UKULANSHANYA ILYASHI LYA MU BAIBOLO

Bushe Lesa Alasakamana Nga Tulecula?

Ifi e fyo Inte sha kwa Yehova balanshanya na bantu. Natwelenganye ukuti ba Michelle baya pa ng’anda ya ba Sophia mu kubashimikila.

CINSHI LESA ENGALEKELA ICA MUSANGO UYU UKUNCITIKILA?

Michelle: Mwabombeni mukwai. Ine nine Michelle.

Sophia: Na ine nine Sophia.

Michelle: Ba Sophia, lelo ndelanshanya na bantu ba kuli ino ncende ifili muli iyi trakiti iileti, Bushe Kuti Mwatemwa Ukwishiba Icine? Na imwe kuti mwasendako trakiti imo.

Sophia: Bushe mulefwaya ukulanda na ine pa fya mipepele?

Michelle: Ee. Lolesheni pa fipusho 6 ifili pali iyi trakiti. Fipusho nshi pali ifi, ifyo—

Sophia: Namwishiba, muleipoosela fye inshita ukulanda na ine.

Michelle: Cinshi mwalandila ifyo?

Sophia: Ukulanda fye cishinka, imona kwati Lesa takwaba.

Michelle: Natemwa sana pa kuti mwalanda mu bufumacumi. Nomba, bushe ifi fine e fyo mwaishiba ukutula fye na kale?

Sophia: Awe iyo, ilyo nali umwaice naleya ku calici. Lelo, kale naleka ukuyako.

Michelle: Kwena ico njishile kuno ba Sophia te kumupatikisha ukusumina ifyo nasuminamo, ndefwaya fye ukulanshanya na imwe ifyo Baibolo isambilisha. Bushe kwaliba icacitike icamulenga ukuti muletwishika nampo nga Lesa e ko aba?

Sophia: Ee, bamayo baali mu busanso bwa pa musebo. Nomba napapita ne myaka 17 apo ifi fyacitikiile.

Michelle: Awe ico cena cabipa. Bushe bali-icenene?

Sophia: Ee, na kuba balilemana.

Michelle: Iyee! Mufwile mulomfwa ububi sana.

Sophia: Ee, e mulandu wine ntontonkanishisha ukuti, nga ca kuti Lesa e ko aba, mulandu nshi alekela ica musango yu ukuncitikila? Mulandu nshi alekela ukuti tulecula umusango yu?

BUSHE CALIBA FYE BWINO UKUFWAYA UKWISHIBA ICO TUCULILA?

Michelle: Tacabipa ukuyumfwa ifi ba Sophia na kabili tacalubana ukwipusha amepusho ya musango yu nga twacula. Na kuba, nangu fye baume na banakashi ba citetekelo abaliko kale, na bo baletontonkanyapo pa co Lesa alekela tulecula.

Sophia: Kanshi na bo baletontonkanyapo?

Michelle: Ee. Bushe kuti mwatemwa ukumfwa ifyo aba bantu balandapo?

Sophia: E mukwai kuti natemwa.

Michelle: Umfweni ifyo kasesema wa cishinka Habakuki aipwishe Lesa, ifyaba pali Habakuki icipandwa 1, ifikomo 2 na 3: “Kufika lilali, mwe Yehova, ndelila ukuti mungafwe, na imwe ukuumfwa iyo? Kufika lilali ndebilikisha kuli imwe ukuti mumpusushe ku bunkalwe, na imwe ukupususha iyo? Cinshi ico munengela ukumona icabipa?” Bushe amepusho mwakwata nayapalana na yo Habakuki aipwishe?

Sophia: Ee nayapalana.

Michelle: Lesa takalipiile Habakuki pa fyo amwipwishe kabili tamwebele ukuti takwete icitetekelo icakosa.

YEHOVA TOMFWA BWINO NGA TULECULA

Michelle: Baibolo itusambilisha ukuti Lesa alamona nga tulecula kabili alatusakamana.

Sophia: Mwalosha mwi?

 Michelle: Lekeni imulangeko ifyaba pa Ukufuma 3:7. Bushe kuti mwatemwa ukubelenga pali ili ilembo?

