1, 2. ?Wanem tingting blong ol man blong God long saed blong wol ya? ?Oli gat wanem kaen hom?

 ?OLSEM wanem? ?Yu yu harem se yu sef mo yu stap gud long wol ya, olsem se yu stap long hom blong yu nomo? Sipos yu harem se nogat, yu yu olsem ol narafala man blong God bifo. Olgeta man we oli lavem Jehova, oli harem olsem se oli strenja nomo long wol ya. Yu traem tingbaot sam long ol man blong God bifo, we oli laef long ol haos tapolen long Kenan. Olgeta tu oli harem olsem. Baebol i talem se oli “stap talemaot we oli stap long wol ya, be i olsem we oli strenja nomo, wol ya i no prapa ples blong olgeta.”—Hib. 11:13.

² Ol man blong Kraes we tabu spirit i makemaot olgeta, oli “man blong heven” no sitisen blong heven. Olgeta tu oli harem se oli “olsem ol strenja nomo, mo olsem ol man we oli no gat hom blong olgeta” long wol ya. (Fil. 3:20; 1 Pita 2:11) “Ol narafala sipsip” blong Kraes tu oli “no man blong wol ya,” olsem Jisas. (Jon 10:16; 17:16) Be ol man blong God oli gat wan hom blong olgeta. I no wan hom we yumi save luk wetem prapa ae blong yumi, be hom ya i moa sef mo i gat moa lav long hem, i bitim eni narafala hom we yumi gat. ?Hom ya hem i wanem? Moses i raetem se: ‘Jehova. I stat bifo olgeta kam kasem tede, oltaem, yu yu olsem hom blong mifala.’ (Sam 90:1) Jehova i olsem hom blong ol man blong hem. ?Yu yu save olsem wanem Jehova i hom blong ol man blong hem bifo? ?Olsem wanem hem i hom blong ol man blong hem tede? ?Mo olsem wanem bambae hem i hom blong ol man blong hem long fiuja?

3. ?Ol Sam 90:1 i talem se Jehova i olsem wanem, mo from wanem?

³ Samtaem Baebol i yusum ol samting we yumi save luk, olsem pijatok blong halpem yumi blong kasem save long ol fasin blong Jehova. Yu traem tingbaot. Ol Sam 90:1 i talem  se Jehova i olsem wan hom. Taem yumi harem tok ya hom, yumi tingbaot wan ples we i gat lav, i gat pis, mo wan ples we man i stap sefgud long hem. ?From wanem Baebol i talem se Jehova i olsem wan hom? Baebol i talem se Jehova i stamba blong fasin ya blong lavem ol man. (1 Jon 4:8) Mo tu, Baebol i talem se Jehova i save mekem tingting blong ol man blong hem i kwaet, i min se oli stap long pis. Mo hem i mekem oli harem se oli sef. (Sam 4:8) Naoia, bambae yumi tokbaot olsem wanem Jehova i hom blong Ebraham, Aesak, mo Jekob.

4, 5. ?Jehova i blesem mo i lukaot gud long Ebraham olsem wanem?

⁴ Jehova i talem long Ebraham se: “Yu mas aot long ples ya blong yu, mo long ol famle blong yu, mo long haos blong papa blong yu, nao bambae yu mas go long wan narafala kantri, we mi bambae mi soemaot long yu.” Maet Ebraham i wantem save se from wanem Jehova i talem tok ya long hem. Nao Jehova i talem long hem se: “Bambae mi mi mekem we yu yu gat plante pikinini we bambae oli kamaot biaen long yu, nao bambae olgeta ya oli kam plante we plante. Bambae oli kam wan strongfala laen. Mi bambae mi blesem yu, mo bambae mi mekem we plante man oli savegud nem blong yu.” Ating ol tok ya oli mekem Ebraham i harem gud. Mo Jehova i toktok bakegen i se: “Olgeta we oli singaot long mi blong mi blesem yu, mi bambae mi blesem olgeta, be olgeta we oli singaot trabol i kam long yu, mi bambae mi mekem trabol i kam long olgeta.”—Jen. 12:1-3.

⁵ Jehova i promes se bambae hem i blesem Ebraham mo ol pikinini we bambae oli kamaot biaen long hem, mo bambae hem i lukaot gud long olgeta. Mo Jehova i mekem samting we hem i promes blong mekem. (Jen. 26:1-6) Yu traem tingbaot. Hem i blokem king blong Ijip mo King Abimelek blong Gerara, blong oli no kilim Ebraham i ded mo tekemaot woman blong hem, Sera. Hem i mekem sem mak long Aesak mo Rebeka. (Jen. 12:14-20; 20:1-14; 26:6-11) Baebol i talem se Jehova “i no letem ol man long ol ples ya oli spolem olgeta. Hem i tok long ol king from olgeta, i talem se, ‘!Yufala i lukaot! Yufala i no spolem ol man blong mi we mi mi jusumaot olgeta, mo yufala i no tajem ol profet ya blong mi.’”—Sam 105:14, 15.

