Ipepo

3 Bushe Tulingile Ukupepa Shani?

PA KUPEPA, aba mu mipepele iingi babika sana amano ku fintu bengacita, pamo nga ifyo balingile ukwikala nelyo ukwiminina, amashiwi bafwile ukusosa, na fimbi ifyo balingile ukukonka. Lelo ifi fintu te fyo Baibolo ilandapo sana, ilanda pa fintu ifyacindama nga nshi ifyo tufwile ukucita.

Baibolo yalilanda pa babomfi ba kwa Lesa aba cishinka abalepepa. Aba bantu bali ku ncende ishalekanalekana, bamo baleimininako pa kupepa e lyo bambi balefukamako. Ukulingana ne fyo ifintu fyali, bamo balepepela fye mu mutima e lyo bambi bena balepongomoka. Bamo balepunamina mu muulu e lyo bambi balekontamina pa nshi. Pa kupepa, aba bantu tabalebomfya ifipasho, bakolona, nelyo ukulabelenga mu mabuuku, lelo balelanda ifyali mu mutima. Mulandu nshi Lesa akutikile ku mapepo yabo?

Nge fyo tumwene mu cipande cifumineko, balepepa fye kuli Lesa umo, Yehova, epela. Lelo kuliko na cimbi icacindama ico balecita. Pali 1 Yohane 5:14 patila: “Uku e kucetekela uko twamucetekela, ukuti conse ico twalomba, cikulu fye nacilingana no kufwaya kwakwe, alatumfwa.” Amapepo yesu yafwile ukulingana no kufwaya kwa kwa Lesa. Bushe ici cilolele mwi?

Nga tulefwaya ukulapepa ukulingana no kufwaya kwa kwa Lesa, intanshi tufwile ukwishiba ukufwaya kwakwe. Kanshi ukusambilila Baibolo kwalicindama sana pa kuti Lesa alekutika ku mapepo yesu. Bushe ici cilolele mu kuti Lesa akakutika fye ku mapepo yesu nga twasoma Baibolo? Iyo, Lesa enekela ifwe ukusambilila ukufwaya kwakwe, ukwishiba bwino bwino ifyo afwaya, no kulacita ifintu ukulingana no kufwaya kwakwe. (Mateo 7:21-23) Amapepo yesu yafwile ukulingana ne fyo tulesambilila.

Ilyo tulesambilila pali Yehova na pa kufwaya kwakwe, icitetekelo cesu cilakoselako. Icitetekelo na co calicindama sana kabili cilakabilwa pa kuti Lesa alekutika ku mapepo yesu. Yesu atile: “Fyonse ifyo mwalomba ilyo mulepepa, nga muli ne citetekelo, mukapokelela.” (Mateo 21:22) Ukuba ne citetekelo te kusumina fye icisuminesumine. Lelo kupilibula ukusumina mu fintu ifya kuti nangu tafimoneka, fyalikwata ubushininkisho ubulanga ukuti e ko fyaba. (AbaHebere 11:1) Mu Baibolo mwaba ubushininkisho ubwingi nga nshi ubulanga ukuti nangu ca kuti Yehova tamoneka, eko aba, kuti twamucetekela, kabili alasuka amapepo ya bantu abamutetekela. Na kabili, kuti twalomba ukuti atulundileko icitetekelo, kabili Yehova alatupeela ifyo tukabila.—Luka 17:5; Yakobo 1:17.

Kuli na cimbi icacindama ico tufwile ukucita ilyo tulepepa. Yesu atile: “Takuli uwisa kuli Tata kano aishila muli ine.” (Yohane 14:6) Kanshi Yesu e nshila iyo tufwile ukupitilamo pa kupepa kuli Wishi, Yehova. E mulandu wine Yesu aebele abasambi bakwe ukulapepa ukupitila mwi shina lyakwe. (Yohane 14:13; 15:16) Ici tacilepilibula ukuti tufwile ukulapepa  kuli Yesu. Lelo, tupepa ukupitila mwi shina lya kwa Yesu, pantu e walenga ukuti tukwate ishuko lya kupepa kuli Shifwe uwa mushilo kabili uwapwililika.

Bushiku bumo, abasambi abo Yesu alesangwa nabo lyonse bamulombele ukuti: “Mwe Shikulu, tusambilisheni ifya kupepa.” (Luka 11:1) Bafwile tabalelomba ukuti abasambilishe ifyo balingile ukupepa, ifi fine twacilalandapo. Lelo balefwaisha ukwishiba ifyo balingile ukupepela. Mu nshila imbi kuti twatila baleti, ‘Finshi tulingile ukupepela?’

[Amashiwi pe bula 6]

Amapepo ayo Lesa akutikako ni yalya aya bantu abamutetekela, ayalingana no kufwaya kwakwe, kabili ayapitila mwi shina lya kwa Yesu