Bushe Lesa Afwaya Ukuti Tuleyebelela Imembu?

Mu macalici ayengi, abantu balayebelela imembu kuli bashimapepo. Nomba bushe ukuyebelela imembu kwalicindama muli cino calo umo abantu baicitila fye ifyo abene balefwaya?

IFYO abantu balanda pa kuyebelela imembu fyalipusanapusana. Ku ca kumwenako, inyunshipepala ya National Post iya ku Canada yalandile pa muntu umo uwasumine ukuti nangu ca kutila calyafya ukweba umuntu umbi ifyo ulufyenye, “cilawama umo nga aishiba ifyo uleumfwa pa fyo ucitile, apepa na iwe, no kukweba ifyo ulingile ukucita pa kulungika ifyo walufyenye.” Lelo, icitabo citila Bless Me, Father, for I Have Sinned cayambwile amashiwi umuntu umo asosele aya kuti: “Ukuyebelela imembu e cintu cimo icishawama icicitika mu macalici. Kulalenga abantu ukusakamikwa sana.” Finshi Baibolo ilanda pali ili lyashi?

Ifyo Baibolo Ilanda

Mu Mafunde ayo Lesa apeele abena Israele, alibebele mu kulungatika ifyo umuntu uwabembuka alingile ukucita. Ku ca kumwenako, umuntu nga abembukila umuntu munankwe nangu atoba amafunde ya kwa Lesa, alingile ukuyebelela kuli shimapepo uwa mu mukowa wa kwa Lebi, uwali no kutuula ilambo pa kuti Lesa amulekelele imembu.—Ubwina Lebi 5:1-6.

Pa numa ya myaka iingi, Imfumu Davidi yalibembwike. Bushe Davidi acitile shani ilyo bamukalipile kuli kasesema Natani? Ilyo line fye alisumine ukuti: “Nimembukila Yehova.” (2 Samwele 12:13) Na kabili, alipepele, ukupapaata Lesa ukuti amubelele uluse. Cinshi cafuminemo? Davidi aishilelemba ukuti: “Nasukile nayebelela ulubembu lwandi kuli imwe, kabili nshafishile ubupulumushi bwandi. Natile: ‘Nalayebelela imembu shandi kuli Yehova.’ Na imwe mwalinjelela pa membu shandi.”—Amalumbo 32:5; 51:1-4.

Na mu nshiku sha batumwa mwine, Lesa alefwaya ukuti aba mu cilonganino baleyebelela imembu. Yakobo, munyina wa kwa Yesu kabili uwali pa baletungulula icilonganino mu Yerusalemu, acincishe Abena Kristu banankwe ukuti: “Muletumbwilana imembu shenu no kupepelana, pa kuti mupole.” (Yakobo 5:16) Nomba ni membu nshi Abena Kristu balingile ukuyebelela, kabili bafwile ukuyebelela kuli bani?

Ni Membu Nshi Tulingile Ukuyebelela?

Cila bushiku, fwe bantu tulalufyanya nelyo ukulanda ifikalifya bambi, kanshi tulabembukilana. (Abena Roma 3:23) Bushe ici calola mu kuti tulingile ukuyebelela imembu shonse isha musango yu kuli bashimapepo?

Nangu ca kutila ulubembu lonse lwalibipa kuli Lesa, alebukisha ukuti icilenga ukuti tulelufyanya ni co tatwapwililika kabili alatubelela uluse. E mulandu wine uwaimbile amalumbo alembeele ukuti: “Imembu nga e sho mulolekesha, mwe Jah, mwe Yehova, nani uwingeminina?  Pantu kuli imwe kwaba ukwelela kwa cine, pa kuti abantu bamubele akatiina.” (Amalumbo 130:3, 4) E ico, finshi tulingile ukucita nga ca kutila twalufyanya nelyo twabembukila bambi mu kukanaishiba? Mwilaba ukuti mwi pepo lya cilangililo ilyo Yesu asambilishe abasambi bakwe ifya kupepa mwaba na mashiwi ya kuti: “Tweleleni imembu shesu, pantu na ifwe tulelela bonse abatulufyanya.” (Luka 11:4) Kanshi Lesa akatubelela uluse nga ca kutila twamulomba ukupitila mwi shina lya kwa Yesu.—Yohane 14:13, 14.

