Tingting blong mifala long edukesen i stanap long ol tok blong Baebol. Evri Witnes i mas yusum tingting blong hem we hem i trenem folem Baebol, blong save olsem wanem blong folem ol advaes we God i givim, olsem hemia we bambae yumi tokbaot. a

•  Edukesen i impoten

•  Yumi mas gat stret tingting long edukesen

•  Hae edukesen i save spolem ol gudfala fasin mo bilif long God

•  ?Ol Witnes blong Jehova oli mekem Sande skul?

 Edukesen i save halpem wan yangfala blong save ol “waestok we i wok gud, mo fasin blong yusum gud tingting,” hemia ol fasin we Baebol i toktok gud long saed long olgeta. (Ol Proveb 2:10, 11; 3:21, 22) Mo tu, Jisas i talem long ol man blong hem se oli mas tijim ol narafala long ol tok we hem i talem long olgeta. (Matiu 28:19, 20) Taswe, mifala i pulum olgeta long kongregesen mo halpem olgeta blong oli gat wan gudfala edukesen, i min se oli save rid gud, raet gud, mo toktok gud wetem ol narafala, b mo tu, blong oli gat save long saed blong ol narafala jos mo kalja.—1 Korin 9:20-22; 1 Timoti 4:13.

 Ol gavman tu oli luk se i impoten blong kasem edukesen, from we plante taem oli mekem loa se ol yangfala oli mas kasem praemari mo sekendri edukesen. Mifala i obei long ol loa ya, folem ol tok ya: “I gud evri man oli putum olgeta oli stap aninit long ol haeman we oli stap rul,” hemia ol gavman. (Rom 13:1) Mo tu, mifala i leftemap tingting blong ol pikinini blong mifala blong oli no les, be oli mekem bes blong olgeta long skul. c Tok blong God i talem se: “Long evri samting we yu mekem, yu mas wok had long hem wetem olgeta hat blong yu, olsem we yu wok blong Masta, i no blong ol man.”—Kolosi 3:23, Good News Translation.

 Edukesen i givhan long yumi blong kasem ol samting we famle i nidim. Baebol i talem se: “Man we i no wantem givim samting we olgeta we hem i mas lukaot long olgeta, oli nidim, speseli long olgeta we oli memba blong famle blong hem, hem i soemaot we hem i no moa holem bilif, mo hem i mowas long man we i no bilif nating.” (1 Timoti 5:8) Edukesen i save givhan long yumi blong mekem tabu wok ya blong lukaot gud long famle blong yumi. The World Book Encyclopedia i talem se wan bigfala risen blong kasem edukesen, i “blong mekem se evri man oli naf blong mekem wan wok we i givhan long olgeta man . . . mo blong halpem ekonomi.” I moa isi blong wan man we i gat gudhan long wan wok mo i skul gud, i gohed oltaem blong givim samting we famle blong hem i nidim, i bitim wan man we i no gat gudhan mo i no skul gud.—Ol Proveb 22:29.

 Mo tu, ol papa mo mama oli lukaot gud long pikinini taem oli mekem olgeta oli rere from laef blong olgeta biaen, mo edukesen i impoten tumas long saed ya. (2 Korin 12:14) Mifala i pulum ol papa mo mama blong oli sanem ol pikinini blong olgeta oli go long skul, nating se maet long ples blong olgeta skul i no fri, oli stap longwe long wan skul, o i agensem kalja blong olgeta. d Mo tu, mifala i givim ol gudfala advaes we i save givhan long ol papa mo mama blong oli intres long edukesen blong pikinini blong olgeta. e

 Mifala i skelem gud olkaen edukesen we pikinini i save jusum. Baebol i talem se: “Man we i no save samting, i bilif long evri toktok, be man we i tingting gud, hem i skelem gud wanwan step blong hem.” (Ol Proveb 14:15) Mifala i folem advaes ya taem mifala i skelem gud ol defdefren kos we yangfala i save tekem, antap long edukesen blong hem long skul, mo mifala i tingbaot praes blong hem mo weswan kos i moa impoten. Wan eksampol, ol kos we oli trenem yangfala long wan wok, oli no tekem tumas taem mo oli impoten long laef blong hem long fiuja.

