Leta i go long man Hibru 4:1-16
4 Taswe yumi mas lukaot gud* blong i no gat wan long yufala i mestem mak nao i no kasem spel ya, from we promes blong spel ya i stap yet.+
2 Yumi tu, yumi harem gud nius+ olsem we olgeta ya bifo oli harem. Olgeta ya oli harem tok ya be i no givhan long olgeta, from we bilif blong olgeta i no sem mak long bilif blong olgeta ya we oli lesin.
3 Yumi ya we yumi soemaot se yumi bilif, yumi kasem spel ya we hem i stap tokbaot taem hem i talem se: “Taswe mi mi kros tumas nao mi mekem strong promes ya se: ‘Bambae oli no kasem spel blong mi.’”+ God i tok olsem, nating se olgeta wok blong hem oli finis long taem we ol man oli stat blong bon long wol.+
4 I gat wan tok long Baebol we i tokbaot namba 7 dei se: “Mo long namba 7 dei, God i spel long olgeta wok blong hem.”+
5 Mo long ples ya bakegen hem i talem se: “Bambae oli no kasem spel blong mi.”+
6 Olgeta we oli harem gud nius ya fastaem, oli no kasem spel ya from we oli no obei. Be i gat rod yet blong sam narafala man oli kasem spel ya.+
7 Taswe longtaem biaen, hem i makem wan dei bakegen long sing we Deved i raetem, we i talem se “Tede,” mo toktok ya mi raetem finis long leta ya we i se: “Tede, sipos yufala i lesin long voes blong hem, yufala i no mas mekem hat blong yufala i strong.”+
8 Sipos Josua+ i bin lidim olgeta oli go long wan ples blong spel, God bambae i no save talem wan narafala dei bakegen plante yia biaen.
9 Taswe i gat wan dei blong spel i stap blong ol man blong God, we hem i olsem wan sabat.+
10 Man we i kasem spel ya blong God, hem i spel long ol wok blong hem stret olsem we God i spel long ol wok blong hem.+
11 Taswe yumi mas traehad long evri rod blong kasem spel ya, blong mekem se i no gat wan long yumi i foldaon nao i folem sem fasin ya blong no obei.+
12 Tok blong God i laef i stap mo paoa blong hem i stap wok,+ mo hem i sap moa i bitim naef blong faet we i sap tu saed.+ Mo hem i go dip insaed long man, i seraotem sol* mo spirit,* mo i seraotem ol joen blong bun long wota blong hem. Mo hem i naf blong faenemaot ol tingting mo ol plan we i stap long hat blong man.
13 I no gat wan samting nating we God i mekem, we i save haed long fes blong hem.+ Olgeta samting oli stap long klia ples nomo, stret long fes blong hem. Mo long fes blong hem nomo, yumi evriwan i mas talemaot ol fasin blong yumi.+
14 Bigfala hae pris ya blong yumi, Jisas we i Pikinini blong God,+ hem i go insaed long heven finis, taswe i gud yumi gohed blong talemaot bilif we yumi gat long hem.+
15 Hae Pris ya blong yumi, hem i savegud we yumi no gat paoa, nao hem i gat sore long yumi,+ from we olgeta samting blong traem yumi oli traem hem finis. Be wan samting nomo, hem i no mekem sin.+
16 Taswe i gud yumi go klosap long tron* blong God ya we i kaen tumas long ol man, mo yumi prea long hem we yumi no fraet blong toktok,+ blong hem i save sore long yumi mo i kaen long yumi long stret taem we yumi nidim help.
