Ba Paul, abakwata abakashi na bana babili batile: “Ilyo amaka ya ndalama yabwelele pa nshi mu calo cesu, ifya kulya fyalikwete sana umutengo kabili fyalicepele. Twaletantama pa kushita ifya kulya, lelo ilingi line, fyalepwa ninshi tatulashita no kushita. Abantu balyondele sana ku nsala kabili bambi balefwa ne cipuupu. Imitengo ya fintu yalininine sana. Na mu kulekelesha, twalilekele ukubomfya indalama sha mu calo cesu pantu tashakwete amaka, ne ci calengele indalama nakwete ku banki, isha inshuwalansi ne sha penshoni ukuya fye mu menshi.”

Ba Paul balishibe ukuti balingile ukubomfya “amano yene yene” pa kuti aba mu lupwa lwabo befwa ku nsala. (Amapinda 3:21) Batile: “Nalebomba incito ya fya malaiti, lelo natendeke ukubomba incito iili yonse iyo nalesanga nangu ca kuti indalama balendipila shalecepa sana. Bamo balendipila ifya kulya nelyo ifipe fya mu ng’anda. Nga bandipila sopo 4, twalebomfyapo ibili e lyo ibili twashitisha. Nasukile nashita utukoko 40. Ilyo utukoko twakulile, nalishitishe no kushitamo utukoko na tumbi 300. Ilyo papitile inshita, nalikabwishe inkoko 50 na masaaka ya bunga yabili ayalefina amakilogramu 50 isaaka limo. Twalibomfeshe ubu bunga na ba lupwa lwandi pa nshita ntali.”

Ba Paul balishibe ukuti icintu icacindama ico twingacita, kucetekela Lesa. Lesa akulatwafwa nga tulecita ifyo atweba. Nga tulefwaya ukukwata ifyo tukabila mu mikalile yesu, tufwile ukumfwila ifyo Yesu atwebele. Atile: “Mwilasakamikwa iyo; pantu . . . Shinwe alishiba ukuti mulakabila ifi fintu.”—Luka 12:29-31.

Ica bulanda ca kuti, umulwani mukalamba uwa kwa Lesa, Satana Kaseebanya, alalufya abantu kabili afwaya balebika sana amano ku fyo bakabila. Abantu balasakamikwa sana pa fintu ifingi ukubikako fye ne fishakacitike kabili balafwaisha no kukwata ne fyo bashikabila. Abengi balakongola indalama, lelo balesa mu kwishiba ukuti, “uukongola musha ku o akongolako.”—Amapinda 22:7.

 Ifyo abantu bamo basalapo ukucita, tafiba bwino. Ba Paul balanda ukuti: “Abena mupalamano besu abengi balishiile balupwa ne fibusa no kuya ku fyalo fimbi pa kuti baleikala bwino. Bambi tabakwete ne fipepala fya kwikalila mu fyalo fimbi, ne ci calegele bafilwa ukwingila incito. Aba bantu balefisama nga bamona bakapokola kabili balelaala fye mu misebo. Cimoneka kwati aba bantu tabaletontonkanya no kuti Lesa kuti abaafwa. Lelo ifwe twasalilepo ukuti Lesa eo atwafwe ukupwisha amafya ya ndalama capamo no lupwa.”

Ba Paul batwalilila ukushimika abati: “Yesu atile: ‘Mwilasakamikwa pa bushiku bwa mailo, pantu ubwa mailo bukaba na masakamika ya buko. Amafya ya mu bushiku bumo yalilinga kuli ubo bwine bushiku.’ E ico, cila bushiku nalepepa kuli Lesa ukuti ‘tupeeleni lelo ifya kulya ifya buno bushiku’ pa kuti twifwa ku nsala. Lesa aleyasuka amapepo yesu nga filya fine Yesu atwebele. Ilingi line, ifya kulya twalelya ni filya ifyo tushatemenwe. Bushiku bumo, nalitanteme ukuti nshiteko ifya kulya nangu ca kuti nshaishibe ifyo baleshitisha. Ilyo inshita yafikile iya kuti nshite, nasangile ukuti ifyo baleshitisha mukaka uwatikama uo beta ati yogurt. Yogurt nshaitemwa, lelo apo e fya kulya fyalipo, twaliliile. Ndatasha sana Lesa pantu pa nshita ilyo mu calo cesu mwali ubucushi, tatwatalile atulaalapo insala pantu Yehova aletupeela.” *

“Ifintu fyalibako bwino pali ino nshita. Ifyatucitikiile fyalitusambilisha ukuti icacindama ico tufwile ukucita pa kuti twilasakamikwa sana, kucetekela Lesa. Yehova * akulatwafwa nga ca kuti twatwalilila ukucita ifyo afwaya. Twalisanga ukuti amashiwi ayaba pa Amalumbo 34:8 ya cine, pantu yatila: ‘Sondeni no kumona ukuti Yehova musuma, alipaalwa umuntu uuba muli ena.’ Apo twalicetekela Yehova, te kuti tutiine amafya ya mikalile ayengabako mu calo cesu.

“Pali ino nshita twalishiba ukuti ico abantu bakabila pa kuti batwalilile ukuba abomi, fya kulya, te ndalama nelyo incito. Tulolela inshita ilyo amalayo ya kwa Lesa yakafikilishiwa ayatila: ‘Ingano shikafula nga nshi pano isonde.’ Lelo pali ino nshita, ‘pa kuba ne fya kulya ne fya kufwala . . . tuteke imitima kuli ifi fine.’ Amashiwi na yambi aya mu Baibolo ayatukoselesha ni aya ayatila: ‘Mu mikalile yenu mwilatemwa indalama, lelo muteke imitima ku fintu ifyo mukwete. Pantu atila: “Nshakakushe nakalya nangu ukukulekelesha nakalya.” E mulandu wine twingabela abashipa no kusosa atuti: “Yehova e kaafwa wandi; nshakatiine.”’” *

Tulingile ukuba ne citetekelo pa kuti ‘tule-enda na Lesa’ nga fintu ba Paul na ba mu lupwa lwabo bacita. (Ukutendeka 6:9) Nga twalikwata amafya ya ndalama e lyo nalimo tukayakwata ku ntanshi, kuti twasambilila ku fyo ba Paul abali ne citetekelo na mano yene yene bacitile.

Finshi twingacita nga ca kuti amafya ya mu lupwa yalalenga tulesakamikwa?