Bushe Lesa akaleka fye abantu ukulacusha abantu banabo pa kuti baleba fye no mwenso? Awe, nga fintu tumfwile, akafumyapo ukucula no mutitikisha. Lesa uwabumbile abantu ne calo afwaya twaishiba ukuti inshita ya kufumyapo ifyabipa naipalama. Finshi acita pa kutila twishibe ukuti impela naipalama?

Natulangilile: Nga muli mu motoka, ilingi line mulafwaya ukubomfya mapu nelyo ifyebo fimbi ifyo baleemba pa kuti mwishibe bwino uko muleya. Nga mwatendeka ukumona ifishibilo ne fipampa ifyo bamulangile pali mapu, kuti mwatemwa sana pantu ninshi mwaishiba ukuti mwalafika. Ifi fine e fyo Lesa acita kuli ifwe, alitupeela Icebo cakwe icilanda pa fishibilo ifikacitika ku ntanshi. Nga twamona uko ifi ifishibilo filefikilishiwa, tulashinikisha ukuti tuli ku mpela ya nshiku sha kulekelesha.

Icebo ca kwa Lesa cilondolola ukuti ifintu mu calo fikabipa sana ukufika fye na ku mpela. Ifikalacitika mu calo ne fyo ifintu fikaba pali ilya nshita, ni filya ifishacitikapo ukutula apo Lesa abumbiile icalo. Natulande pali fimo fimo ifikalacitika ifyo Icebo ca kwa Lesa calandapo.

1. IFYABIPA IFICITIKA MU CALO Ubusesemo bwaba mwi buuku lya kwa Mateo icipandwa 24, bwalilanda pa fyo twingeshibilako ukuti tuli mu nshita ya ku mpela, kabili ifi ifishibilo filanga ukuti “icalo cili ku mpela” no kuti “impela ikesa.” (Ifikomo 3, 14) Ibuuku lya kwa Mateo lyalilanda pa nkondo ishikalamba, ifipowe, ifinkukuma mu ncende shimo shimo, ukufulisha kwa bubifi, abantu ukukanatemwana e lyo na bashimapepo ukulalufya abantu abengi. (Ifikomo 6-26) Na kuba, ifintu ifyabipa filacitika pa myaka iingi. Apo impela ilepalama, ifi fyonse ifyabipa filacitika mu calo, kabili pali ifi paliba ne fishibilo na fimbi fitatu ifyo twalalandapo.

2. IMIBELE YA BANTU Baibolo isosa ukuti “inshiku sha kulekelesha,” ni nshita ilyo ifintu fyabipa ifikalenga impela ukwisa fikalacitika, ikaba ni nshita ilyo imibele ya bantu ikabipisha. Baibolo itila: “Abantu bakaba abaitemwa, abatemwa indalama, aba mataki, aba matutumuko, aba miponto, abashumfwila abafyashi babo, abashitasha, abashaba na cishinka, abashatemwa abantu, abashifwaya ifipangano, aba lwambo, abashailama, abankalwe, abashatemwa ubusuma, abafutuka abanabo, bamunshebwa, aba cilumba, abatemwa ukwangala ukucila ukutemwa Lesa.” (2 Timote 3:1-4) Twalishiba ukuti ukutula fye na kale, abantu tabacindika abantu banabo, lelo muli shino “nshiku shakulekelesha,” abantu nabacilamo ukukanaba no mucinshi, e co Baibolo ilandila ukuti tuli mu “nshita ishayafya nga nshi.” Bushe na imwe mulamona ukuti imibele ya bantu naibipa sana?

3. ABANTU NABONAULA ICALO Baibolo itila Lesa “akonaula abaleonaula isonde.” (Ukusokolola 11:18) Finshi abantu bacita pa konaula icalo? Baibolo yalilanda pa fyalecitika mu nshiku sha kwa Noa. Itila: “Pano isonde palyonaike kabili pafulile ubunkalwe. Kabili Lesa aloleshe pe sonde, kabili moneni! palyonaike.” E ico Lesa alandile pa bantu babipa ati: ‘Nalabonaula.’ (Ukutendeka 6:11-13) Bushe mulamona ifyo ububifi bwafula pano calo? Na kabili, abantu balacita ifintu ifyabipa ifingalofya fye na bantu bonse pa calo. Balalwa inkondo ukubomfya ifyanso ifikali. Abantu balonaula icalo pa kufwaya ukupwilikisha fimo. Balakowesha umwela tupeema, balepaya inama, balatemaula ifimuti, e lyo balakowesha na menshi ya muli fibemba.

