Jeremaea 11:1-23
11 Hemia tok we Jeremaea i kasem long Jehova, i se:
2 “!Yufala evriwan i harem ol tok blong kontrak ya!
“Yu* talem ol tok ya long ol man Juda mo long olgeta we oli laef long Jerusalem
3 mo yu talem long olgeta se, ‘Hemia samting we Jehova God blong Isrel i talem, i se: “Trabol bambae i kasem man we i no obei long ol tok blong kontrak ya,+
4 we mi talem long ol olfala blong yufala, long dei ya we mi tekemaot olgeta long kantri ya Ijip,+ yes long hot oven ya blong bonem aean,+ mi talem se: ‘Yufala i obei long voes blong mi, mo yufala i mekem olgeta samting we mi talem long yufala, mo bambae yufala i kam man blong mi, mo mi bambae mi God blong yufala,+
5 nao bambae mi save mekem strong promes we mi mekem wetem ol olfala blong yufala i kamtru, blong mi givim kantri ya long olgeta we i fulap long melek mo hani,+ olsem we i stap tede.’”’”
Mo mi ansa se: “Amen,* O Jehova.”
6 Biaen Jehova i talem long mi se: “Yu talemaot olgeta tok ya long ol taon blong Juda mo long ol bigrod long Jerusalem, se: ‘Yufala i harem ol tok blong kontrak ya, mo yufala i folem olgeta.
7 From mi talem strong long ol olfala blong yufala long dei ya we mi tekemaot olgeta long kantri ya Ijip mo kam kasem tede, mi stap talem strong long olgeta bakegen mo bakegen se:* “Yufala i obei long voes blong mi.”+
8 Be oli no lesin mo oli no pusum sora blong olgeta i kam blong harem, be olgeta wanwan oli gohed blong mekem stronghed, oli stap folem hat blong olgeta we i rabis.+ Taswe mi mekem olgeta tok blong kontrak ya i kasem olgeta, from we oli no wantem obei long samting we mi bin talem long olgeta blong oli mekem.’”
9 Biaen Jehova i talem long mi se: “I gat wan rabis plan i stap gohed long medel blong ol man Juda mo ol man we oli laef long Jerusalem.
10 Oli tanemraon oli mekem sem mastik olsem ol olfala blong olgeta bifo, we oli no wantem obei long ol tok blong mi.+ Olgeta tu oli folem ol narafala god mo oli wok blong olgeta.+ Olgeta long haos blong Isrel mo long haos blong Juda oli brekem finis kontrak we mi mekem wetem ol olfala blong olgeta.+
11 Taswe hemia samting we Jehova i talem, i se: ‘Naoia bambae mi mekem wan trabol i kasem olgeta,+ mo bambae oli no naf blong ronwe long hem. Taem oli singaot long mi from help, bambae mi no lesin long olgeta.+
12 Nao ol taon blong Juda mo ol man we oli laef long Jerusalem bambae oli go long ol god we oli stap mekem sakrefaes* long olgeta mo oli singaot from help,+ be ol god ya bambae oli no save sevem olgeta long taem ya we oli stap long trabol.
13 From ol god blong yu O Juda, oli kam plante olsem ol taon blong yu, mo yu stanemap plante olta we i blong samting blong sem,* oli plante olsem ol rod long Jerusalem, hemia ol olta blong mekem sakrefaes long Bal.’+
14 “Be long saed blong yu,* yu no mas prea long bihaf blong ol man ya. Yu no mas krae long mi long bihaf blong olgeta, no yu prea from olgeta,+ from bambae mi no lesin taem oli singaot i kam long mi from trabol we oli kasem.
15 ?Woman ya we mi lavem hem tumas, i gat wanem raet blong stap long haos blong mi?From plante man oli stap folem ol rabis plan.
?Animol we i tabu,* i save blokem trabol taem i kasem yu??Bambae yu harem gud long taem ya?
16 Bifo Jehova i singaotem yu se oliftri we i gru gud,Yu naes mo yu gat gudfala frut.
Long wan bigfala noes, hem i putum faea long yu,Mo oli brekem finis ol branj blong yu.
17 “Man We i Planem yu, hemia Jehova komanda blong ol ami,+ i talem finis se wan trabol bambae i kasem yu from ol rabis fasin we olgeta long haos blong Isrel mo long haos blong Juda oli mekem, we oli mekem mi mi kros taem oli bonem ol sakrefaes i go long Bal.”+
18 Jehova i talemaot long mi blong mi save,Long taem ya, yu mekem mi mi luk samting we oli stap mekem.
19 Mi mi olsem wan smol sipsip we i kwaet, we oli tekem i go blong kilim i ded.
Mi mi no save we oli stap mekem plan agensem mi,+ oli se:“I gud yumi distroem tri ya wetem frut blong hem,Mo i gud yumi katemaot hem, long ples we ol man we oli laef oli stap long hem,Blong ol man oli no moa tingbaot nem blong hem.”
20 Be Jehova komanda blong ol ami, hem i stap jajem man long stret fasin,Hem i stap jekemgud hat mo ol tingting we oli haed.*+
I gud yu letem mi mi luk we yu givimbak long olgeta,From we mi mi putum kot kes blong mi long han blong yu.
21 Taswe, hemia samting we Jehova i talem agensem ol man Anatot+ we oli stap lukaotem rod blong tekemaot laef blong yu,* mo oli talem se: “Yu no mas talemaot ol profet tok long nem blong Jehova,+ sipos no, bambae yu ded long han blong mifala,”
22 from samting ya, hemia samting we Jehova komanda blong ol ami i talem i se: “Bambae mi singaot olgeta i kam blong jajem olgeta. Ol yang man bambae oli ded long naef blong faet,+ mo ol boe mo ol dota blong olgeta bambae oli ded from kakae i sot.+
23 Bambae i no gat wan smol haf blong olgeta nating i stap, from we bambae mi mekem trabol i kasem ol man Anatot,+ long yia ya we mi singaot olgeta i kam blong jajem olgeta.”
Ol futnot
^ I luk olsem se tok ya i go long Jeremaea.
^ NT: “!I mas olsem!”
^ PT: “mi girap eli mo mi stap talem strong long olgeta se.”
^ NT: “stap bonem sakrefaes blong mekem oli smok.”
^ NT: “god ya we i stap mekem man i sem.”
^ Hemia Jeremaea.
^ Hemia sakrefaes we oli mekem long tempol.
^ NT: “ol dip filing.” PT: “kidni.”
^ NT: “lukaotem sol blong yu.”
