Bushe nga mwaumfwa amashiwi ya kuti, “Impela naipalama!” finshi mutontonkanyapo? Bushe mutontonkanya pali shimapepo uwiminine ku ntanshi mu calici alepepesha ninshi alepundisha, aleimya amaboko pa kulanda kabili naikata na Baibolo? Nelyo bushe mutontonkanya pali shikulubantu uufwele umwingila kabili nakaka no mushipi ninshi naiminina mu musebo e lyo nakwata akapampa apo balembele ati icalo cili mu kupwa? Ukutontonkanya pa fya musango uyu kuti kwalenga abantu bamo ukulasakamana e lyo bambi kuti balatwishika nelyo ukulapapa pa fikacitika.

Baibolo yalilanda ukuti: “Impela ikesa.” (Mateo 24:14) Iyi impela baita no kuti “ubushiku bukalamba ubwa kwa Lesa” nelyo “Armagedone.” (Ukusokolola 16:14, 16) Aba mu mipepele iingi basambilisha ifyalekanalekana nga balelanda pa kupwa kwa calo kabili ici cilenga abantu ukusakamikwa. Nangu cibe ifyo, Baibolo yalilondolola pa fikacitika ne fishakacitike ilyo impela ikesa. Icebo ca kwa Lesa cilatwafwa ukwishiba nampo nga impela naipalama nelyo iyo. Baibolo ilatweba ne fyo tulingile ukulacita pa kuti tukapusuke. Natubale tulande pa fyo Baibolo yalanda ifilenga twaishiba ifikacitika ilyo impela ikesa. Bushe Baibolo yalanda ukuti “impela” ni cinshi?

1. ILYO IMPELA IKESA, ICALO TACAKAPYE KU MULILO UUKALAMBA.

   Baibolo itila: “[Lesa] ashimpile isonde pa cifulo ca liko icapampamikwa; talyakatelentenshiwe umuyayaya, umuyayaya.” (Amalumbo 104:5) Ili ilembo na malembo yambi yalenga twashininkisha ukuti Lesa takonaule icalo kabili takaleke abantu ukuconaula umuyayaya!—Lukala Milandu 1:4; Esaya 45:18.

2. IMPELA IKESA FYE PA BUSHIKU UBO LESA APEKANYA.

   Baibolo ilanda ukuti Lesa alibika inshita ilyo akaleta impela. Itila: “Lelo takuli uwaishiba ubushiku bulya nelyo inshita, nangu fye ni bamalaika mu muulu nangu fye Mwana, kano Tata e waishiba. Cenjeleni, mulelola, pantu tamwaishiba inshita ifi fikacitika.” (Marko 13:32, 33) Ukwabula no kutwishika, Lesa (‘Wishi’) alibika “inshita” ilyo impela ikesa.

3. ABANTU NELYO IFIMABWE IFIBUTUKISHA MU MUULU TE FIKALENGA IMPELA UKWISA.

   Cinshi cikalenga impela ukwisa? Baibolo pa Ukusokolola 19:11 itila: “Namwene umuulu waisuka, kabili moneni kabalwe uwabuuta. No waikelepo etwa ati Uwa Cishinka kabili Uwa Cine.” Icikomo 19 cilanda ukuti: “Kabili namwene iciswango ne shamfumu sha pe sonde na mabumba ya shiko nafilongana ku kulwa no waikala pali kabalwe ne bumba lyakwe.” (Ukusokolola 19:11-21) Nangu ca kuti pali ifi ifikomo babomfya amashiwi ya mampalanya, ifi fikomo filatwafwa ukwishiba ukuti: Lesa akatuma bamalaika ku konaula abalwani bakwe.

