1, 2. ?Tede, fasin ya blong trikim man mo giaman i kam antap from wanem? ?Fasin ya i stap kam antap olsem wanem? (Yu luk pija antap.)

OL FASIN we man i mekem blong trikim no giaman long narafala, oli kam antap tede. Be yumi no sapraes long samting ya. Baebol i talemaot klia se wol ya i stap long paoa blong Setan. Mo hem i jampion blong giaman long man. (1 Tim. 2:14; 1 Jon 5:19) Setan i “gat smol taem nomo blong hem i stap,” ale hem i kam kros moa taem en blong rabis wol ya i stap kam klosap. (Rev. 12:12) Taswe, yumi save se olgeta we oli stap long paoa blong Setan, bambae oli mekem plante moa trik blong giaman long ol man, antap moa, long olgeta we oli mekem wosip long Jehova.

² Taem ol niuspepa, mo televisin, mo Intenet, oli tokbaot ol man blong Jehova mo bilif blong olgeta, plante taem oli giaman. Ol man oli no traem faenemaot se tok ya i tru no nogat, be oli bilif nomo long ol giaman toktok ya. Nao oli gat nogud tingting long ol man blong Jehova mo bilif blong olgeta, mo oli kam kros from.

3. ?Wanem i save givhan long yumi blong yumi agensem ol giaman toktok mo ol trik?

³ Yumi glad tumas se yumi gat Baebol, we “i stret gud blong stretem ol krangke fasin.” Hem i save givhan long yumi blong agensem ol trik ya blong Setan. (2 Tim. 3:16) Sam Kristin long Tesalonaeka bifo oli bilif long sam giaman toktok. Leta we aposol Pol i raetem i soemaot samting ya. Hem i talem strong long olgeta se oli “no hareap blong go krangke.” (2 Tes. 2:​1, 2) ?Yumi lanem wanem long woning ya we Pol i givim from we hem i lavem ol Kristin ya? ?Yumi save folem advaes ya olsem wanem long laef blong yumi?

4. ?Wanem woning blong ‘dei blong Jehova’ we i wekemap tingting blong ol Kristin long Tesalonaeka? ?Mo yumi stap kasem woning olsem wanem?

⁴ Long fas leta we Pol i raetem long ol Kristin long Tesalonaeka, hem i givim woning long olgeta from ‘dei blong Jehova.’ Hem i no wantem we tingting blong olgeta i fasfas, mo we oli no rere. Hem i talem se oli “man blong delaet,” taswe oli mas ‘wekap, we hed blong olgeta i klia gud.’ (Ridim 1 Tesalonaeka 5:​1-6.) Naoia, yumi stap wet nomo blong Bigfala Babilon, hemia ol giaman skul, i lus. Bigfala dei blong Jehova bambae i stat long taem ya. Yumi save olsem wanem Jehova bambae i mekem ol plan blong hem oli kamtru. Mo tu, long kongregesen, yumi kasem ol advaes we oli givhan long yumi blong yumi stap wekap gud. Sipos yumi tingting oltaem long ol woning ya, bambae yumi blokem ol samting we oli save mekem ‘yumi go krangke,’ mo bambae yumi wantem moa blong mekem wok blong God.​—2 Tes. 2:⁠2.

5, 6. (1) Long seken leta we Pol i raetem long ol Kristin long Tesalonaeka, ?hem i tokbaot wanem? (2) I no longtaem, ?bambae Jisas i mekem wanem? ?Wanem ol kwestin we yumi mas tingbaot?

⁵ Smoltaem biaen, Pol i sanem nambatu leta blong hem i go long ol Kristin ya long Tesalonaeka. Long leta ya, hem i tokbaot bigfala trabol we bambae i kam. Masta Jisas bambae i mekem jajmen blong God i kamtru long “olgeta we oli no save ona long God, mo long olgeta we oli no save obei long gud nius.” (2 Tes. 1:​6-8) Long 2 Tesalonaeka japta 2, Pol i talem se sam long kongregesen oli fraet mo tingting blong olgeta i trabol, taem oli harem se dei blong Jehova i klosap. (Ridim 2 Tesalonaeka 2:​1, 2.) Ol fas Kristin ya oli no gat plante save long rod we Jehova i stap folem blong mekem plan blong hem i kamtru. Pol i talem se: “Save ya blong yumi i hafhaf nomo, mo paoa ya blong yumi blong talemaot ol tok we God i givim, hem tu i hafhaf nomo. Be taem ol samting ya we oli stret gud oli kamtru, ol fasin ya blong yumi we oli hafhaf nomo, bambae oli lus.” (1 Kor. 13:​9, 10) Sipos oli lesin long ol woning we Jehova i pulum Pol mo aposol Pita mo sam tabu Kristin long taem ya blong raetem, bambae oli naf blong holemtaet strong bilif.