Moneni ukuti Yesu alandile no kuti pa kuti tubelelwe uluse na ifwe tufwile ‘ukwelela bonse abatulufyanya.’ Umutumwa Paulo acinkwileko Abena Kristu banankwe ukuti: “Mubelane icikuuku, mube aba mitima ya nkumbu, abaitemenwa ukubelelana uluse filya na Lesa aitemenwe ukumubelela uluse muli Kristu.” (Abena Efese 4:32) Nga twaelela bambi, ninshi kuti twaenekela ukuti Lesa na o akatwelela imembu shesu.

Bushe kuti twaenekela Lesa ukutwelela imembu ishikalamba pamo nga ukwiba, ukubepa, ubulalelale, ukukolwa, e lyo ne membu shimbi? Umuntu uucita imembu sha musango yu alapula mu mafunde ya kwa Lesa kabili ninshi alebembukila Lesa. Bushe finshi afwile ukucita?

Ni Bani Tulingile Ukuyebelelako Imembu?

Lesa tapeela umuntu nangu umo insambu isha kwelela imembu isho abantu bamubembukila, umwine e welela imembu sha musango yu. Baibolo ilatweba bwino bwino ukuti: “Nga twasumina imembu shesu, [Lesa] wa cishinka kabili mulungami, kuti atwelela pa membu shesu no kutusangulula ku kukowela konse.” (1 Yohane 1:9) Nomba, ni bani tulingile ukuyebelelako imembu sha musango yu?

Apo Lesa fye e wingatwelela imembu, kanshi e o tulingile ukuyebelelako. Ifi e fyo Davidi acitile, nga fintu tumwene. Nomba, cinshi tulingile ukucita pa kuti Lesa atubelele uluse? Baibolo itweba ukuti: “E ico, lapileni, no kwalukila kuli Lesa pa kuti imembu shenu shifuutwe, e lyo Yehova alamupuupuutula.” (Imilimo 3:19) Ca cine, ukwelelwa imembu takwashintilila fye pa kusumina ukuti ico umuntu acitile calibipile lelo kwashintilila na pa kufwaisha ukuleka ukucita icabipa. Nomba ilingi line tacayanguka ukuleka ukucita icabipa. Lelo kwaliba abengatwafwa.

Ibukisheni amashiwi umusambi Yakobo alembele yalya tulandilepo aya kuti: “Muletumbwilana imembu shenu no kupepelana, pa kuti mupole.” Yakobo alundilepo na mashiwi ya kuti: “Ilyo umulungami apepa ipepo lya kupapaata, ipepo lyakwe lilaba na maka ayengi pantu lilasukwa.” (Yakobo 5:16) “Umulungami” kuti aba umo pa “bakalamba ba cilonganino,” abo Yakobo alandilepo mu cikomo 14. Mu cilonganino ca Bena Kristu mwaliba “abakalamba” nelyo baeluda, abafwilisha abantu abalefwaya ukuti Lesa ababelele uluse. Aba “bakalamba” te kuti bafuute imembu sha uli onse pantu takwaba umuntu nangu umo uwakwata insambu sha kwelela imembu isho abantu babembukila Lesa. * Lelo bakalamba mu fya kwa Lesa kabili balilinga ukukalipila no kulungika umuntu uucitile ulubembu ulukalamba. Balamwafwa ukwiluka ifyo ulubembu lwakwe lubipile pa kuti alapile.—Abena Galatia 6:1.

 Mulandu Nshi Tulingile Ukuyebelela Imembu?

