Ukulanshanya Ilyashi lya mu Baibolo—Bushe Lesa Aloca Abantu mu Mulilo wa Pe?

INTE SHA KWA YEHOVA balatemwa sana ukulanshanya Baibolo na bantu. Bushe kwaliba ilyashi ilyo Baibolo yalandapo ilyo mufwaisha ukwishiba? Bushe mulafwaya ukwishiba ifyo Inte sha kwa Yehova basuminamo nelyo umulandu bashicitilako ifintu fimo? Nga mulafwaya ukwishiba, mukabepushe nga bamutandalila. Bakatemwa sana ukulanshanya na imwe.

Ifi e fyo Inte sha kwa Yehova balanshanya na bantu. Natutile Nte we shina lya kuti Mauricio aya mu kushimikila pa ng’anda ya mwaume we shina lya kuti Alejandro.

Bushe Lesa Akakanda Ababifi?

Mauricio: Natemwa ukuti namusanga na lelo, ba Alejandro.

Alejandro: Na ine wine natemwa ukumumona.

Mauricio: Naletontonkanya pa fyo mwalandile umuku wafumako ilyo namutandalile.

Alejandro: Cinshi twalandilepo?

Mauricio: Mwatile mwalipapile sana ukwishiba ukuti Inte sha kwa Yehova tabasumina ukuti kwaliba umulilo wa pe.

Alejandro: Ee, kwena nalipapile sana. Kabili ukulanda fye icishinka, nalifilwa ukumfwikisha umulandu mushasuminina ukuti kwaliba umulilo wa pe.

Mauricio: Natasha nga nshi pa kunjebako ifyo mwasuminamo. Ndatemwa ukumfwa ifyo abantu batontonkanya pali uyu mulandu. Apo abantu balanda ifyapusanapusana pali ili lyashi, kamwipusheko icipusho, finshi imwe mwaishibapo pa mulilo wa pe?

Alejandro: Kwena, nasumina ukuti abantu ababipa nga bafwa balaya ku kupya mu mulilo wa pe kabili kulya e ko bacula umuyayaya.

Mauricio: Ifi mwalanda e fyo abengi basuminamo. Ba Alejandro, lekeni imwipusheko ici cipusho, bushe ifintu ifyabipa fyalimucitikilapo?

Alejandro: Ee. Umukalamba wandi umwanakashi balimwipeye. Nomba napapita ne myaka 5 ukufuma apo cacitikile.

Mauricio: Ico cabipa nga nshi. Mufwile mulabafuluka sana.

Alejandro: Ee. Ndabafuluka sana.

Mauricio: Nasanga ukuti abengi basumina ukuti umulilo wa pe e ko waba. Ne calenga mulandu wa kuti ifyo ababifi bacita filabakalifya imitima. Na kuba, abantu abo bacusha ku babifi balafwaisha ukumona ukuti ababifi bakandwa.

Alejandro: Ca cine, ndafwaisha ukuti uwaipeye nkashi yandi akakandwe.

Mauricio: Bonse kuti twafwaya ukuti umuntu wa musango uyo akandwa. Baibolo itila Lesa na o wine alomfwa ububi sana ukumona abantu ba kaele balebacusha, kabili alilaya no kuti akakanda ababifi. Moneni ifyo Baibolo ilanda pali Esaya 3:11. Patila: “We bulanda ku mubifi! —Ubucushi bwamwishila; pantu ifyo acitile e fyo bakamucita!” E co kuti twacetekela ukuti Lesa akakanda ababifi.

Alejandro: Nomba apo mulanda ukuti takwaba umulilo wa pe, ninshi Lesa akakanda shani ababifi?

Mauricio: Mwaipusha bwino. Ukulanda fye icishinka, icasuko ku cipusho cenu ca kuti Lesa alakanda ababipa pa kubonaula umuyayaya. Moneni ifyo Baibolo ilanda pali 2 Abena Tesalonika 1:9. Belengenipo mukwai.

Alejandro: Patila: “Aba bantu bakapingwilwa ukonaulwa umuyayaya ukufuma pa ntanshi ya kwa Shikulu.”