⁶ Blong stretem tingting blong olgeta, tabu spirit i pulum Pol blong raetem se bifo we dei blong Hem i kamtru, plante man bambae oli girap, oli agens long trutok. Oli kam ol man blong apostasi. Mo tu, “Man blong Brekem Loa,” i mas kamtru fastaem. * Afta nomo, long stret taem, Jisas bambae i “spolem” olgeta we oli foldaon long ol trik blong ol man ya. Pol i talem from wanem ol man ya oli mas kasem jajmen, hemia from we “oli no wantem folem trutok.” (2 Tes. 2:​3, 8-10) I gud yumi wanwan i askem se: ‘?Olsem wanem? ?Mi mi laekem trutok smol nomo, no mi laekem tumas? ?Mi mi stadi gud long ol niufala save long ol magasin mo ol buk we ogenaesesen blong Jehova i givim long yumi?’

7, 8. (1) ?Wanem trabol we ol Kristin bifo oli kasem? (2) ?Wanem trabol we ol tru Kristin tede oli save kasem?

⁷ Antap long ol trik blong ol man blong apos­tasi mo ol tijing blong olgeta, i gat wan narafala trap we ol Kristin tede oli save foldaon long hem. Pol i talem trap ya long Timoti, i se: “Fasin blong laekem mane tumas, hem i stamba blong olgeta fasin nogud.” Hem i gohed, i se: “I gat sam man we oli strong blong folem fasin ya, nao oli gowe finis long fasin blong bilif. Mo oli stap mekem ol samting we olgeta tu oli harem nogud tumas from.” (1 Tim. 6:10) Wan narafala trap bakegen we i stap oltaem, hemia ‘ol rabis samting we tingting blong yumi nomo i wantem.’​—Gal. 5:​19-21.

⁸ Pol i tok strong blong givim woning long ol Kristin long Tesalonaeka from ol “giaman aposol.” Sam long ol giaman aposol ya oli stap twistim trutok “blong lidim ol man blong Jisas oli biaen long olgeta, oli go krangke.” (2 Kor. 11:​4, 13; Wok 20:30) Jisas i talem ol gudfala toktok long kongregesen blong Efesas, from we oli no glad nating long “ol man nogud.” Ol Kristin long Efesas oli luklukgud long laef blong ol man ya, nao oli faenemaot se oli stap giaman nomo. Yes, oli giaman aposol tru. (Rev. 2:⁠2) Long seken leta we Pol i raetem long ol Kristin long Tesalonaeka, hem i talem se: “Ol brata mo sista. Long nem blong Jisas Kraes, Masta blong yumi, mitrifala i putum wan strong tok long yufala. Bambae yufala i no go joen long ol brata blong yumi we . . . oli no folem ol tok ya we mifala i givim finis long yufala.” Biaen, hem i tokbaot sam Kristin we oli “les blong wok.” (2 Tes. 3:​6, 10) !Sipos oli no mas joen wetem ol brata we oli les blong wok, ating oli mas lukaot gud moa blong oli no joen wetem olgeta we oli stap kam ol man blong apostasi! Tru ya, sipos oli joen wetem man olsem, oli stap long bigfala denja. Long taem blong yumi, i sem mak.​—Prov. 13:⁠20.

9. Sipos wan man i traem pulum yumi blong talemaot prapa tingting blong yumi no blong faenem poen, ?yumi mas lukaot gud from wanem?

⁹ Ol woning ya we God i givim long ol Kristin bifo oli moa impoten tede, from we yumi stap klosap nomo long taem blong bigfala trabol mo en blong rabis wol ya. Jehova i stap givhan long yumi long gladhat blong hem. Yumi ‘no mas letem gudfala wok ya blong hem i go blong nating nomo,’ nao yumi no moa kasem laef olwe. (2 Kor. 6:⁠1) Yumi mas lukaot gud sipos wan man we i stap kam long ol miting blong kongregesen, i wantem save prapa tingting blong yumi long sam samting we Baebol i no eksplenem, no hem i faenem poen long ol elda no ol narafala man blong God.​—2 Tes. 3:​13-15

10. ?Wanem ol trutok we ol Kristin long Tesalonaeka oli mas holemtaet?

