ICIPANDE ICIKALAMBA BUSHE LESA AMONA SHANI UKULWA INKONDO?
Ifyo Lesa Alemona Ukulwa Inkondo mu Nshita ya Batumwa
AbaYuda abaliko mu nshita ya batumwa balebacusha sana. Nga filya cali ku fikolwe fyabo, aba abaYuda ilingi line balepepa ukuti Lesa abapokolole ku bena Roma abalebacusha. Lyena Yesu alishile pano calo kabili bamo baletontonkanya ukuti e Mesia uwali no kubalubula. Kanshi abantu abengi ‘balesubila ukuti uyu muntu e wali no kulubula Israele’ ku bena Roma abalebacusha. (Luka 24:21) Na lyo line, abaYuda batwalilile fye ukubacusha ica kuti mu 70 C.E., abashilika ba bena Roma balyonawile Yerusalemu ne tempele.
Cinshi Lesa ashalwilileko abaYuda, nga fintu alecita kale? Cinshi ashabasuminishishe ukulwa inkondo pa kuti bengacingililwa ku balebacusha? Bushe ifyo Lesa alemona ukulwa inkondo fyalyalwike? Awe. AbaYuda balikeene Yesu, Umwana wa kwa Lesa, ukuti e Mesia. (Imilimo 2:36) E ico abaYuda tabatwalilile ukuba ifibusa fya kwa Lesa.—Mateo 23:37, 38.
Lesa alilekele ukucingilila abaYuda kabili nga balefwaya ukulwa inkondo Lesa taali no kubafwa. Nga fintu Yesu asobeele, Lesa alilekele ukupaala uluko lwa bena Israele, lelo atendeke ukupaala uluko ulupya, ulo Baibolo iita ukuti “Israele wa kwa Lesa.” (Abena Galatia 6:16; Mateo 21:43) Abena Kristu abasubwa no mupashi wa mushilo, e Israele wa kwa Lesa. E ico babebele ukuti: “Nomba muli bantu bakwe [Lesa].”—1 Petro 2:9, 10.
Apo Abena Kristu abaliko mu nshita ya batumwa baali “bantu bakwe,” bushe Lesa ali no kubalwilako pa kuti abalubule ku bena Roma abalebacusha? Nelyo bushe alibasuminishe ukulwa inkondo na balwani babo? Awe, tabasuminishe. Cinshi ashabasuminishishe? Inkondo isho Lesa asuminisha abantu bakwe ukulwa, ni Lesa umwine uulanda ilyo abantu balingile ukulwa nga fintu icipande cifumineko cilandile. Lesa talelwilako Abena Kristu abaliko mu nshita ya batumwa kabili tabasuminishe ukuti balelwa inkondo. Kanshi mu nshita ya batumwa, Lesa talefwaya ukuti Abena Kristu balelwa inkondo pa kuti apwishe ububifi nelyo onaule abantu abalebacusha.
E ico, nga filya cali ku bena Israele, Abena Kristu abaliko mu nshita ya batumwa balingile ukulolela ukufikila ilyo Lesa umwine ali no kupwisha ububifi no konaula abalebacusha. Pali ilya inshita, Lesa tabasuminishe ukuti balelwa inkondo na balwani babo. Ifi e fyo na Yesu Kristu alesambilisha. Ku ca kumwenako, aebele abasambi bakwe ukuti tabalingile ukulwa inkondo, lelo abebele ukuti: “Muletemwa abalwani benu kabili mulepepelako abamucusha.” (Mateo 5:44) Ilyo Yesu asobeele ukuti abashilika ba bena Roma baali no kusansa Yerusalemu, aebele abasambi bakwe ukuti tabafwile ukulwa, lelo abebele ukuti baalingile ukufulumuka, kabili ifi fine e fyo bacitile.—Luka 21:20, 21.
Umutumwa Paulo na o alandile ukuti: “Mwilalandula, . . . pantu calembwa ati: ‘Nine mfwile ukulandula; nine nkabweseshapo pa fibi ifyo bacita,’ e fyasosa Yehova.” (Abena Roma 12:19) Aya amashiwi ayo Paulo alandile ni yalya Lesa alandile kale ayaba pa Ubwina Lebi 19:18 na pa Amalango 32:35. Nga fintu tulandilepo mu cipande cifumineko, inshita shimo nga ca kuti Lesa alefwaya ukulandwilako abantu bakwe, alebasuminisha ukulwa inkondo na balwani babo kabili aleleka bacimfya. Kanshi ifyo Paulo alandile filanga fye ukuti Lesa tayaluka mu fyo amona ukulwa inkondo. Mu nshita ya batumwa, Lesa alemona ukuti ukulwa inkondo yali ni nshila ya kulandilwako ababomfi bakwe e lyo no kupwisha ububifi no konaula abalecusha abantu bakwe. Na lyo line, nga filya fine cali ku bena Israele, Lesa umwine e walelanda ilyo abantu balingile ukulwa inkondo e lyo na balingile ukulwa inkondo.
Ukwabula no kutwishika, Lesa tasuminishe Abena Kristu ba mu nshita ya batumwa ukulalwa inkondo. Inga muno nshiku? Bushe kwaliba abantu abo Lesa asuminisha ukuti balelwa inkondo? Bushe ino e nshita iyo Lesa ali no kulwilako ababomfi bakwe inkondo? Bushe Lesa amona shani ukulwa inkondo muno nshiku? Icipande cikonkelepo calayasuka aya amepusho.