Nampo nga ulubembu umuntu acitile lukalamba nelyo iyo, ninshi naonaula bucibusa bwakwe na Lesa no muntu abembukile. Ici kuti calenga aleumfwa ububi nelyo ukusakamikwa. Icilenga umuntu aleumfwa ifi mulandu wa kuti alikwata kampingu iyo Kabumba atupanga nayo. (Abena Roma 2:14, 15) Finshi umuntu engacita nga ca kuti kampingu ilemucusha?

Nga twabelenga mwi buuku lya kwa Yakobo na kabili, tulesangamo amashiwi ya kutukoselesha aya kuti: “Bushe umo pali imwe nalwala [nelyo nabembuka]? Ete abakalamba ba cilonganino, kabili bamupepeleko, bamusubile amafuta mwi shina lya kwa Yehova. No mulwele akapola pantu abamupepeleko bali ne citetekelo, na Yehova akamwimya. Kabili, nga alicita imembu, imembu shakwe shikelelwa.”—Yakobo 5:14, 15.

Apa napo, abakalamba nelyo baeluda e bo Baibolo yatila e bafwile ukusakamana umukuni. Bausakamana shani? Tabakutika fye ku fyo uulufyenye alesosa, lelo apo uyu muntu nalwala nelyo nabembuka, balacitapo na fimo pa kuti ‘umulwele apole.’ Yakobo alanda pa fintu fibili ifyo bacita.

Ica kubalilapo ‘balamusuba amafuta.’ Ukumusuba amafuta kulosha ku maka Icebo ca kwa Lesa cakwata aya kundapa. Umutumwa Paulo alondolwele ukuti “icebo ca kwa Lesa ca mweo kabili ca maka . . . kabili cilapulinkanya ica kuti calekanya ifyo umuntu aba ne fyaba mu mutima wakwe,” cilafika umuntu pa mutima no kumulenga ayalula amatontonkanyo yakwe. (AbaHebere 4:12) Abakalamba balabomfya bwino Baibolo pa kwafwa umulwele nelyo uubembwike ukwiluka icalengele ukuti alufyanye kabili balamwafwa ukwishiba ne fyo afwile ukucita pa kuti engaba cibusa wa kwa Lesa na kabili.

Icalenga bubili, ‘aba citetekelo balamupepelako.’ Nangu ca kutila amapepo ya bakalamba te kuti yalenge Lesa ukwaluka ica kuti afilwa no kukonka ifunde lyakwe ilya mulinganya, aya mapepo yalicindama kuli Lesa, uufwaisha ukwelela imembu sha bantu ukubomfya ilambo lya cilubula ca kwa Kristu. (1 Yohane 2:2) Lesa aliiteyanya ukwelela umubembu uuli onse uwalapila ukufuma pa nshi ya mutima kabili uucita ‘ifintu ifilelanga ukuti nalapila.’—Imilimo 26:20.

Umulandu uukalamba uo tulingile ukuyebelela imembu, nampo nga tubembukile umuntu munensu nelyo Lesa, kufwaya ukuti Lesa atutemwe. Yesu Kristu alangilile ukuti intanshi tufwile ukupwisha ubwafya ubuli bonse ubo twingakwata no munensu no kupanga nankwe umutende e lyo twingapepa Lesa na kampingu iyasanguluka. (Mateo 5:23, 24) Amapinda 28:13 yatila: “Uufimba pa fibi ifyo acitile takashuke, lelo uufisokolola no kufileka akabelelwa uluse.” Nga twaicefya kuli Yehova Lesa no kulomba ukuti atubelele uluse, akatupaala kabili mu nshita yakwe iyalinga akatusansabika.—1 Petro 5:6.

[Futunoti]

[Amashiwi pe bula 23]

Nga ca kutila twalomba kuli Lesa ukuti atwelele imembu ukupitila mwi shina lya kwa Yesu, akasuulako ku filubo fyesu kabili akatwelela

[Icikope pe bula 24]

Umulandu uukalamba uo tulingile ukuyebelela imembu, kufwaya ukuti Lesa atutemwe