¹⁰  Pol i pulum ol brata long Tesalonaeka blong oli “stanap strong” mo oli holemtaet samting we oli lanem finis. (Ridim 2 Tesalonaeka 2:15.) ?Wanem ya ol “trutok “ we oli lanem finis? Ol trutok ya i no ol tijing we ol giaman skul oli stap folem. Pol i stap tokbaot ol samting we Jisas i tijim ol man long hem, mo ol tijing we God i pulum Pol mo sam narafala blong raetemdaon. Pol i talem ol gudfala toktok long ol brata long kongregesen blong Korin, from we oli holem ol trutok ya, i se: “Yufala i stap tingbaot mi oltaem, mo yufala i stap holem ol fasin blong Kristin man, stret olsem we mi tijim yufala long hem fastaem.” (1 Kor. 11:⁠2) Oli save trastem ol tijing ya, from we Pol i kasem olgeta long God mo Jisas.

11. ?Ol giaman toktok i save mekem wanem long yumi?

¹¹ Long leta we Pol i raetem long ol Hibru Kristin, hem i talem tu samting we i save mekem se wan Kristin i kam slak mo i lego Jehova. (Ridim Hibrus 2:1; 3:12.) Wan, hemia taem wan Kristin sloslo hem i lusum rod, no sam Baebol oli talem se hem i “drif.” Nambatu, hemia taem wan Kristin hem wan, i gowe long God. Taem kenu i drif i gowe long so, maet yumi no luksave fastaem. Sloslo, kenu ya i drif i go longwe, nao yumi luksave. Be sipos yumi pusum kenu i gowe long so, yumi minim nomo se hem i gowe. Tufala samting ya i save hapen long olgeta we oli lesin long ol giaman toktok. Nao sloslo oli no moa bilif long trutok.

12. ?Yumi save westem taem long wanem samting nao yumi no moa fren wetem Jehova?

¹² Maet sam Kristin long Tesalonaeka oli foldaon long sam samting we i trikim olgeta. ?Olsem wanem? ?Samting ya i save hapen long yumi tu? Yes. I gat plante samting we oli save mekem se yumi westem taem nomo. Yu traem tingbaot hamas aoa we yumi save spenem blong toktok long ol fren blong yumi long Intenet, no blong ridim mo ansarem ol teks mesej mo imel. Sam oli spenem plante aoa long ol samting we oli laekem tumas blong mekem, no oli stap folem gud wan spot. Eniwan long ol samting ya i save pulum tingting blong wan Kristin mo mekem hem i kam slak. Nao maet hem i no moa prea wetem fulhat blong hem, i no moa spenem plante taem blong stadi Baebol, i no moa go long ol miting, mo i no moa gohed strong long wok blong prij. ?Wanem i save givhan long yumi blong yumi no go krangke olsem?

13. ?Baebol i talem se plante man bambae oli gat wanem tingting long ol las dei? ?Wanem i save mekem se bilif blong yumi i stap strong?

¹³ Yumi no mas fogetem se wol ya we Setan i bos long hem, klosap nao bambae i finis. Mo tu, yumi no mas fogetem ol trabol we i save kasem yumi, sipos yumi stap joen wetem ol man we oli no wantem luksave se yumi stap long ‘ol las dei.’ Aposol Pita i tokbaot taem blong yumi, i se: “Bambae sam man oli save kamtru, we fasin blong olgeta blong wantem ol samting nogud, hem i bos blong olgeta. Olgeta ya bambae oli laf long yufala, oli talem se, ‘?Olsem wanem nao? ?Hem i promes finis blong kam, be hem i stap wea? Ol olfala blong yumi oli lus evriwan finis, be i no gat wan samting i jenis. I stat bifo olgeta, taem we God i mekem wol ya fastaem, i kam kasem tede, evri samting oli stap sem mak nomo.’ ” (2 Pita 3:​3, 4) Sipos yumi ridim Baebol evri dei mo yumi stadi long hem, bambae yumi tingbaot oltaem se yumi stap laef long ‘ol las dei.’ Ol man blong apostasi we Baebol i tokbaot, oli kamtru longtaem finis mo oli stap yet tede. “Man blong Brekem Loa” i stap yet, mo i gohed blong agensem ol man blong God. From samting ya, yumi mas tingbaot oltaem se dei blong Jehova i klosap finis.​—Sef. 1:⁠7.

