Leta i go long Filimon 1:1-25
1 Mi Pol, mi wan prisena+ from we mi mi man blong wok blong Kraes Jisas, mo mi stap wetem brata blong yumi Timoti.+ Mi raet i go long yu Filimon, we yu gudfala brata blong mitufala mo we yu joen wetem mitufala blong mekem sem wok,
2 mo long sista blong yumi Apfia, mo long Akipas+ we i joen wetem yumi long sem faet, mo long kongregesen we i stap long haos blong yu:+
3 Mi mi prea se Papa blong yumi God, wetem Masta Jisas Kraes, bambae tufala i kaen long yufala mo tufala i givim pis long yufala.
4 Filimon, taem mi tokbaot yu long ol prea blong mi, oltaem mi talem tangkiu long God,+
5 from mi stap harem se yu bilif, mo yu stap lavem Masta Jisas mo olgeta tabu man.
6 Mi mi prea se bilif ya we yu mo olgeta narafala man blong bilif, yufala i gat, i save lidim yu blong luksave ol gudfala samting we yumi kasem long Kraes.
7 Brata. Fasin ya blong yu blong lavem ol man, hem i stap mekem mi mi harem gud tumas, mo i stap leftemap tingting blong mi, from we yu stap mekem ol tabu man oli kam strong.
8 From samting ya, nating se mi gat raet blong givim oda long yu blong yu mekem samting we i stret from we mi mi joen long Kraes,
9 be mi no wantem mekem olsem. Mi mi tingbaot lav blong yu, mo mi Pol, mi wan olfala man, mi stap long kalabus from we mi mi man blong wok blong Kraes Jisas. Taswe mi mi laekem moa blong askem long yu se plis yu mekem samting ya.
10 Mi wantem askem long saed blong pikinini ya blong mi Onesimas, we mi mi olsem papa blong hem+ long kalabus.*+
11 Bifo hem i no givhan long yu nating, be naoia hem i save givhan long yu mo long mi tu.
12 Mi mi sanem hem i kambak long yu, yes man ya we mi mi lavem hem tumas.
13 Mi wantem holem hem i stap long ples ya, olsem nao hem i save tekem ples blong yu blong givhan long mi taem mi stap kalabus from gud nius.+
14 Be mi no wantem fosem yu blong yu mekem olsem. Mi mi wantem blong yu yu mekem long tingting blong yu nomo. From samting ya, sipos yu no agri, bambae mi no save holem hem i stap.+
15 Maet hemia nao from wanem hem i ronwe long yu blong smoltaem,* blong bambae yu save tekem hem bakegen, blong i stap olwe wetem yu,
16 from we naoia, hem i no wan slef+ be hem i moa long slef. Hem i wan gudfala brata, mo mi mi lavem hem tumas.+ Be yu bambae yu lavem hem moa, from we hem i slef blong yu, be antap moa, hem i brata blong yu, from we hem i joen finis long Masta.
17 Sipos yu stap luk mi olsem wan fren,* plis yu tekembak hem, olsem we yu save tekem mi mi kam insaed long haos blong yu.
18 Sipos hem i bin mekem i no stret long yu, o i gat kaon long yu, plis yu putum long nem blong mi.
19 Mi Pol, mi raetem ol tok ya long prapa han blong mi: Bambae mi pembak kaon ya. Yu tu yu gat kaon long mi from laef blong yu, be mi no wantem tokbaot samting ya.
20 Yes brata blong mi, plis yu givhan long mi long samting ya, from we yumitu tugeta i disaepol blong Masta. Mo from we yu yu wan disaepol blong Kraes, mi mi askem long yu blong yu mekem mi mi kam strong bakegen.
21 Mi mi stap raetem tok ya i kam long yu, from we mi trastem yu se bambae yu mekem samting we mi askem. Mo mi mi savegud se yu bambae yu go moa i bitim tok ya blong mi.
22 Mo mi wantem askem se plis yu mekemrere wan ples blong mi save stap long hem, from we mi mi gat hop se ol prea blong yufala bambae i mekem se mi kambak long yufala.*+
23 Epafras+ we i stap kalabus wetem mi from nem blong Kraes Jisas, hem i talem halo long yu.
24 Mo Mak, Aristakas,+ Demas,+ mo Luk+ we oli stap mekem sem wok olsem mi, olgeta tu oli talem halo long yu.
25 Prea blong mi se Masta Jisas Kraes i gohed blong kaen long yufala, taem yufala i stap soemaot ol gudfala fasin.
Ol futnot
^ PT: “taem ol jen oli fasem mi.”
^ PT: “wan aoa.”
^ PT: “wan patna.”
^ NT: “mi kam fri blong mi givhan long yufala.”
