Umwaka wakonkelepo, natendeke ukuba mu mafilimu ayengi nga nshi. Abalemba amalyashi balefwaya ukulemba amalyashi pali ine, abakopa ifikope balefwaya ukulankopa, kabili nga kuli ukukumana kwacindama, balenjita ukuyasangwako. Ala nalilumbwike icine cine!

Na lyo line, mu kupita kwa nshita, naishilemona ukuti fyonse ifi ifyo nalecita tafyacindeme nga fintu nalemona. Amafilimu nalebamo ayengi yaleba aya lukaakala kabili fimo ifyo twalecita pa kuyapanga fyalebika ubumi bwandi mu busanso. Ifyo balepanga amafilimu mu Hong Kong, fyalipusene sana ne fyo balepanga mu Hollywood, pantu mu Hong Kong, uuli mu filimu e walecita fyonse kumo ne fingaleta amasanso pamo nga ukutolosha honda pa muulu wa motoka. Amafilimu ayengi ayo nalebamo mwaleba ubulalelale no lukaakala e lyo yambi yaleba aya ifibanda.

Mu 1995, nalyupilwe ku uupanga amafilimu. Nangu ca kuti nalikwete fyonse ifyo nalemona kwati e fingalenga umuntu aba ne nsansa pamo nga ifyuma, abena mwandi abantemenwe e lyo no kulumbuka, nshali ne nsansa. E ico nalilekele ukuba mu mafilimu.

Natendeke ukwibukisha ifyo nalesambilila ilyo nali umwaice. Ilyo nali umwaice, lyonse pa Cibelushi twaleya no mukalamba wandi mu kutandalila ulupwa lwa ba Nte. Ba Joe McGrath, baletusambilisha Baibolo pamo na bana babo batatu abakashana. Aba bantu bali abatemwana kabili aba nsansa. Ba Joe balesunga bwino abena mwabo na bana babo, kabili naleumfwa bwino nga twaya nabo mu kulongana. Limo limo baletusenda na mu kulongana ukukalamba. Uku ukulongana kwalewama kabili naletemwa nga ndi na ba Nte.

Na lyo line, mu ng’anda mu mwesu tamwali insansa. Ifyo batata balecita tafyaweme kabili fyalelenga  bamayo baleba sana no bulanda. Ilyo nali ne myaka 10, bamayo balilekele ukulongana ne Nte sha kwa Yehova. Nangu ca kuti nalitwalilile ukulongana, nshalelongana no mutima onse, na lyo line ilyo nali ne myaka 17 nalibatishiwe. Tapakokwele, natendeke ukucita ifyabipa kabili nalilekele ukulongana.

Ilyo naupilwe fye, baeluda babili balintandalile kabili balinondolwelele ifyo ningacita pa kuti ningatendeka ukulongana na kabili. Balyebele ba Cindy, bamishonari, ukuti balensambilishako fimo pali Lesa. Pali iyi nshita ninshi nalileka ukucetekela ifyo nasambilile mu Baibolo, e ico naebele ba Cindy ukuti banondolwele ifilanga ukuti Baibolo Cebo ca kwa Lesa. Ba Cindy balilandile pa masesemo ya mu Baibolo yamo ayafikilishiwa. Mu kuya kwa nshita, twasukile twaba ifibusa, lyena banjebele ukuti tutendeke ukusambilila Baibolo nabo, kabili nalisumiine. Uyu wali e muku wa kubalilapo naishibe ukuti Yehova ni Lesa wa kutemwa kabili afwaya ukuti ndeba ne nsansa.

Ilyo natendeke ukulongana, nasangile ukuti naleba ne nsansa nga ndi na ba Nte ukucila nga ndi na bantu naleba nabo mu mafilimu. Ifyalencitikila ilyo nali umwaice, fyalengele naleka ukucetekela abantu, kabili nshatemenwe ifyo nalecita. Nkashi uo twalelongana na o alinangile ifyo Baibolo ilanda pa fyo ningacita pa kuti nilasakamikwa sana pa mafya nakwete e lyo na pa fyo ningacita pa kukwata ifibusa.

Mu 1997, ine na bena mwandi twakukiile ku Hollywood, mu California, ku America. Ilyo twali ku Hollywood, natendeke ukwafwa sana abantu ukwishiba Icebo ca kwa Lesa. Ukusambilisha abantu Baibolo kwalilenga nakwata insansa ukucila isho nalekwata ilyo naleba mu mafilimu. Ku ca kumwenako, mu 2002, nalikumene na cibusa wandi Cheri uo twali na o ku Hong Kong. Ifyamucitikiile fyalipalana sana ne fyancitikiile. Cheri, e wali Miss Hong Kong mu 1983 ilyo bashilansala mu 1984, na kuba, e wamfwikile ne cilongwe. Cheri na o atendeke ukuba mu mafilimu, lyena atendeke ukupanga amafilimu na bantu bambi abalumbwike. Cheri na o alikukiile ku Hollywood.

