Wan man blong gavman we i jekem sefti long ol konstraksen, i go long ples we Ol Witnes oli stap bildim wan Haos Kingdom long Sydney, Ostrelia. Afta, hem i talem se: “Long saed blong sefti, [hemia] wan long ol beswan ples we mi bin jekem.”

Hem i raetem ripot ya se: “Oli oganaes gud long ples blong konstraksen . . . [Ples] i klin mo evri samting i stap long stret ples blong hem, mo ol get blong kam insaed mo goaot oli klia, ol rop blong lektrik oli no stap long graon be oli hang antap long ol huk, [mo] ol samting blong kilim faea oli rere i stap . . . Ol wokman, oli werem sot we i gat longfala han, longfala traoses, ol strong hat, mo glas blong protektem ae. . . . Evriwan oli glad blong givhan.”

Victor Otter, we i maneja blong wok ya, i talem se: “Ol Witnes oli ting se sefti i impoten tumas. Taem mifala i tinghevi long sefti, mifala i soemaot tingting blong God long saed blong laef, mo tu, evriwan oli wok tugeta wetem glad. Afta we mi wok had blong fuldei, plante taem mi gohom wetem smael long fes blong mi.”

Long Eprel 2012, oli finisim Haos Kingdom ya we i gat 127 jea long hem.