6. ?Aesak i talem se Jekob i mas mekem wanem? ?Maet Jekob i tingting olsem wanem?

⁶ Jehova i lukaot gud tu long Jekob, smol bubu blong Ebraham. Taem Jekob i rere blong mared, papa blong hem Aesak, i talem long hem se: “Bambae yu yu no mas mared long wan gel Kenan. Yu mas gobak long kantri ya Mesopotemia, long ples blong bubu blong yu Betuel. Man ya Laban we i brata blong mama blong yu, hem i stap long ples ya. I gud yu mared long wan dota blong hem.” (Jen. 28:1, 2) Jekob i mekem samting we papa blong hem i talem. Hem i lego famle blong hem long Kenan, mo i wokbaot  plante handred kilometa i go long Haran. (Jen. 28:10) Maet hem i stap tingting se: ‘?Bambae mi stap longwe kasem wetaem? ?Angkel blong mi bambae i glad taem i luk mi? ?Bambae mi faenem wan woman we i lavem Jehova?’ Be taem hem i kasem ples ya Lus, hemia 100 kilometa longwe long Bereseba, wan samting i hapen long hem we i mekem se hem i no moa wari. ?Wanem samting i hapen?

7. ?God i mekem Jekob i harem gud olsem wanem?

⁷ Long ples ya Lus, Jehova i kamtru long Jekob long wan drim, nao i talem long hem se: “Long evri ples we bambae yu pas long hem, mi bambae mi stap wetem yu blong lukaot long yu, mo bambae mi tekem yu yu kambak long ples ya bakegen. Bambae mi no save lego yu, gogo mi mekem olgeta samting ya we mi promes long yu blong mekem.” (Jen. 28:15) !Ating toktok ya i mekem Jekob i harem gud tumas! Maet Jekob i wantem tumas blong luk se promes ya bambae i kamtru olsem wanem. Sipos yu yu lego hom blong yu, maet blong go prij long wan narafala kantri, ating yu tu yu wari olsem Jekob. Be yu luk se Jehova i lukaot gud long yu long plante rod.

8, 9. ?Jehova i “hom” blong Jekob olsem wanem? ?Stori blong Ebraham, Aesak, mo Jekob, i soemaot wanem long saed blong Jehova?

⁸ Taem Jekob i kasem Haran, angkel blong hem Laban, i glad tumas mo i tekem hem i go long haos blong hem. Biaen hem i givim tufala gel blong hem, Lea mo Rejel, blong tufala i kam woman blong Jekob. Be taem ol yia oli pas, Laban i stat blong mekem i no stret long Jekob, mo i jenisim fasin blong makem pei blong hem ten taem. (Jen. 31:41, 42) Nating se i olsem, Jekob i stanap strong from we hem i trastem se Jehova bambae i lukaot gud long hem. Ale Jehova i blesem hem. Taem Jekob i gobak long Kenan, hem i gat “plante sipsip mo plante nani blong hem, mo plante man slef mo plante woman slef blong hem, mo plante kamel mo plante dongki tu.” (Jen. 30:43) Jekob i tinghae bigwan long samting we Jehova i mekem, ale hem i prea se: “Fasin blong yu, oltaem yu stap lavem mi tumas, mo oltaem yu stap holem promes blong yu long mi. Mi mi no wan gudfala man, mi man blong wok blong yu nomo, mo i no stret blong yu stap mekem i gud tumas long mi olsem. Taem mi krosem Jodan Reva ya bifo, mi go, mi stap holem stik nomo blong wokbaot, be naoia mi stap kambak we mi gat tufala kampani ya blong ol man wetem ol narafala samting ya blong mi.”—Jen. 32:10.

⁹ Ol stori ya oli soemaot se Moses i tok tru taem hem i talem se: ‘Jehova. I stat bifo olgeta kam kasem tede, oltaem, yu yu olsem hom blong mifala.’ (Sam 90:1) Fasin blong Jehova i no jenis. Hem i lavem yet ol man blong hem, mo i lukaot gud long olgeta. (Jem. 1:17) Naoia bambae yumi tokbaot olsem wanem hem i mekem samting ya.

10. ?Olsem wanem yumi save se Jehova i “hom” blong ol man blong hem tede?