1. AMABUTEKO YA BANTUNSE YONSE YAKONAULWA.

   Baibolo itila: “Lesa wa mu muulu akemya ubufumu [ubuteko] ubushakonaulwe nakalya. Kabili ubo bufumu tabwakashiilwe ku bantu bambi. Bukashonaula no kupwisha aya mabufumu yonse,  kabili bwena bukeminina umuyayaya.” (Daniele 2:44) Nga fintu tulandilepo mu cishinka ca butatu, ubufumu bukafumyapo ‘ishamfumu sha pe sonde na mabumba ya shiko abakalongana ku kulwa no waikala pali kabalwe ne bumba lyakwe.’—Ukusokolola 19:19.

2. INKONDO, ULUKAAKALA NO LUFYENGO FIKAPWA.

   Baibolo isosa ukuti: “[Lesa] alelenga inkondo ukupwa ukufika ku mpela sha pano isonde.” (Amalumbo 46:9) Ilanda no kuti: “Abalungama e bakekala pa calo, na ba kaele e bakashalapo. Lelo ababifi, bakalofiwa mu calo; na ba bufi, bakabafumpulamo.” (Amapinda 2:21, 22) Yalanda no kuti: “Moneni! Ndelenga ifintu fyonse ukuba ifipya.”—Ukusokolola 21:4, 5.

3. IMIPEPELE IIFULWISHA LESA KABILI IISAMBILISHA IFYA BUFI IKAPWA.

   Baibolo itila: ‘Bakasesema basesema ifya bufi; na bashimapepo ku maka yabo banyantilila abantu. . . . Kanshi cinshi mukacita impela nga yaisa?’ (Yeremia 5:31) Baiboo yalanda no kuti: “Abengi muli bulya bushiku bakatila kuli ine, ‘Mwe Shikulu, mwe Shikulu, bushe tatwasesemene mwi shina lyenu, no kufumisha ifibanda mwi shina lyenu, no kucitila ifipesha amano ifingi mwi shina lyenu?’ Lelo nkabebelapo nkatila: ‘Nshatalile imwishiba! Fumeni apa, mwe bampulamafunde mwe!’”—Mateo 7:21-23.

4. ABANTU ABAIBIKA MU FIKANSA FYA CALO BAKONAULWA.

   Yesu Kristu atile: “Ico abantu bapingwilwapo ni ci, ulubuuto lwaisa pano calo lelo abantu batemwa imfifi ukucila ulubuuto, pantu imilimo yabo ibi.” (Yohane 3:19) Baibolo yalilandapo pa bonaushi ubwacitike mu calo conse mu nshita ya kwa Noa, umulungami. Itila: “Lesa aonawile aba cilya calo ku menshi ilyo acibunshishe mu lyeshi. Lelo kwi shiwi limo line imyulu ne sonde ifya nomba fyasungilwa umulilo kabili fyasungilwa ubushiku bwa bupingushi kabili ubwa konaula abantu abashipepa.”—2 Petro 3:5-7.

Moneni ukuti “ubushiku bwa bupingushi kabili ubwa konaula” babulinganya ku bonaushi bwa “calo” ubwacitike mu nshiku sha kwa Noa. Calo nshi ico Lesa aonawile? Icalo twikalamo tacaonawilwe, lelo “abantu abashipepa,” e kutila abalwani ba kwa Lesa, ebo “aonawile.” Mu bushiku bwa kwa Lesa “ubwa bupingushi,” abalwani ba kwa Lesa bonse bakonaulwa, lelo abatemwa Lesa bakapusuka nga filya Noa no lupwa lwakwe bapuswike.—Mateo 24:37-42.

Elenganyeni ifyo icalo cikawama ilyo Lesa akafumyapo fyonse ifyabipa. Kanshi kuti twatila, ifyo Baibolo ilanda ukuti impela ya calo ikesa ni mbila nsuma, te mbila ya bulanda iyo. Nalimo kuti mwayipusha amuti: ‘Bushe Baibolo yalilandapo ilyo impela ikesa? Bushe naipalama? Finshi mfwile ukulacita pa kuti nkapusuke?’