Nalyumfwile sana ubulanda ilyo Cheri anjebele ukuti nkobekela wakwe alifwile no bulwele bwa ku mutima ukwabula ukwenekela. AbaBuddha abo alepepa nabo tabalemusansamusha. Cheri na o alilumbwike, lelo tali ne nsansa kabili tacetekele umuntu nangu umo. Nalitampile ukusambilila nankwe Baibolo, lelo apo ali mu Buddha calemwafya ukusumina ifyo Baibolo ilanda.

Bushiku bumo mu 2003, ilyo Cheri ali ku Vancouver, mu Canada uko aile mu kupanga amafilimu, alintumiine foni. Cheri ali ne nsansa ilyo anjebele ukuti ilyo aleensha motoka ninshi aletamba imishi, apepele ati: “Bushe Lesa wa cine nani? Ni nani ishina?” Lilya line fye, apitile pa Ng’anda ya Bufumu apo balembele ishina lya kuti Yehova. Ilyo amwene ili ishina, amwene ukuti ipepo lyakwe lyayasukwa. E ico alefwaisha ukulanda ne Nte sha kwa Yehova. Nalifwailishe ukwali icilonganino mupepi na kuntu aleikala kabili tapakokwele  alitendeke ukulongana mu cilonganino ca ciChinese, ica mu Vancouver.

Cheri atile, “Aba bantu balintemwa, kabili kuti nabalondolwela ifyo ndeumfwa.” Ala nalitemenwe sana ilyo anjebele ifi, pantu Cheri talekwata ifibusa. Cheri alitwalilile ukulongana. Na lyo line, mu 2005, alibweleelemo ku Hong Kong, mu China pantu e ko alingile ukuyapangila amafilimu yabili. Icaweme ca kuti mu 2006, Cheri alibatishiwe pa kulongana kukalamba ukwa ba Nte ukwaliko mu Hong Kong. Nangu ca kuti Cheri alefwaya ukulabombesha sana mu mulimo wa kwa Lesa, incito alebomba yalengele alefilwa ukukwata inshita ya kubombesha, kabili taletemwa.

Mu 2009, ifintu fyalyalwike kuli Cheri, pantu alilekele ukupanga amafilimu pa kuti alebombela sana Yehova. Alikwete ifibusa ifingi mu cilonganino. Alitendeke ukubila imbila nsuma iya Bufumu pa ma awala ayengi kabili alitemenwe ukusambilisha abantu icine.—Mateo 24:14.

Cheri alitampile no kusambilila iciNepali pa kuti alelongana na kalibumba ka ba Nte abalanda iciNepali abekala mu Hong Kong. Abena Nepal abengi abekala ku Hong Kong, balibasuula kabili tabababikako amano pantu tabaishiba sana ukulanda iciNgeleshi nelyo iciChinese kabili intambi shabo shalipusana ne ntambi sha bambi. Cheri anjebele ukuti aletemwa sana ukwafwa aba abantu ukwishiba ifyo Baibolo isambilisha. Ku ca kumwenako, bushiku bumo ilyo Cheri aleshimikila pa mayanda ya bantu, alisangile umwanakashi uushaishibe nangu cimo pali Yehova Lesa, lelo uwaishibeko ifinono pali Yesu. Cheri alimubelengeele muli Baibolo pa kumulanga ukuti Yesu alepepa kuli Wishi wa ku muulu. Ilyo uyu umwanakashi aishibe ukutila kuti apepa kuli Yehova, Lesa wa cine, alisumiine ukusambilila Baibolo, kabili tapakokwele, abena mwakwe e lyo no mwana wakwe umwanakashi, nabo bene balitendeke ukusambilila Baibolo.—Amalumbo 83:18; Luka 22:41, 42.

Ilyo namwene ifyo Cheri alebombesha mu mulimo wa kushimikila, naleyipusha ukuti, ‘Cinshi cingandesha ukulabila sana imbila nsuma?’ Pali iyi nshita, na ine wine ninshi nalibwelelamo ku Hong Kong. Nalyalwile imikalile yandi pa kuti ndebila sana imbila nsuma. Nalisanga ukuti nga ndebila imbila nsuma e lyo ndekutika na ku fyo abantu balelanda, ndaba sana ne nsansa.

Ku ca kumwenako, nalitendeke ukusambilisha Baibolo umwanakashi uwa ku Vietnam uwaleba fye no bulanda ica kuti alelila fye umo shacela. Pali ino inshita, uyu umwanakashi aliba sana ne nsansa kabili alitemwa ukusangwa mu kulongana.

Ine na Cheri twalisanga icintu icacila pa kulumbuka. Nangu ca kuti twaletemwa ukuba mu mafilimu kabili twalilumbwike, umulimo wa kusambilisha abantu pali Yehova Lesa wena ulalenga tuleba sana ne nsansa pantu nga tuleshimikila tulalumbanya Lesa. Ukwabula no kutwishika, twalisanga ukuti amashiwi Yesu alandile ya cine. Atile: “Mwaba insansa ishingi mu kupeela ukucila ishaba mu kupokelela.”—Imilimo 20:35.