Long fored blong niuspepa ya Frankfurter Rundschau, oli raetem se: “Asembli Ya i Olsem Bigfala Lafet Blong Wan Famle.” Olgeta we oli go long asembli ya, oli gat sem tingting.

Karla we i kam long Poto Riko, i talem se: “!Mi mi harem gud, i olsem se mi stap long haos blong mi!”

Sara blong Ostrelia, i talem se: “Mi mi harem olsem se mi stap visitim prapa famle blong mi we oli stap long narasaed wol.”

?Wanem i mekem se olgeta ya oli gat tingting olsem? Hemia intenasnal asembli blong ol Witnes blong Jehova. Asembli ya i stap long Commerzbank-Arena, long Frankfurt am Main, Jemani, stat long 18 kasem 20 Julae 2014. I gat klosap 37,000 man we oli kam long asembli ya.

Ol man oli kam blong lanem samting we Baebol i talem. Long program blong asembli ya, i gat ol Baebol riding, singsing, prea, tu drama, mo ol tok we oli kamaot long Baebol.

I gat plante man Jemani we oli kam long asembli ya mo bitim 3,000 man we oli kam long Briten, Gris, Lebanon, Ostrelia, Saot Afrika, Sebia, mo Yunaeted Stet. Mo tu, i gat bitim 234 Witnes we oli blong 70 defren kantri we oli kam, olgeta ya oli mekem fultaem wok, olsem wok blong misinari.

Oli yusum Intenet blong konek wetem ol narafala we oli stap long 19 narafala ples long Jemani, mo tu long Ostria mo Swiselan, blong oli save wajem sam haf blong program. I gat 204,046 man we oli kam long olgeta ples ya.

Long Frankfurt, asembli ya i stap long lanwis blong Gris, Jemani, mo Inglis. Long ol narafala ples, oli transletem ol tok i go long 17 lanwis, long ol lanwis ya i gat Arabik, Jaenis, Tamil, Turkis, mo long tu saen lanwis.

Nating se ol Witnes ya, oli toktok defren lanwis mo oli blong defren kantri mo kalja, be oli no seraot, oli lavlavem olgeta. (Jon 13:34, 35) Olgeta evriwan oli luk olgeta olsem ol brata mo sista.

Tobias we i blong Briten, i talem se: “Mifala i luk klia se olgeta brata mo sista long fulwol oli joengud.”

Davianna blong Poto Riko, i talem se: “Mi mitim ol brata mo sista blong bitim 20 kantri. Mifala i joengud from we mifala i lavem God mo mifala i lavlavem mifala.”

Malcom wan brata blong Ostrelia, i talem se: “Mi mi blong wan smol taon. Mi ridim ol buk we oli tokbaot se olgeta brata mo sista long fulwol oli olsem wan kampani nomo, mo mi luk ol video we oli soemaot samting ya. Be taem mi kam long ples ya, mi luk samting ya wetem prapa ae blong mi. Mo hemia i givhan moa long mi, mo i mekem bilif blong mi i kam strong moa.”

Ol brata mo sista blong 58 kongregesen long Frankfurt, oli rerem ol presen mo ol smol program long aftenun blong joen wetem ol brata mo sista we oli kam.

Cynthia we i blong Yunaeted Stet, i talem se: “Olgeta oli lukaotgud mo oli kaen long mifala. Bambae mi no save fogetem lav mo kaen fasin we oli soem.”

Simon we i stap long Jemani, i talem se: “Long asembli ya, ol man oli harem gud mo oli lavlavem olgeta olsem wan brata nomo. Mifala i lanem plante samting.”

Amy we i blong Ostrelia, i talem se: “Ol program we mifala joen long hem long aftenun, oli pruvum se ol Witnes blong Jehova tu oli gat gud taem long laef. Mifala i save olsem wanem blong gat gud taem long fasin we i klin, mo i mekem mifala i harem gud.”

Asembli ya long Frankfurt, hem i wan long ol intenasnal asembli we i stap long naen kantri raon long wol.

Taem oli askem wan brata we i kam long asembli ya, se asembli ya i olsem wanem, hem i talem se: “Yu traem tingbaot se yu faenem wan famle blong yu, maet wan brata blong yu, we yu neva mitim hem. Be taem yu mitim hem, hem i glad blong welkamem yu. Mo yu glad bitim mak. Nao yu traem tingbaot sipos 37,000 man oli mekem olsem long yu. Hemia nao filing we mi gat taem mi stap long asembli ya.”