 Edukesen long Baebol i moa impoten i bitim edukesen blong wol. Edukesen long Baebol i defren long edukesen blong wol, from we hem i givim save blong God we i blong sevem laef blong man. (Jon 17:3) Baebol i tijim yumi tu long ol gudfala fasin, “wanem i stret mo i gud mo i stret long olgeta man, yes, . . . olgeta rod blong ol samting we i gud.” (Ol Proveb 2:9) Aposol Pol i kasem wan edukesen we i sem mak long yunivesiti tede, be hem i talem se “samting we i moa gud olgeta, hemia save we i tokbaot . . . Kraes Jisas.” (Filipae 3:8; Ol Wok 22:3) Sem mak tede, plante Witnes blong Jehova we oli kasem hae edukesen, oli luksave se edukesen long Baebol i impoten moa. f

 Wan proveb long Baebol i talem se: “Man we i tingting gud i luksave we trabol i stap kam, nao i go haed.” (Ol Proveb 22:3) Ol Witnes blong Jehova oli luk se fasin blong ol yangfala long sam yunivesiti mo sam narafala ples blong hae edukesen, oli save spolem gudfala fasin mo bilif blong yangfala. From samting ya, plante Witnes oli no sanem pikinini i go long ples blong kasem hae edukesen. Oli luk se long ol ples olsem, oli tijim ol yangfala long sam rong tingting, olsem hemia:

•   Rong tingting: Mane i mekem man i glad mo i stap sef

   Plante man long wol oli talem se yu mas kasem hae edukesen blong yu save gat wan gudfala wok, taswe plante yangfala oli go long yunivesiti blong kasem wan wok we i givim plante mane. Samfala oli hop se mane bambae i mekem olgeta oli glad mo oli stap sef, be Baebol i talem se tingting ya i no stret. (Prija 5:10) Samting we i moa impoten, hemia tijing blong Baebol se “fasin blong laekem mane tumas, hem i stamba blong olgeta samting we i save mekem man i harem nogud,” mo plante taem i spolem bilif tu. (1 Timoti 6:10) Ol Witnes blong Jehova oli traehad blong no foldaon long trap ya blong “ol rij samting we oli gat paoa blong trikim man.”—Matiu 13:22.

•   Rong tingting: Haenem mo respek we man i kasem taem hem i gat hae edukesen, i impoten tumas

   Man ya Nika Gilauri, we i praeminista blong Jojia bifo, i tokbaot tingting we plante man long kantri blong hem oli gat, i se: “Long Jojia, yunivesiti digri i soemaot haenem, taswe i impoten tumas we evri man oli mas go long yunivesiti. . . . [Bifo,] ol yangfala we oli no gat wan digri long yunivesiti, famle i sem long olgeta.” g Be Baebol i givim woning se yumi no mas traem kasem haenem long wol ya. Jisas i tok long ol lida blong skul we oli wantem se ol man oli leftemap olgeta, i talem se: “Yufala i stap givim glori long ol narafala man, mo yufala i wantem olgeta oli givim glori long yufala. . . . ?Nao olsem wanem yufala i save bilif?” (Jon 5:44) Plante taem olgeta we oli kasem edukesen long yunivesiti, oli kam praod, mo God i no laekem nating fasin ya.—Ol Proveb 6:16, 17; 1 Pita 5:5.

•   Rong tingting: Wanwan man i mas jusumaot samting we hem i ting se i stret o i no stret

   Ol Witnes blong Jehova oli agri long samting we God i talem se i stret o i no stret. (Aesea 5:20) Be Journal of Alcohol and Drug Education i talem se plante studen long yunivesiti we oli fraet long tingting blong ol narafala studen, oli “mekem desisen we i agensem samting we oli save se i stret o i no stret.” h Taswe Baebol i talem se: “Ol rabis fren oli save spolem ol gudfala fasin.” (1 Korin 15:33) Long ol ples olsem yunivesiti, oli pulum ol yangfala blong mekem ol fasin we God i agensem, olsem drong, tekem drag, mo slip wanples bifo we oli mared.—1 Korin 6:9, 10; 2 Korin 7:1.

•   Rong tingting: Hae edukesen bambae i mekem wol i kam gud

   Mifala i save se plante oli no kasem hae edukesen, blong kam rij o kasem haenem o mekem rabis fasin, be blong mekem laef blong olgeta mo wol ya i kam gud moa. Hemia ol gudfala tingting, be ol Witnes blong Jehova oli jusum wan defren rod. Olsem Jisas, mifala i lukluk i go long Kingdom blong God olsem wan hop nomo blong mekem wol ya i kamgud. (Matiu 6:9, 10) Be mifala i no jes sidaon mo wet se Kingdom ya bambae i stretem olgeta problem long wol. Olsem Jisas, mifala i serem “gud nius ya blong Kingdom” wetem ol man long olgeta ples long wol, mo givhan long plante handred taosen man evri yia blong oli jenisim laef blong olgeta. i—Matiu 24:14.