Wan ripot we i kamaot long Dipatmen blong Agrikalja long Amerika i talem se: Long sam manis blong yia 2012, i gat 49 milian famle long Amerika we oli kasem hadtaem from kakae. Samfala oli “no save kasem kakae we famle i nidim, mo samfala oli no naf nating blong givim kakae long evriwan long famle.”

Wan stadi we oli mekem long ol studen blong wan yunivesiti, i soemaot se samwe long 56 pesen blong ol woman mo 41 pesen blong ol man, oli stap dring plante strong dring. Ol man oli dring 8 botel bia wantaem, mo ol woman oli dring 6 botel bia wantaem.

Ol saentis we oli stap stadi long ol samting aninit long solwota blong Mariana, we i dip olsem 11,000 meta, oli faenemaot se i gat plante smosmol bebet we oli laef long ples ya. Fastaem, oli ting se i no gat wan samting i save laef long ples ya, from we ples i tudak, solwota i muvmuv strong mo i kolkol tumas.

Plante man long Dubai oli stap kam fatfat tumas. Taswe, blong katemdaon namba blong ol man we oli fatfat, gavman i talem se bambae hem i givim 1 gram blong gol (long taem ya, praes blong hem i samwe long 4,219 vatu), long ol man we oli lusum 1 kilo. Sipos ol man oli wantem kasem gol ya, oli mas putum nem blong olgeta fastaem mo oli mas lusum 2 kilo long manis ya Ramadan, long kalenda blong ol Muslim.