Long Briten, wan ogenaesesen blong konstraksen we plante man oli tinghae long hem, nem blong hem Considerate Constructors Scheme a (CCS), i talem gudfala toktok long ol Witnes blong Jehova, from we oli stap trenem ol woman, blong wok wetem ol hevi diuti masin mo trak, long ples we oli stap bildim niufala branj ofis blong olgeta, klosap long Chelmsford, Essex. Ogenaesesen ya CCS i givim top sko, we hem i 10 aot of 10, long ol Witnes blong Jehova, from plan we oli folem blong trenem ol woman long konstraksen, mo i tokbaot plan ya se i olsem wan “niufala samting.” ?From wanem oli givim wan hae sko olsem?

Long Briten, olgeta we oli wok long konstraksen, klosap 13 pesen nomo oli ol woman. Wan stadi we wan ofis blong Briten i mekem, i soem se smol woman nomo oli wantem wok long konstraksen. Hemia i defren olgeta long tim blong konstraksen long Chelmsford, samwe 40 pesen oli ol woman. Mo namba ya i go antap bitim 60 pesen long tim we i stap wok wetem ol hevi diuti masin mo trak.

?Wanem i givhan long ol woman we oli Witnes Blong Jehova blong kasem mak ya? Impoten samting hem i trening mo sapot we oli kasem. Tufala fasin ya i stap tu long ol rul blong wok blong CCS. Rul ya i pulum ol man we oli gat konstraksen blong soemaot se oli tinghae long wokman blong olgeta, taem oli mekem se “long ples blong wok, evriwan i respektem narafala, mekem i sem mak long evriwan, oli leftemap tingting mo sapotem olgeta,” mo tu blong oli gohed blong “givim trening.”

Jade, wan woman we oli trenem hem blong draevem ol dika mo ol kameong blong karem graon, i talem se: “!Mi sapraes! Mi neva ting se bae mi naf blong mekem. Samtaem wok ya i had, be oltaem mi kasem trening mo mi stap lanem ol niu samting.” Olsem Jade, naoia Lucy tu i wan long olgeta we oli stap wok wetem ol hevi diuti trak. Hem i tingtingbak i se: “Festaem we mi kam long ples blong konstraksen, mi harem se mi no save givhan, from we mi no wan skil. Be mi stat blong kasem trening long fas dei we mi kasem ples blong konstraksen. !Mo kam kasem naoia, mi bin wok wetem faef defren tim, i soemaot se mi bin kasem plante trening!”

Ol woman ya oli gat sam narafala skil tu antap long save we oli gat blong wok wetem ol hevi diuti masin mo trak. Erik we i lidim wan tim i talem se: “Plante taem ol woman oli lukaot gud long ol masin i bitim ol man, mo oli nambawan blong luksave taem wan samting i rong long masin blong olgeta mo go talemaot.”

Carl, we i lidim sam tim we oli wok wetem ol hevi diuti masin mo trak, i se: “Mi mi sapraes tumas long fasin blong ol woman ya blong draevem ol hevi diuti trak. !Long sam wok, ating bae mi jusum olgeta blong draev, i bitim we mi jusum ol man we oli gat ekspiriens plante yia finis!”

Taem ol lida blong tim oli sapotem ol man we oli wok wetem olgeta, oli mekem olgeta oli gat strong tingting. Yumi save luk samting ya long saed blong Therese. Hem i wok wetem ol masin blong plante yia. Hem i save se ol ples blong wok we oli yusum ol hevi diuti masin mo trak, oli mas tingbaot se oli gat bigfala wok mo oli mas mekem ol impoten desisen blong mekem se ples i sef blong wok. Hem i se: “Taem mi save se lida blong tim i sapotem mi, mi naf blong mekem plante moa wok i bitim hemia nomo we oli ekspektem mi blong mekem, from mi harem save se oli trastem mi. Ol hadwok blong mi oli no blong nating nomo, taem mi save se ol man oli glad long wok we mi mekem mo oli gat gudfala tingting long wok ya.”

Abigail, wan narafala woman we i stap draevem ol diga mo ol kameong blong karem graon, i glad from sapot we hem i kasem mo i glad we evriwan i wok gud wetem hem, i talem se: “Ol man we oli wok long konstraksen long ples ya, oli no tritim mi olsem we mi daon moa long olgeta. Oli rere blong givhan, be oli no traem blong tekova long wok blong mi. Oli letem mi mi gohed nomo long hem.”

Antap long wok ya blong wok wetem ol kaen hevi duti trak, ol woman we oli wok long Chelmsford oli kasem trening tu long ol wok olsem, makem graon, yusum gud graon mo ol samting long hem, riperem ol masin mo wok blong stanemap ol skafol. Robert, we i bin wok wetem ol woman long ol defdefren projek i talem se “Oli putum tingting fulwan long wok, oli wantem wok, mo oli tingbaot evri smosmol samting.” Tom, we i stap makem ol graon, i joenem i se: “Ol woman we oli wok long tim blong mi, oli mekem samting stret olsem we mi talem, mo oli mekem gogo oli finisim gud. Oli wantem se wok blong olgeta i kasem stret mak blong hem.”

Taswe yumi no sapraes we Fergus we i wan man we i lida blong wan tim, i talem wetem strong tingting se: “!I tru nomo se yumi nidim ol woman long konstraksen!”