?Wanem Tingting Blong Ol Witnes Blong Jehova Long Saed Blong Divos?

PLEI

Mifala i folem samting we Baebol i talem long saed blong mared mo divos. God i stanemap mared blong man mo woman i stap tugeta blong olwe. Baebol i talem se man i save divos nomo sipos wan long tufala i mekem enikaen doti fasin blong seks.—Matiu 19:5, 6, 9.

Ol Witnes oli halpem olgeta we oli kasem trabol long mared blong olgeta

Oli yusum ol rod olsem:

Ol buk mo magasin. I gat ol gudfala advaes we oli stap kamaot blong halpem olgeta we oli mared blong lukaotgud long mared blong olgeta. Mo tu, ol advaes ya oli save halpem olgeta we oli ting se mared blong olgeta i no moa save kam gud. Eksampol, yu luk ol haf ya “Maintaining Commitment in Your Marriage,” “How to Forgive,” mo “Rebuilding Trust in a Marriage.”
Ol miting. Long ol miting mo asembli blong mifala, mifala i tokbaot olsem wanem blong folem ol advaes blong Baebol long mared.
Ol elda. Ol elda long kongregesen oli leftemap tingting blong olgeta we oli mared blong folem ol advaes blong Baebol, olsem advaes long Efesas 5:22-25.

Ol elda oli no mekem desisen blong wan Witnes i divos

Taem olgeta we oli mared oli kasem trabol, oli save askem ol elda blong oli givhan long olgeta. Be ol elda oli no gat raet blong talem samting we olgeta oli mas mekem. (Galesia 6:5) Man we i jus blong divos long rod we i no stret folem Baebol, hem i no save mekem wok insaed long kongregesen. Mo tu, Baebol i talem se hem i no fri blong mared bakegen.—1 Timoti 3:1, 5, 12.

?Wanem tingting blong ol Witnes long fasin blong seraot?

Baebol i leftemap tingting blong olgeta we oli mared blong oli stap tugeta nating se oli kasem trabol. (1 Korin 7:10-16) Taem oli prea, oli folem ol advaes blong Baebol, mo oli soemaot se oli lavlavem olgeta, hemia i save mekem se oli winim ol trabol long mared blong olgeta.—1 Korin 13:4-8; Galesia 5:22.

Be, wan Kristin i save jus blong seraot long man o woman blong hem sipos hem i kasem wan trabol we i strong bitim mak, olsem:

Man i no wantem givim samting we famle i nidim.—1 Timoti 5:8.
Mekem rabis fasin we i strong bitim mak.—Ol Sam 11:5.
Blokem wosip fulwan. Eksampol, maet wan hasban o waef i traem blong fosem narawan blong i brekem ol loa blong God, nao hemia we i kasem trabol i save jus blong seraot, blong hem i save ‘obei long God we i rula i bitim we i obei long ol man.’—Ol Wok 5:29.