Mauricio: Mwamona ba Alejandro, ababifi nga bafwa, tabakwata isubilo. Lesa alabakanda umuyayaya. Tabakwata isubilo lya kuba aba mweo ku nshita ya ku ntanshi.

Alejandro: Kwena naumfwa ifyo ilembo lyalanda. Nomba ndemona kwati ninshi tapali umulinganya. Bonse tulafwa. Bushe te kuti ciwame nga ca kuti ababifi bena balebakanda sana ukucila pa kubepaya fye?

Cinshi Cifwaikwa pa Kuti Kube Umulinganya?

Mauricio: Ba Alejandro, namona ukuti mulafwaisha sana umulinganya.

Alejandro: Ee, ca cine sana.

Mauricio: Cili fye bwino. Pantu ilyo Lesa apangile abantu, alibapeele na kampingu. Lesa na o wine alitemwa umulinganya. Nomba, ilyo intungulushi shamapepo balesambilisha ukuti Lesa aloca abantu mu mulilo wa pe, ninshi baleti fye Lesa, taba na mulinganya.

Alejandro: Mwalosha mwi?

Mauricio: Moneni ici ica kumwenako. Bushe mwalishiba bwino ilyashi lya mu Baibolo ililanda pali Adamu na Efa?

Alejandro: Ee. Lesa abebele ukuti tabalingile ukulya icisabo ca muti umo ifi, lelo bena baliliile.

Mauricio: Mwalungika. Natubelengepo na kabili. Ili lyashi lyalembwa pa Ukutendeka 2:16, 17. Patila: “Yehova Lesa apeele ili funde ku muntu, ati: ‘Ku muti onse uwa mwi bala ukulya ulelyako no kwikuta. Lelo ku muti wa kulenga ukwishiba ubusuma no bubi kwena wilalyako, pantu mu bushiku ukalyako ukufwa ukafwa.’” Bushe Lesa atile cinshi cali no kucitika nga ca kuti Adamu aliliile icisabo bamukenye?

Alejandro: Atile Adamu ali no kufwa.

Mauricio: Mwalungika. Nomba tontonkanyeni pali ici: Ulubembu ulo Adamu acitile e lwalenga abantunse bonse balefyalwa ababembu. (Abena Roma 5:12) Nomba nangu cali ifi, bushe Lesa alilandilepo ukuti bali no kukandwa mu mulilo wa pe?

Alejandro: Awe.

Mauricio: Nomba nga ca kuti Lesa alishibe ukuti Adamu na Efa bali no kulacula mu mulilo wa pe, bushe nga tabasokele?

Alejandro: Kwena nga alibasokele.

Mauricio: Moneni na kabili ifyo Lesa aebele Adamu na Efa ilyo babembwike. Mukwai belengeni Ukutendeka 3:19.

Alejandro: Patila: “Wakulapiba pa kusanga ifya kulya mpaka ukabwelele ku mushili, pantu e ko wafumine. Pantu uli lukungu, kabili ku lukungu e ko ukabwelela.”

Mauricio: Mwabelenga bwino. Ukulingana ne fyo Lesa alandile, bushe Adamu ali no kuya kwi nga afwa?

Alejandro: Atile Adamu ali no kubwelela ku lukungu.

Mauricio: Cishinka. Nomba, bushe tamulesumina ukuti pa kulanda ati abwelele ku cifulo cimo ninshi uyo muntu aali kuli ico cifulo pa nshita imo?

Alejandro: Ee. Ni fyo fine.

Mauricio: Inga Adamu ena, ali kwi ilyo Lesa ashilamupanga?

Alejandro: Tapali nangu kumo uko aali. Taliko.

Mauricio: Mwalungika. Bushe namumona no kuti ilyo Lesa abapingwile talandilepo pa mulilo wa pe? Bushe kuti twatila cali fye bwino Lesa ukweba Adamu ukuti ali no kubwelela ku mushili uko abuulilwe uku ninshi naishiba ukuti ali no kuya ku mulilo wa pe?

Alejandro: Awe.

 Bushe Satana Alacita Ubufwayo bwa kwa Lesa?

Mauricio: Kwaliba na cimbi ico napamo twingalandapo pali ici cisambilisho ca kuti kwaliba umulilo wa pe.

