Ol Sam 27:1-14
Singsing blong Deved.
27 Jehova i laet blong mi+ mo i sevia blong mi.
?Hu i save mekem mi mi fraet?+Jehova i olsem strong ples we i protektem laef blong mi.+
?Hu i save mekem mi seksek?
2 Taem ol rabis man oli kam atakem mi blong kilim mi,+Be ol man we oli agensem mi mo ol enemi blong mi nao oli stambol mo foldaon.
3 Nating se wan grup blong ami i kam putum kamp blong hem blong agensem mi,Bambae hat blong mi i no seksek.+
Nating se ol man oli mekem faet long mi,Be long taem ya tu, bambae tingting blong mi i strong yet.
4 Mi mi bin askem wan samting long Jehova,Samting ya nao bambae mi lukaotem,Blong mi save stap long haos blong Jehova long olgeta dei long laef blong mi,+Nao mi save luklukgud ol gudfala fasin blong JehovaMo mi save luk tempol* blong hem, we mi glad tumas from.*+
5 From we bambae hem i haedem mi long selta blong hem long dei blong trabol,+Bambae hem i haedem mi long tent blong hem, long wan ples we man i no save.+
Bambae hem i putum mi antap long wan bigfala ston.+
6 Nao hed blong mi i hae i bitim ol enemi blong mi we oli stap raon long mi.
Bambae mi bonem sakrefaes long tent blong hem, we mi glad tumas mi stap singsingaot from,Bambae mi singim ol sing blong presem* Jehova.
7 O Jehova, yu harem mi taem mi krae long yu.+
Yu kaen long mi mo yu ansa long mi.+
8 Hat blong mi i toktok long bihaf blong yu, i se:“Yu mas traehad blong faenem fes blong mi.”Yes Jehova, bambae mi traehad blong faenem fes blong yu.+
9 Yu no haedem fes blong yu long mi.+
Yu no sanemaot man blong wok blong yu taem yu kros.
Yu nao yu stap halpem mi.+
God blong mi we yu stap sevem mi, plis yu no lego mi mo yu no livim mi.
10 Nating sipos papa mo mama blong mi i lego mi,+Jehova bambae i tekem mi, i lukaot long mi.+
11 O Jehova, yu tijim mi long ol fasin blong yu,+Yu lidim mi long rod blong stret fasin, from we mi gat plante enemi.
12 Yu no letem mi mi go long han blong ol man we oli agensem mi,*+From i gat ol giaman witnes we oli girap agensem mi,+Mo oli stap mekem sam nogud samting blong mekem mi mi fraet.
13 ?Bambae mi stap wea naoia, sipos mi no bilifSe mi save luk ol gudfala fasin blong Jehova taem mi laef yet?*+
14 Yu mas putum hop blong yu long Jehova.+
Yu mas gat strong tingting mo mekem hat blong yu i strong.+
Yes, yu mas putum hop blong yu long Jehova.
Ol futnot
^ NT: “tabu ples ya.”
^ NT: “we mi tingting gud long hem.”
^ NT: “plei miusik blong presem.”
^ NT: “long sol blong ol man we oli stap agensem mi.”
^ MNT: “Mi mi bilif fulwan se bambae mi luk ol gudgudfala fasin blong Jehova taem mi laef yet.”
