Tatwaishiba nampo nga tukashimikila kuli bonse abekalapo. Lelo bonse fwe baba mu cilonganino caba pa fishi fyaba ku kapinda ka ku kuso aka Australia tulaba ne nsansa ukubomba apo twingapesha pa kuti tulete amalumbo kuli Kabumba wesu Yehova.

[Futunoti]

[Mapu pe bula 23]

(Nga mulefwaya ukumona mapu, moneni muli magazini)

AUSTRALIA

Weipa

Bamaga

IFISHI FYA TORRES STRAIT

PAPUA NEW GUINEA

[Abatusuminishe]

Based on NASA/Visible Earth imagery

[Mapu pe bula 24, 25]

Bamaga

Icishi ca Thursday

Icishi ca Moa

Icishi ca Warraber

Icishi ca Poruma

Icishi ca Mabuiag

Icishi ca Saibai

Icishi ca Dauan

Icishi ca Boigu

PAPUA NEW GUINEA

[Abatusuminishe]

Based on NASA/Visible Earth imagery

[Icikope pe bula 24]

Twafika pa cishi ca Thursday Island

[Icikope pe bula 24]

Tuleya mu kutandalila aba pa cishi ca Saibai Island

[Icikope pe bula 25]

Ukushimikila imbila nsuma mu lulimi lwa Tok Pisin