Alejandro: Cinshi ico cine?

Mauricio: Cisuma, nani uo abantu batila “e wangalila” ku cifulo ukwaba umulilo wa pe? Bushe ni nani uo abantu batila e oca abantu mu mulilo?

Alejandro: Ni Satana Kaseebanya.

Mauricio: Lelo, Satana Kaseebanya e mulwani mukalamba uwa kwa Lesa. Nga ca kuti Lesa alatuma abantu kuli Satana pa kuti abacushe, bushe ico te kuti cipilibule ukuti Lesa alabombela pamo na Satana Kaseebanya?

Alejandro: Hmm. Nshabalantontonkanyapo pa cintu ca musango uyu.

Mauricio: Katulangilile. Mwalikwata umwana, te fyo?

Alejandro: Ee. Nalikwata umwana umwaume. Ali ne myaka 15.

Mauricio: Elenganyeni ukuti umwana wenu aba cintomfwa. Atendeka ukucita ifyabipa ifingi. Bushe kuti mwacita shani?

Alejandro: Kuti nafwaya ukumulungika.

Mauricio: Ukwabula no kutwishika kuti mwakosapo fye ukumwafwa ukuti abwelele mu nshila isuma.

Alejandro: Ee. Cishinka.

Mauricio: Tutile, mwaesha ukumwafwa nomba akaaninina fye ukwaluka. Mwasuka mwayumfwa ukuti tapali fimbi ifyo mwingacita, lelo mufwile fye ukumukanda.

Alejandro: Ee, kuti namukanda.

Mauricio: Nomba nga ca kutila mwaishiba ukuti kwali umuntu umo umubi uwalesambilisha umwana wenu imisango yonse iyabipa, kuti mwacita shani?

Alejandro: Uyo muntu kuti acimona.

Mauricio: Nomba apa e po ndefwaya mulandepo. Apo namwishiba ukuti uyo muntu, uwabipa e walengele ukuti umwana wenu abe ne misango iibi, bushe kuti mwaeba uyo wine muntu ukuti amukandileko umwana wenu?

Alejandro: Nakalya, te kuti ncite ifyo. Teti cilolemo.

Mauricio: Nomba bushe kuti calolamo ukulanda ukuti Lesa, e weba Satana Kaseebanya, uyu wine uulenga na bantu ukucita ifyabipa, ukuti akande abo bantu?

Alejandro: Awe, teti acite ifyo.

Mauricio: Kanshi nga teti acite ifyo, mulandu nshi Satana, umulwani mukalamba uwa kwa Lesa, engomfwila ifyo Lesa amweba ukucita no kucusha abantu mu mulilo wa pe?

Alejandro: Nshabalantontonkanyapo pa cintu ca musango uyu!

Yehova Akafumyapo Ububifi Bonse

Mauricio: Lelo mwisakamana. Lesa akonaula ababifi abashifwaya ukulapila. Napamo kuti twabelengako ilembo limo ilya kulekelesha ililelanda pali uyu mulandu. Mukwai belengeni Amalumbo 37:9.

Alejandro: Patila ifi: “Incitatubi shikaloba, Lelo abalolela Yehova e bakekala mu calo.”

Mauricio: Cawama. Bushe namumona ico Yehova ali no kucita ku babifi bonse?

Alejandro: Baibolo yatila Lesa akabalofya.

Mauricio: Ca cine. Mu mashiwi yambi kuti twatila akabonaula umuyayaya. Lelo abantu abasuma, e kutila “abalolela Yehova” bakaipakisha ubumi bwa muyayaya pano calo. Napamo ici cishinka kuti calenga abantu ukwipusha amepusho ayengi. Ku ca kumwenako, mu kubalilapo fye, mulandu nshi Lesa talesesha abantu ukucita ifyabipa? Kabili nga cine cine alafwaisha ukukanda abantu ababipa, mulandu nshi tabakandila inshita yonse iyi?

Alejandro: Aya mepusho yaumfwika bwino.

Mauricio: Nalimo kuti namulanga amasuko ya mu Baibolo kuli aya mepusho ilyo tukakumana na kabili. *

Alejandro: Nkatemwa sana.

[Futunoti]