¹⁰ Yu traem tingbaot se yu stap long kot, mo yu givim witnes agensem wan hae man we i waes mo we i gat paoa. Man ya i man blong giaman, i stap kilim ol man oli ded, mo long evri ples long wol, hem i gat ol man we oli stap wok blong hem. ?Bambae yu harem olsem wanem taem kot i finis mo yu stap gohom? ?Yu harem se yu sef? !Nogat! Bambae yu askem long ol polis blong oli protektem yu. Long sem fasin, yumi ol man blong Jehova, yumi stap givim witnes agensem Setan, we hem i rabis enemi blong Jehova. (Ridim Revelesen 12:17.) Setan i traem blong blokem ol man blong God blong oli no moa givim witnes. ?Olsem wanem? ?Hem i winim olgeta? !Nogat! Yumi gohed blong prij long plante moa man long olgeta ples long wol. ?From wanem yumi naf blong gohed olsem? From wan samting nomo: Jehova i “hom” blong yumi. Hem i stap lukaot gud moa long ol man blong hem long ol las dei ya, mo i stap blesem olgeta. (Ridim Aesea 54:14, 17.) Be Jehova i save gohed blong stap olsem “hom” blong yumi sipos yumi no letem Setan i trikim yumi.

11. ?Eksampol blong Ebraham, Aesak mo Jekob i tijim yumi long wanem narafala samting?

¹¹ I gat wan narafala samting we yumi lanem  long eksampol blong Ebraham, Aesak, mo Jekob. Olgeta oli laef long Kenan, be oli no joen wetem ol man long kantri ya mo oli no laekem nating ol rabis fasin blong olgeta. (Jen. 27:46) Ebraham olgeta oli no nidim wan longfala lis blong ol rul, from we oli save samting we Jehova i laekem mo samting we hem i no laekem nating. Oli mekem evri samting we oli naf blong mekem, blong oli no joen long wol. !Oli soemaot wan gudfala eksampol long yumi! ?Olsem wanem? ?Yu yu traehad blong folem fasin blong olgeta? ?Yu yu jusum gud ol fren blong yu, mo ol samting we yu mekem blong pleplei mo spel? Sipos yu mekem olsem, yu soemaot se yu no wantem joen long wol. Sore tumas, i gat sam long yumi we oli harem se wol blong Setan i olsem hom blong olgeta. Sipos yu tu yu harem olsem, yu mas prea blong Jehova i givhan long yu. Yu mas tingbaot se wol ya i blong Setan, mo hem i no kea long yumi nating, hem i tingbaot hem wan nomo.—2 Kor. 4:4; Efes. 2:1, 2.

12. (1) ?Jehova i givhan long ol man blong hem olsem wanem? (2) ?Wanem tingting blong yu long ol samting ya we Jehova i givim blong givhan long yumi?

¹² Sipos yumi no wantem se Setan i trikim yumi, yumi mas yusum gud olgeta samting we Jehova i givim blong givhan long ol man blong hem. Jehova i givim ol miting, famle wosip, mo ol elda we oli leftemap tingting blong yumi mo oli givhan long yumi blong stanap strong long ol trabol. (Efes. 4:8-12) Brata George Gangas, we i wan memba blong Hed Kampani blong plante yia, i talem se: ‘Taem mi stap wetem ol man blong God, mi harem se mi stap long hom wetem famle blong mi.’ ?Yu tu yu harem sem mak?

13. ?Wanem impoten samting we yumi lanem long Hibrus 11:13?

¹³ Wan narafala impoten samting we yumi lanem long eksampol blong Ebraham, Aesak, mo Jekob, se yumi no mas fraet blong stap defren long ol man raonabaot long yumi. Olsem yumi talem long  haf 1, ol man blong God bifo oli “stap talemaot we oli stap long wol ya, be i olsem we oli strenja nomo, wol ya i no prapa ples blong olgeta.” (Hib. 11:13) ?Olsem wanem? ?Yu yu soemaot se yu defren long ol man blong wol? Samtaem i no isi blong mekem olsem. Be yu save stap defren sipos God mo ol brata mo sista oli givhan long yu. Yu mas tingbaot se i no yu wan nomo we yu mas stap defren. Olgeta evriwan we oli wantem mekem wok blong Jehova, oli mas faet agensem Setan mo wol blong hem. (Efes. 6:12) Be yumi save winim faet ya sipos yumi trastem Jehova mo yumi mekem hem i kam hom blong yumi.

14. ?Wanem “taon” ya we Ebraham i stap wet long hem?

