I gat plante handred milian man oli laef long Latin Amerika, mo plante milian long olgeta oli gat prapa lanwis mo kastom blong olgeta. Plante oli wosipim Jehova olsem yumi, mo oli tinghae long kalja blong olgeta. Oli transletem ol buk blong ol Witnes blong Jehova i go long bitim 130 lanwis blong Latin Amerika, blong givhan long ol man blong oli kasem save long ol trutok blong Baebol. a Be sam man oli agensem olgeta we oli jusum blong wosipim Jehova, from we oli no joen long eni kastom we Baebol i agensem. ?Olsem wanem presen mane blong yu i givhan long olgeta?

 Long wan Huikol komuniti long ol hil blong Jalisko Stet, Meksiko, ol brata mo sista oli talem wetem respek se bambae oli no joen long wosip we Baebol i agensem. b Be samfala long komuniti oli kam kros. Long 4 Disemba 2017, wan bigfala hip blong ol man we oli kros tumas oli atakem wan grup blong ol Witnes mo samfala we oli stap wetem olgeta. Oli ronemaot olgeta long vilej, oli spolem haos blong olgeta, mo oli talem se sipos oli traem blong kambak, bambae oli kilim olgeta i ded.

 Ol Witnes long ol taon klosap oli givim ol samting we ol brata mo sista oli nidim. ?Be oli save kasem wanem help blong gobak long haos blong olgeta? Wan brata we nem blong hem Ogistin, i talem se: “Mifala i no gat mane blong pem wan loea, mo mifala i no save wan man we i save givim advaes long mifala long saed blong loa.”

 From we ol man oli tekemaot raet blong ol brata blong mekem wosip, branj ofis blong Sentrol Amerika i tekem aksen kwiktaem. Fastaem oli askem long ol haeman blong taon blong lukluk long bisnes ya. Biaen, Kodineta Komiti blong Hed Kampani blong ol Witnes blong Jehova i agri se oli save wok wetem Ligol Dipatmen long wol hedkwota, blong halpem ol Huikol brata mo sista blong putum ol man blong agens long kot. Kot kes ya i go kasem Saprim Kot blong Jastis blong Nesen, hemia kot we i hae moa long ol narafala kot long Meksiko.

 Wan tim blong ol loea blong narafala kantri oli rerem ol tok blong talem long kot. Oli eksplenem klia se ol komuniti blong ol manples oli mas respektem mo protektem raet blong ol man blong mekem wosip, olsem ol man long komuniti oli mas respektem kalja blong ol manples. Nomata se man i laef wea, be ol narafala man oli mas respektem raet blong hem.

 Long 8 Julae 2020, Saprim Kot blong Jastis i mekem wan desisen we i sapotem ol Witnes blong Jehova. Kot i talem se komuniti we i ronemaot ol Witnes i mas letem olgeta oli kambak. Ogistin, we yumi tokbaot bifo, i talem olsem wanem hem mo ol narafala oli glad, i se: “Mifala i glad tumas mo mifala i talem bigfala tangkiu long ol brata we oli givhan long mifala. Sipos oli no givhan, mifala i no save mekem wan samting.”

 Long semtaem, ol brata long San Juan de Iluman, wan vilej long Ekwado we plante manples blong Otavalo Vali oli laef long hem, oli fesem fasin agens tu. Long 2014, oli kasem ol pemit blong bildim wan Haos Kingdom, mo oli statem wok ya. Be wan pris i girap, i lidim wan bigfala hip blong bitim 100 man, blong fosem ol brata blong stopem wok ya. Afta, komuniti i talem long ol Witnes se oli no mas mekem ol miting blong wosip.

 Ligol dipatmen long branj ofis long Ekwado mo hemia long wol hedkwota, oli wok tugeta blong givhan long kongregesen blong stretem problem ya we i blokem raet blong olgeta blong wosip. Ol brata oli tekem ol man blong agens oli go long kot. Hemia i mekem se komuniti i stopem fasin agens blong olgeta mo i letem kongregesen i mekem ol miting bakegen, mo oli gohed blong finisim Haos Kingdom. Be blong protektem raet blong ol brata long fiuja, oli askem long kot we i hae moa blong mekem wan desisen long impoten kwestin ya: ?Ol komuniti blong ol manples oli mas respektem ol loa long saed blong raet blong man olsem ol narafala kantri long wol?

 Long 16 Julae 2020, Konstitusenal Kot blong Ekwado, we i hae moa long ol narafala kot long kantri ya, i harem kes ya. Ol loea we oli representem kongregesen, oli ol brata blong Ekwado. Mo tu, fo brata we oli loea long narafala kantri, oli joen long kot kes ya. From ol rul long saed blong COVID-19, oli stap long kantri blong olgeta mo oli toktok tru long video konfrens. Hemia fastaem we eni kot i letem wan ligol tim we i representem ol Witnes blong Jehova, oli yusum fasin ya blong toktok long wan kot kes. c Tim ya i tokbaot sam eksampol long ol narafala ples blong wol, blong pruvum se ol manples we oli laef long komuniti blong olgeta, oli gat raet yet blong mekem samting we wanwan long olgeta i wantem.

 Ol brata long Otavalo Vali oli stap wet blong harem desisen blong Konstitusenal Kot. Samting we ol brata oli mekem blong givhan long olgeta, i tajem hat blong olgeta. Sesa, we hem i wan elda long Iluman Quichua Kongregesen, i talem se: “Jehova nomo, tru long oganaesesen blong hem, i save mekem bigfala samting olsem blong wan smol grup.”

 Ol loea we oli representem ol Witnes blong Jehova, oli glad blong mekem wok ya fri nomo. Be i nidim taem mo mane blong putum ol kes ya long kot, rerem olgeta, mo go toktok long kot. Ol loea blong yumi mo ol narafala brata oli spenem bitim 380 aoa blong rerem kot kes ya mo 240 aoa bakegen, blong transletem ol pepa we bambae oli yusum long kot long Meksiko. Klosap 40 loea blong ol narafala kantri oli spenem plante handred aoa long kot kes ya long Ekwado. ?Mane blong mekem ol samting ya, i kam wea? Hemia presen mane we yufala i givim, long ol rod we websaet ya donate.mt1130.com i tokbaot. Tangkiu tumas long presen mane ya we yufala i givim wetem glad hat.