?OL MAN OLI TALEM WANEM?

Sam man oli ting se i stret nomo blong mekem eni samting we oli wantem long ol anamol. Be samfala oli ting se ol man oli mas mekem i gud long anamol sem mak olsem we oli mekem long man.

• Wan man we i laekem ol anamol i talem se: “Yumi mas lukaotgud long ol anamol, yumi no mas spolem olgeta olsem we oli nating nomo.” Hem i talem tu se: “Yumi no mas yusum ol anamol olbaot nomo olsem wan tul.”

• Wan rij woman we nem blong hem Leona Helmsley i putum bitim 1 bilian vatu long bang akaon blong hem, se i blong lukaot long dog blong hem. Hem i wantem tu se taem dog blong hem i ded, bambae oli berem hem klosap long gref blong hem.

Samting blong tingbaot: ?Ol man i mas lukaotgud long ol anamol olsem wanem?

?BAEBOL I TALEM WANEM?

Jehova God i stamba blong laef blong olgeta samting. Hem i talem se ol man oli mas “bos long ol fis, wetem ol pijin, mo ol narafala samting we i gat laef we oli stap long wol ya, i stat long olgeta we oli bigbigfala, i go kasem olgeta we oli smosmol.” (Jenesis 1:28) Taswe i stret nomo blong talem se God i tinghae long yumi ol man i bitim ol anamol.

Tingting ya i kam klia moa folem tok blong Baebol se: “Nao hem i mekem man, mo man ya i tekem fasin blong hem, i olsem hem stret. Fastaem, hem i mekem tu man nomo, wan we i man mo wan we i woman.”—Jenesis 1:27.

God i mekem yumi, taswe yumi save “tekem fasin blong hem,” olsem waes, stret fasin, mo lav. Mo tu yumi naf blong soemaot ol fasin we i gud mo ol fasin we i nogud, mo blong fren gud wetem God. Ol anamol oli no gat ol fasin ya from we God i no mekem olgeta blong oli “tekem fasin blong hem.” Anamol i daon moa long man mo fasin blong lukaot long hem i no semak long fasin blong lukaot long man.

?Hemia i min se ol man oli gat raet blong spolem ol anamol? Nogat.

• Long Loa we God i givim long ol man Isrel, hem i wantem se ol anamol oli spel, oli gat kakae, mo oli no wok strong tumas. Mo man i mas lukaotgud long olgeta blong oli no kasem kil.—Eksodas 23:4, 5; Dutronome 22:10; 25:4.

“Oltaem bambae yufala i mas wok sikis dei, be long namba seven dei, bambae yufala i no mas wok. Nao long fasin ya . . . ol anamol blong yufala tu oli save spel.” —Eksodas 23:12.

?OL MAN OLI TALEM WANEM?

Sam man blong lukaot ol anamol mo ol fisaman oli stap kilim ol anamol jes blong mekem spot nomo, no from we ol anamol ya oli wantem kakae olgeta. Be sam narafala man oli gat sem tingting olsem man Rasia ya, Leo Tolstoy, we i talem se man we i kilim mo i kakae anamol, hem i mekem “wan rabis samting.”

?BAEBOL I TALEM WANEM?

God i letem ol man oli kilim ol anamol blong protektem olgeta long denja, mo blong yusum skin blong anamol blong mekem klos. (Eksodas 21:28; Mak 1:6) Baebol i talem tu se ol man oli save kilim anamol blong kakae. Jenesis 9:3 (NW) i talem se: “Olgeta anamol we i stap wokbaot mo i laef, yufala i save kakae olgeta.” Jisas tu i givhan long ol disaepol blong hem blong oli kasem fis blong kakae.—Jon 21:4-13.

Baebol i talem tu se God i “no laekem nating olgeta we oli laekem tumas blong mekem faet.” (Ol Sam 11:5) Taswe i klia nomo se God i no wantem we yumi spolem mo kilim ol anamol, jes blong harem gud no blong mekem spot nomo.

Baebol i talem se God i tinghae long laef blong ol anamol.

• Baebol i tokbaot taem ya we God i mekem olgeta samting, i se: “Hem i mekem ol naranarafala samting we i gat laef we oli stap long graon ya. Ol anamol blong vilej wetem ol anamol blong bus, i stat long olgeta we oli bigbigfala, i go kasem olgeta we oli smosmol, be hem i mekem olgeta evriwan. Mo taem hem i luk ol wok ya blong hem, hem i luk we i gud tumas.”—Jenesis 1:25.

• Baebol i tokbaot Jehova se: “Hem i stap givim kakae long ol anamol.” (Ol Sam 147:9) God i mekem wol ya blong i save givim kakae long ol anamol mo ples blong oli save laef long hem.

• King Deved i prea se: “Yu yu stap lukaot gud long ol man mo long ol anamol tu.” (Ol Sam 36:6) Long taem blong Noa, Jehova i sevem 8 man nomo mo ol anamol, mo hem i spolem ol rabis man.—Jenesis 6:19.

I klia nomo se Jehova i kea long ol anamol we hem i mekem mo hem i wantem tu se yumi ol man yumi kea gud long ol anamol.

“Gudfala man, hem i stap lukaot gud long ol anamol blong hem.” —Ol Proveb 12:10.