Bushe Kwaliba Icilonganino ca Mapepo Ico Mwingacetekela?

Nga ca kuti mwalifuupulwa pa mulandu wa ficitika mu mipepele imo, nalimo kuti camukosela ukucetekela imipepele imbi. Lelo mufwile ukwishiba ukuti kwaliba icilonganino ca mapepo ico mwingacetekela. Ilyo Yesu ali pano calo, alikwete abasambi aba cishinka abo asambilishe ukulakonka amafunde ya kwa Lesa. Na lelo line kwaliba abasambi ba kwa Kristu aba cishinka, ababikako sana amano ku kukonka amafunde ya kwa Lesa. Ni bani aba bene?

Ba Estelle abo twalandilepo mu cipande ca bubili batile: “Ilyo natendeke ukusambilila ne Nte sha kwa Yehova, e lintu natampile ukwishiba Baibolo. Nalyumfwikishe amashiwi yaba pali Yohane 8:32 apatila: ‘Mukeshiba icine, ne cine cikamulenga ukuba abantungwa.’”

Ba Ray abo twalandilepo kale, na bo batile: “Ilyo nalesambilila ne Nte sha kwa Yehova, e lyo naishibe ukuti kanshi Lesa te ulenga ukuti abantunse balecula. Nalitemwa sana ukwishiba ukuti nangu ca kuti Lesa alisuminisha ukucula, kwaliba umulandu acitila ifi kabili alilaya no kuti nomba line akafumyapo ukucula konse.”

Ukucita icalungama kwalyafya nga ca kuti abengi balecita ifyabipa. Na lyo line kuti mwacita icalungama. Abantu abengi balafwaya aba kubafwa pa kutila bomfwikishe ifyaba mu Baibolo e lyo no kulafikonka. E mulandu wine Inte sha kwa Yehova basambilishisha abantu abengi Baibolo ukwabula ukubalipilisha. Cila mulungu, abantu abengi balasambilila ifyaba mu Baibolo kabili filabalenga ukupalama kuli Kabumba wabo no kuba aba nsansa. *

Ilyo mukamonana ne Nte sha kwa Yehova mukabepushe umulandu bacetekelela imipepele yabo. Fwailisheni pa kuti mwishibe ifyo basambilisha e lyo ne fyo baaba. Nga mwacita ifi e lyo mwingeshiba nga kwaliba icilonganino ca mapepo ico mwingacetekela.

[Futunoti]

[Amashiwi pe bula 7]

Mukepushe Inte sha kwa Yehova umulandu bacetekelela imipepele yabo