“God i wantem . . . we yufala i no mekem trabol wetem woman no wetem man.”—1 Tesalonaeka 4:3.

?OL MAN OLI TALEM WANEM?

Long sam kantri, ol man oli ting se i oraet nomo we boe mo gel i slip wanples bifo we tufala i mared, sipos tufala tugeta i agri. Long sam narafala ples, maet ol man oli no wantem we boe mo gel i slip wanples bifo mared, be oli ting se i oraet nomo we tufala i mekem sam fasin olsem tajem ol tabu ples long bodi blong tufala.

?BAEBOL I TALEM WANEM?

Baebol i yusum tok ya ‘slip olbaot’ taem i tokbaot sam rabis fasin we man mo woman i mekem bifo we tufala i mared. God i talem long ol man we oli wosipim hem se oli no mas slip olbaot. (1 Tesalonaeka 4:3) Man we i slip olbaot i mekem bigfala sin, sem mak long man we i stilim woman blong narafala man, i wok wetem rabis spirit, i drong, i wosipim aedol, i kilim man i ded, no i stil.—1 Korin 6:9, 10; Revelesen 21:8.

?FROM WANEM SAVE YA I IMPOTEN?

Baebol i givim woning se “God bambae i jajem boe mo gel we tufala i slip wanples.” (Hibrus 13:4) Samting we i moa impoten, se taem yumi obei long loa ya blong Jehova God, yumi soemaot se yumi lavem hem. (1 Jon 5:3) Hem i blesem ol man we oli obei long ol tok blong hem.—Aesea 48:18.

“Ol fasin nogud blong man wetem woman mo ol narafala krangke fasin olsem, mo fasin blong man we i wantem evri samting, bambae yufala i no tokbaot.” —Efesas 5:3.

?OL MAN OLI TALEM WANEM?

Plante man oli ting se man mo woman i no mas slip wanples bifo we tufala i mared. Be oli ting se i oraet nomo we tufala i holholem tufala mo tajem ol tabu ples long bodi blong tufala.

?BAEBOL I TALEM WANEM?

Taem Baebol i tokbaot ol rabis fasin, hem i agensem fasin ya blong slip olbaot. Be i no hemia nomo. Hem i agensem man we i mekem doti fasin tu, mo i agensem man we i no sem blong mekem ol krangke fasin. (2 Korin 12:21) Maet man mo woman we tufala i no mared, tufala i no slip wanples, be i gat sam fasin yet we tufala i no mas mekem, from we God i no glad long ol fasin ya.

Bigfala tingting we i stap long Baebol, hemia se ol man mo woman we oli mared finis, olgeta nomo oli gat raet blong mekem ol fasin we i save lidim olgeta blong oli slip wanples. Baebol i agensem man we i wantem tumas ol rabis fasin blong man wetem woman. (1 Tesalonaeka 4:5) ?Hemia i minim wanem? Yu traem tingbaot: Maet wan gel i gat strong tingting se bambae hem i no slip wetem boefren blong hem gogo tufala i mared. Be hem i mekem ol narafala fasin olsem holholem boefren blong hem mo tajem ol tabu ples long bodi blong hem. Taem tufala i mekem olsem, tufala i wantem tumas samting we tufala i no gat raet blong kasem. Wan boe tu i save mekem sem samting. Be Baebol i agensem fasin ya.—Efesas 5:3-5.

“Bambae yufala i no moa mekem fasin nogud wetem woman.”—1 Korin 6:18.

?FROM WANEM SAVE YA I IMPOTEN?

Boe mo gel we tufala i slip wanples bifo we tufala i mared, tufala i no moa fren gud wetem God.—Kolosi 3:5, 6.

?BAEBOL I TALEM WANEM?

Baebol i talem se yumi no mas slip olbaot. (1 Korin 6:18) Taswe, man i mas stap longwe long ol samting we i save lidim hem blong mekem rabis fasin ya. (Ol Proveb 22:3) Sipos yumi wantem holem klin fasin, yumi no mas fren wetem olgeta we oli sakemaot loa blong God, nao oli mekem olkaen rabis fasin. Baebol i givim woning ya se: “Sipos man i go joen long ol waes man, bambae hem i save kam waes, be sipos hem i go mekem fren wetem ol man we oli no gat hed, bambae hem i spolem hem nomo.”—Ol Proveb 13:20.

Sipos yumi tingting long ol rabis fasin, hemia tu i save lidim yumi blong mekem olgeta. (Rom 8:5, 6) Taswe, i gud yumi no lesin long ol rabis miusik, yumi no lukluk ol rabis muvi, yumi no ridim ol rabis buk we oli soemaot ol rabis fasin we God i no glad long olgeta.—Ol Sam 101:3.