“Natusanga Mesia”!

Ilyo papitile imyaka 400 ukutula apo ibuuku lya kwa Malaki lyalembeelwe, ifyo Mika asobele pali Mesia fyalifikilishiwe. Yesu alifyelwe mu Betelehemu. Lyena mu 29 C.E., ninshi napapita ne myaka nalimo 30, ifyo Daniele na o asobele pali Mesia fyalifikilishiwe. Yesu alibatishiwe kabili Lesa alimusubile no mupashi wa mushilo ukuba Mesia. Pa nshita ilya ine fye casobelwe, Mesia nelyo Umwana uo abantunse balelolela pa nshita ntali, alisukile amoneka.

Tapakokwele Yesu alitendeke “ukubila imbila nsuma ya bufumu bwa kwa Lesa.” (Luka 8:1) Nga fintu casobelwe, Yesu aali uwa luse, uwanakilila kabili alelangulukilako sana abantu bambi. Ifyo alesambilisha fyaleafwa sana abantu kabili aleposha na bantu abali “ne misango yonse iya ntenda.” Ifi fyonse alecita, fyalelanga ukuti Lesa e wamutumine. (Mateo 4:23) Abantu ba mishinku yalekanalekana balitemenwe sana Yesu, e mulandu wine balandiile amashiwi umusambi wa kwa Yesu umo alandile ukuti: “Natusanga Mesia”!—Yohane 1:41.

Yesu alisobele ukuti ilyo Ubufumu bwakwe bushilatendeka ukuteka, mu calo mukaba inkondo, ifinkukuma e lyo na mafya yambi ayengi. Acincishe abantu bonse ‘ukulalola.’—Marko 13:37.

Nangu ca kuti Yesu aali uwapwililika kabili alitwalilile ukuba uwacumfwila kuli Lesa, abalwani bakwe balisukile bamwipaya. Imfwa yakwe yalilenga twakwata ishuko ilyo Adamu na Efa bapanishe ilya kwikala umuyayaya mu Paradaise.

Ifyasobelwe pali Yesu fyalifikilishiwe ilyo Yesu afwile no kubuushiwa pa numa ya nshiku shitatu kabili Lesa alimupeele amaka. Pa numa ya kubuuka, Yesu alimonekele ku basambi bakwe abacilile pali 500. Kabili ilyo ashilaya ku muulu, alyebele abasambi bakwe ukushimikila imbila nsuma pali ena no Bufumu bwakwe ku “ba nko shonse.” (Mateo 28:19) Bushe balishimikiile ku bantu ba mu nko shonse?

—Ifi ifyebo fifumine mwi buuku lya kwa Mateo, Marko, Luka, Yohane, na 1 Abena Korinti.