Baibolo ilatweba ukwabula no kupita mu mbali ifyo Yehova no Mwana wakwe Yesu Kristu bakacita pa kuti bakafumyepo ukucula uko Satana Kaseebanya aleta pano calo. Baibolo ilanda ukuti “Ni pali uyu mulandu Umwana wa kwa Lesa amonekele, pa kuti onaule imilimo ya kwa Satana Kaseebanya.” (1 Yohane 3:8) Yesu akonaula imitekele ya bantunse iya muno nshiku umwaba bukaitemwe, ulupato e lyo ne micitile imbi iyabipa. Yesu alilaya no kuti “kateka wa pano calo” e kutila Satana Kaseebanya “bakamupoosa ku nse.” (Yohane 12:31) Apo Satana takakwate amaka ya kupumfyanya abantu, kanshi abantu abalungama bakekala mu calo icipya umukaba umutende.—2 Petro 3:13.

Finshi fikacitika ku bantu abakaana ukwalula imibele yabo kabili abatwalilila ukucita ifyabipa? Tontonkanyeni pali ubu ubulayo ubutila: “Abalungama e bakekala pa calo, na ba kaele e bakashalapo. Lelo ababifi, bakalofiwa mu calo; na ba bufi, bakabafumpulamo.” (Amapinda 2:21, 22) Takwakabe abantu ababipa abakalatunka abanabo ukucita ifyabipa. Ilyo icalo cikaba ifi, abantunse abacumfwila bakalalubuka panono panono ku lubembu ulo bapyana.—Abena Roma 6:17, 18; 8:21.

Bushe Lesa akafumyamo shani ububifi mu calo cipya? Takapoke abantu amaka ya kuisalila pa kuti bekalacita ifintu nga amaroboti. Lelo akasambilisha abantu abacumfwila ukulacita ifyo afwaya no kubafwa ukuleka ukutontonkanya pa fyabipa e lyo no kulacita ifyabipa.

Finshi Lesa akacita pa macushi abantu bakwata ayabula ukwenekela? Alilaya ukuti nomba line Ubufumu bwakwe bukalateka icalo conse. Yesu Kristu Imfumu iyo Lesa asonta iya Bufumu bwakwe, alikwata amaka ya kundapa abalwele. (Mateo 14:14) Yesu alikwata maka pa fyabumbwa nangu fye ni pa nkuuka. (Marko 4:35-41) E ico takwakabe ukucula pa mulandu wa “nshita ya fintu fyabula ukwenekela.” (Lukala Milandu 9:11) Ilyo Kristu akalateka, abantu tabakalecula.—Amapinda 1:33.

Cikaba shani ku bantu abengi abafwa? Ilyo Yesu ashilabuusha cibusa wakwe Lasaro atile: “Nine kubuuka kabili umweo.” (Yohane 11:25) Cine cine Yesu alikwata amaka ya kubuusha abafwa!

Nga ca kuti mwatemwa ifyo mwasambilila ukuti abantu abacita ifisuma tabakalecula ku fintu fyabipa, kuti cawama mwasambilila na fimbi muli Baibolo pali Lesa wa cine e lyo ne fyo afwaya. Inte sha kwa Yehova uko mwikala bakatemwa sana ukumwafwa ukusambilila ifingi pali Lesa. Mukwai tulemukoselesha ukwipusha ba Nte uko mwikala nelyo ukulembela abasabankanya ino Magazini.