Ol Witnes blong Jehova oli kasem plante moa kakae long saed blong spirit tru long dijital fomat i bitim bifo. Be long sam ples long wol, ol brata blong yumi oli no gat naf mane blong pem intenet. Sam narafala oli laef long ol eria we plante taem intenet i no wok, o i slo tumas, o i no gat intenet nating.

 !Be naoia, plante brata mo sista blong yumi oli save daonlodem ol buk mo magasin iven sipos oli no gat intenet! ?Olsem wanem oli save mekem samting ya?

 JW Box hem i wan smol tul we oli givim long ol kongregesen we oli no gat gudfala akses long intenet. Insaed long boks ya, i gat wan rauta we oli pem long wan kampani, wan program we Kompiuta Dipatmen blong Betel i putum, mo i gat ol buk mo video we oli stap finis long jw.org. Praes blong ol boks ya wanwan i samwe 8,000 Vatu.

 Long haos Kingdom, ol brata mo sista oli yusum divaes blong olgeta blong konek long wifi we i kamaot long JW Box, mo oli daonlodem ol buk mo ol video. Olgeta we divaes blong olgeta i olfala, o i no sas, olgeta tu oli save konek. Be sipos wan kongregesen i no gat intenet, ?olsem wanem JW Box ya i kasem ol niufala buk mo magasin? Branj ofis i fulumap ol niufala samting we oli jes kamaot long jw.org, i go long ol USB ki we praes blong olgeta wanwan i samwe 400 Vatu, mo i sanem i go long kongregesen blong oli putum i go long ol JW Box ya.

 ?Olsem wanem JW Box ya i givhan long ol brata? Nathan Adruandra, wan papa we i laef long Demokratik Ripablik blong Kongo, i eksplenem se: “Mi traehad longtaem blong daonlodem drama ya ‘O Jehova, . . . Mi Mi Trastem Yu’ mo Tingbaot Waef Blong Lot. Be mi neva kasem, mo mi harem nogud from. Naoia mi daonlodem ol video ya long fon blong mi, mo hemia i halpem mifala ol perens blong tijim gud ol pikinini blong mifala.”

 Wan brata we i givhan long ol kongregesen long Naejeria blong setemap JW Box blong olgeta i talem se: “Ol brata oli luk JW Box ya olsem wan spesel presen we i kam long Jehova. Oli glad tumas se naoia i isi nomo blong oli daonlodem ol buk mo ol video long Tijing Tulboks.”

 Oli sanem bitim 1,700 boks i go long ol brata blong yumi long Afrika, ol Pasifik aelan, mo Saot Amerika, mo oli plan blong sanem olgeta i go long plante moa kongregesen bakegen. ? Oli karem mane wea blong mekem ol samting ya? Hemia ol presen mane we ol brata sista oli givim blong sapotem wok long fulwol, we oli givim tru long websaet ya donate.mt1130.com. Tangkiu tumas from gladhat blong yufala blong givim ol presen mane ya.