14. Sipos yumi bisi oltaem long wok blong prij, ?samting ya i protektem yumi olsem wanem?

¹⁴ Wan narafala samting we i save mekem se yumi no go krangke hemia se oltaem yumi mas bisi long wok blong talemaot Kingdom. Taem Jisas i talem long ol disaepol blong hem blong oli go pulum olgeta man oli kam man blong hem, mo blong oli tijim olgeta, hem i stap givim advaes we i save protektem olgeta. (Mat. 28:​19, 20) Blong folem tok ya blong Jisas, yumi mas wok olsem we faea i laet long tingting blong yumi. ?Yu ting se ol brata long Tesalonaeka oli prij mo tij long fasin we oli no kea long wok ya blong olgeta?  ?Oli fos nomo blong mekem? Yu traem tingbaot toktok we Pol i talem long olgeta, se oli no mas ‘blokem tabu spirit’ we i wok long tingting blong olgeta, olsem faea we i laet. Mo tu, oli no mas ting nating long ol profet tok. (1 Tes. 5:​19, 20) !Tru ya, i gat plante nambawan profet tok we yumi save stadi long olgeta, mo tokbaot wetem ol narafala!

15. ?Wanem sam samting we yumi save tokbaot long famle wosip?

¹⁵ Yumi wantem givhan long famle blong yumi blong oli kam gud moa long wok blong prij. Blong mekem olsem, plante brata mo sista oli yusum sam taem long famle wosip, blong oli rerem wok blong prij. Maet famle i save tokbaot ol visit we bambae oli mekem. Olsem, ?Bambae oli tokbaot wanem taem oli gobak bakegen? ?Wanem i save pulum intres blong ol visit ya, blong oli wantem storian bakegen nekis taem? ?Wetaem i stret blong oli gobak? Mo tu, plante famle oli rerem miting long taem blong famle wosip. ?Olsem wanem? ?Famle blong yu tu i save mekem olsem? Sipos yu givim ansa long miting, bambae bilif blong yu i kam strong moa, nao bambae yu no go krangke. (Sam 35:18) Yes, sipos yumi yusumgud taem blong famle wosip, bambae yumi no traem talemaot prapa tingting blong yumi long ol samting we Baebol i no eksplenem, mo tu, tingting blong yumi bambae i no hafhaf.

16. ?Wanem i mekem se ol tabu Kristin oli strong blong blokem ol samting we i save mekem olgeta oli go krangke?

¹⁶ Long ol yia we oli pas, Jehova i givhan long ol man blong hem blong oli kasem save long ol profet tok blong Baebol. Taem yumi tingting dip long ol tok ya, yumi kasem save se i gat wan nambawan blesing i stap long fored blong yumi. Ol tabu Kristin oli gat janis blong bambae oli laef wetem Jisas Kraes long heven. !Promes ya i mekem se oli strong oltaem blong blokem ol samting we i save mekem olgeta oli go krangke! Ol tok we Pol i raetem i go long ol Kristin long Tesalonaeka i stret long olgeta, se: “Oltaem mifala i stap harem se mifala i mas talem tangkiu long God from yufala. . . . God i jusumaot yufala . . . long paoa blong Spirit blong hem, we i mekem yufala i tabu, yufala i man blong hem, mo i sevem yufala from we yufala i bilif long ol trutok.”​—2 Tes. 2:⁠13.

17. ?Wanem gudfala toktok long 2 Tesalonaeka 3:​1-5 we i leftemap tingting blong yu?

¹⁷ Olgeta we oli putum tingting blong olgeta i stap strong long laef blong olwe long wol ya, oli mas mekem i sem mak olsem ol tabu Kristin. Oli mas wok had blong blokem ol giaman tingting we oli save lidim olgeta oli go krangke. I gud yu folem ol gudfala toktok we Pol i raetem long ol tabu Kristin blong leftemap tingting blong olgeta. (Ridim 2 Tesalonaeka 3:​1-5.) Yumi evriwan i mas holemtaet ol gudfala tok ya long hat blong yumi. Long tufala leta we Pol i raetem long ol Kristin long Tesalonaeka, hem i givim woning se oli no mas traem talem mining blong samting we Baebol i no eksplenem, folem prapa tingting blong olgeta. Mo oli no mas bilif long ol tok we maet i no tru. Yumi stap klosap nomo long en blong rabis wol ya, taswe yumi tu, yumi glad tumas blong kasem ol woning ya.