¹⁴ Yumi mas folem fasin blong Ebraham mo yumi mas putum tingting blong yumi i stap long praes we bambae yumi kasem. (2 Kor. 4:18) Aposol Pol i talem se Ebraham i ‘stap wet long wan taon we fandesen blong hem i save stap oltaem  nomo. Taon ya, God i mekem ol plan blong hem.’ (Hib. 11:10) “Taon” ya hem i Kingdom blong God. Ebraham i mas wet blong taon ya i kamtru. Be yumi, yumi no nid blong wet. Kingdom ya i stap rul long heven finis. Mo profet tok blong Baebol i soemaot klia se klosap nao Kingdom ya bambae i rulum wol. ?Olsem wanem? ?Fasin blong laef blong yu i soemaot se yu yu bilif long Kingdom ya? ?Yu yu putum Kingdom ya long fas ples long laef blong yu mo yu no joen long wol?—Ridim 2 Pita 3:11, 12.

15. ?Wanem bambae i hapen long olgeta we oli trastem wol ya?

¹⁵ Bifo we en i kamtru, ol trabol long wol ya bambae oli kam moa nogud. (Mat. 24:7, 8) Mo taem bigfala trabol i stat, laef bambae i kam moa had. Long evri ples long wol, ol samting we ol man oli putum tingting blong olgeta long hem, bambae oli brokdaon. Bambae tingting blong ol man i fasfas mo oli fraet. (Hab. 3:16, 17) Baebol i talem se bambae oli fraet tumas, ale oli go haed long “ol hol blong ston, mo aninit long ol bigbigfala ston olbaot long ol hil.” (Rev. 6:15-17) Be ol hol blong ston bambae oli no save protektem olgeta, mo ol bigfala bisnes mo ol politik paoa tu oli no save protektem olgeta.

16. ?Wanem tingting we yumi mas gat long saed blong kongregesen? ?From wanem?

¹⁶ Jehova bambae i mekem se yumi stap sef long taem blong bigfala trabol. Sem mak long profet Habakuk, bambae yumi harem gud from we Jehova i God blong yumi mo i stap sevem yumi. (Hab. 3:18) ?Long trabol taem ya, Jehova bambae i protektem yumi olsem wanem? Yumi no save, bambae yumi jes luk. Be yumi save se Jehova bambae i givim sam save blong lidim ol man blong hem blong oli wok folem plan, olsem ol man Isrel bifo, taem oli aot long Ijip. (Ridim Eksodas 13:18; Rev. 7:9.) ?Jehova bambae i givim ol save ya olsem wanem? Maet bambae hem i yusum kongregesen blong talem samting we yumi mas mekem. Aesea 26:20 i talem se ol man blong God bambae oli haed insaed long ol “haos.” Maet hemia i minim ol kongregesen raonabaot long wol. (Ridim Aesea 26:20.) ?Olsem wanem? ?Yu yu tinghae long ol miting blong kongregesen? ?Yu yu stap obei long ol tok we yu yu harem long kongregesen?—Hib. 13:17.

17. Jehova i olsem “hom” blong ol man blong hem we oli ded finis. ?Hemia i minim wanem?

¹⁷ Jehova bambae i olsem “hom” blong ol man blong hem tu we oli ded bifo long bigfala trabol. ?Hemia i minim wanem? Bambae hem i mekem oli laef bakegen. Longtaem afta we Ebraham, Aesak, mo Jekob i ded, Jehova i talem long Moses se: “Mi mi God blong Ebraham, mo mi God blong Aesak, mo mi God blong Jekob.” (Eks. 3:6) Jisas tu i talem tok ya long saed blong God, mo hem i ademap se: “God ya i God blong man we i laef, hem i no God blong man we i ded.” (Luk 20:38) Jehova i save se bambae hem i mekem ol man blong hem we oli ded, oli laef bakegen. Taswe long tingting blong hem, i olsem se oli laef bakegen finis.—Pri. 7:1.

18. Long niufala wol, ?Jehova bambae i “hom” blong olgeta man blong hem olsem wanem?

¹⁸ Long niufala wol, Jehova bambae i “hom” blong ol man blong hem long wan spesel fasin. Revelesen 21:3 i talem se: “!Yu luk! Naoia God i mekem ples blong hem wetem ol man. Hem bambae i stap oltaem wetem olgeta.” Jehova bambae i yusum Jisas Kraes blong i rulum wol blong wan taosen yia. Bambae Jisas i mekem se long en blong wan taosen yia ya, stamba tingting blong Papa blong hem long saed blong wol ya, i kamtru fulwan. Biaen, bambae hem i givim Kingdom i gobak long Jehova. (1 Kor. 15:28) Ol man bambae oli stret gud olgeta, mo Jehova hem wan bambae i rul long olgeta. !Hemia wan nambawan fiuja we i stap long fored blong yumi! I gud yumi folem fasin blong ol man blong Jehova bifo, yumi mekem se Jehova i kam olsem “hom” blong yumi.