 Yipusheni amuti, ‘Bushe abantu balikwetepo ifyanso ifingonaula icalo pa myaka 100 iyapitapo?’ Lelo pali ino nshita, abantu balapanga no kubomfya ifyanso ifikali kabili balonaula ne calo. Abantu balapanga ifintu ifya kuti limo limo balafilwa ukupwisha amafya ayesa pa mulandu wa kupanga ifyo ifintu. Abantu abene te kuti beshibe ifya kupwisha aya amafya. Ilyo ifya mweo fyonse tafilaonaulwa pa calo, Lesa takalekepo fye, lelo akonaula bonse abaleonaula icalo. Ifi e fyo Lesa atulaya.

4. UKUBILA IMBILA NSUMA ICALO CONSE Baibolo yalilandapo pa cishibilo na cimbi icikacitika mu nshita ya mpela. Yatila: “Imbila nsuma iyi iya Bufumu ikabilwa ku bantu bonse aba pe sonde ku kuba ubunte ku nko shonse; e lyo impela ikesa.” (Mateo 24:14) Iyi imbila nsuma ikabilwa sana ukucila ifyo bashimapepo baesha ukongola abantu pa myaka iingi iyapitapo. Mu nshiku sha kulekelesha, abantu bakabila sana “imbila nsuma iyi iya Bufumu.” Bushe mwalishibako amabumba ya bamapepo ababila iyi imbila nsuma? Nga eko baaba, bushe bashimikila fye ku fifulo bekalila nelyo bushe balashimikila imbila nsuma “ku bantu bonse aba pe sonde”?

Pali Webu saiti yesu iya www.mt1130.com/bem paliba ifyebo ifilanda sana pa “mbila nsuma iyi iya Bufumu.” Pali iyi Webu saiti, paliba impapulo ishilanda pa mbila nsuma mu ndimi ukucila pali 700. Bushe mwalishibako fimbi ifyo ba Nte bacita pa kuti baleshimikila sana iyi mbila nsuma iya Bufumu mu calo conse? Ilyo bashilatendeka ukubomfya Intaneti pa kushimikila, ba Nte baishibikwe ukuti balebombesha sana ukushimikila imbila nsuma pa Bufumu bwa kwa Lesa. Ukutula fye mu 1939, pa Ulupungu lwa kwa Kalinda lyonse palaba amashiwi yatila “Ulusabankanya Ubufumu bwa kwa Yehova.” Magazini iilanda pa mipepele yalanda pa mulimo wa kushimikila ba Nte babomba ukuti “takwaba abashimikila sana nge fyo ba Nte bashimikila.” Ukushimikila sana imbila nsuma kulanga fye ukuti nomba line fye, “impela ikesa” ilyo Ubufumu bwa kwa Lesa bukafumyapo ifyabipa.

Bushe mwalimona ukuti ifintu 4 ifyo Baibolo yalandapo, ifilanga ukuti tuleikala mu nshita ya mpela, filacitika? Pa myaka ukucila pali 100, muli ino magazini mulaba ifyebo ifilanda pa ficitika mu calo ifilenga ababelenga ino magazini ukuimwena abene ukuti cine cine inshita ya mpela naipalama. Na lyo line, abalengulula bena  balakaana ukuti tatuli mu nshita ya mpela, pantu batila ifipendo na malyashi ya filecitika mu calo kuti fyaba ifya bufi. Balanda no kuti, mu calo abantu nabakwata inshila isha kumfwaninamo ishingi, ne ci cilenga tulemona kwati ifintu filebipilako fye. Na lyo line, ifyabipa ifingi ifilecitika mu calo, filanga fye ukuti cine cine tuleikala mu nshita ya mpela kabili iyayafya.

Abasambilila sana bamo balimona ukuti tuleikala mu nshita ya mpela. Ku ca kumwenako, mu 2014, muli magazini imo mwali icipande ico balembeele akabungwe ka United Nations Security Council ukuti kuli ifintu ifyabipa ifili no kucitikila abantu. Abalemba iyi magazini balandile no kuti: “Nga twatontonkanya pali ifi ifyabipa ifili no kucitika, filelenga tulemona ukuti ifya kupangapanga fikaleta ubwafya ubukalamba.” Abantu abengi balishininkisha ukuti tuleikala mu nshiku sha kulekelesha. Abalemba ino magazini na baibelenga balishininkisha ukuti shino ni nshiku sha kulekelesha kabili ishaibela ishilelanga ukuti impela naipalama. E co mu nshita ya kuba no mwenso, mufwile ukutemwa pa fikacitika pantu kuti mwaisapusuka ilyo impela ikesa!