Sophia: Mukwai cili fye bwino. Patila: “Kabili Yehova atile: ‘Nimona ukucula kwa bantu bandi abali mu Egupti, kabili ning’umfwa ukulilishika kwabo pa mulandu wa babapatikisha ukubomba; pantu ninjishiba ukukalipwa balekalipwa.’”

Michelle: Mwabelenga bwino. Ukulingana na ili ilembo, bushe Lesa alamona abantu bakwe nga balecula?

Sophia: Ee, afwile alamona.

Michelle: Lesa alamona fye fyonse ificitika. Moneni na kabili amashiwi ya kulekeleshako muli ici cikomo. Lesa atile: “Ninjishiba ukukalipwa balekalipwa.” Bushe aya amashiwi yalelanga ukuti Lesa tatubikako amano?

Sophia: Awe, iyo.

Michelle: Lesa tamona fye amafya tukwata, lelo alomfwa no bubi nga tulecula.

Sophia: Ca cine.

Michelle: Apo nomba twaishiba ukuti Lesa alamona amafya tukwata kabili tomfwa bwino nga tulecula, kanshi natubelenge ilembo na limbi ililanda pa fyo abantu ba kwa Lesa baculile. Ilembo lya kwa Esaya 63:9. Amashiwi ya kubalilapo muli ici cikomo yatila: “Lyonse ilyo balecula, na o alecula.” Bushe kuti mwatila Lesa alitemenwe ukumona uko abantu bakwe balecula?

Sophia: Awe, afwile tatemenwe.

Michelle: Ba Sophia, Lesa alatusakamana icine cine kabili tomfwa bwino nga tulecula. Nga tulecula na o alacula.

MULANDU NSHI ASHAFUMISHAPO UKUCULA?

Michelle: Ilyo nshilaya, kuli icintu na cimbi ico ndefwaya ukulanshanya na imwe.

Sophia: Mukwai cili fye bwino kuti mwalanda.

Michelle: Moneni ifyo Baibolo itusambilisha pa maka Lesa akwata. Ilembo ndefwaya ukuti tubelenge ni Yeremia 10:12. Bushe kuti mwatemwa ukulibelenga?

Sophia: Mukwai kuti nabelenga. Patila: “E wapangile isonde ku maka yakwe, kabili e wapampamike icalo ku mano yakwe, ayanshile imyulu ku mucetekanya wakwe.”

Michelle: Mwabelenga bwino. Nomba bushe Lesa alekabila amaka sana pa kuti apange umuulu ne calo na fyonse ifyabamo?

Sophia: Ee, afwile alekabila sana amaka.

Michelle: Nomba, nga ca kuti Lesa alikwata amaka ya kupanga fyonse ifyo tumona, bushe kuti afilwa ukufumyapo ukucula?

Sophia: Awe teti afilwe.

Michelle: Nomba ba Sophia, mulandu nshi mumfwila ububi ukumona banyinenwe balecula?

Sophia: Pantu ni bamayo kabili nalibatemwa.

Michelle: Nga ca kuti mwalikwete amaka ya kubondapa, bushe te kuti mubondape?

Sophia: E fyo ningacita.

Michelle: Tusambilila mu Baibolo ukuti, Lesa alamona ifyo tucula no kuti alomfwa ububi nga tulecula kabili alikwata na maka sana. Kanshi Lesa afwile alashipikisha sana ukukanacitapo cimo nga amona tulecula.

Sophia: Nshaishibe ukuti kanshi Lesa alomfwa ububi nga tulecula.

Michelle: Bushe kwaliba ifyalenga ukuti elacitapo fimo nga amona tulecula? *

Sophia: Ee, kufwile kwaliba ifyalenga.

Michelle: Naumfwa kwati foni yenu ilelila, lekeni inkese ubushiku bumbi pa kuti tukesetwalilila ukulanshanya.

Sophia: Natasha sana. Kuti natemwa sana ukuti mukabwele. *

Bushe kwaliba ilyashi ilyo Baibolo yalandapo ilyo mufwaisha ukwishiba? Bushe mulafwaya ukwishiba ifyo Inte sha kwa Yehova basuminamo nelyo umulandu bashicitilako ifintu fimo? Nga mulafwaya ukwishiba, mukabepushe nga bamutandalila. Bakatemwa sana ukulanshanya na imwe.

[Amafutunoti]