Delfin we yumi tokbaot finis, i luk se ol wari blong hem oli stap mekem hem i dring tumas. Baebol i no agensem man we i dring smol, be i talem se: “I nogud yu go joen wetem ol man we oli stap dring tumas.” (Ol Proveb 23:20) Taem man i dring bitim mak, hem i save kasem bigfala sik, mared blong hem i save brok, mo evri yia plante milian man oli ded from ol trabol we i kamaot long dring. Sipos ol man oli folem ol waes advaes blong Baebol, oli save blokem ol trabol ya.

Delfin i mekem olsem. Hem i talem se: “Mi luksave se dring i no tekemaot ol wari blong mi. Ale, mi folem advaes long Filipae 4:6, 7, we i talem se: ‘Yufala i no mas letem tingting blong yufala i trabol from eni samting, be yufala i mas askem olgeta samting we yufala i wantem long God.’ Evri naet, taem mi tingting tumas mo mi wari, mi prea long Jehova. Mi talemaot klia ol filing blong mi, olsem kros, harem nogud, mo tingting we i foldaon, mo mi plis long hem blong mi save faenem wan rod blong harem gud. Long moning, mi traehad blong gohed blong holem gudfala tingting. Sipos mi prea oltaem, mi mi naf blong putum tingting blong mi long ol samting we mi gat, be i no long ol samting we mi no gat. Mi mekem desisen blong no dring bakegen, from we mi no wantem lusum pis we mi kasem long tingting blong mi.”

Wan bigfala trabol we i mekem man i harem nogud tumas, hemia ol doti fasin blong seks. Be ol advaes blong Baebol i save blokem trabol ya, from we i go stret long stamba blong hem, hemia fasin blong lukluk ol rabis pija mo pleplei wetem filing blong narafala. Yangfala Samuel i talem se: “I isi nomo blong pleplei wetem filing blong ol gel. Samtaem mi luksave se wan gel i laekem mi, mo nating se mi no laekem hem, be mi harem gud blong pleplei wetem filing blong hem.” Plante taem Samuel i no minim blong pleplei wetem filing blong ol gel, be ol narafala oli tok long hem se hem i stap mekem olsem. Ale, hem i gohed, we i minim nomo blong mekem. Be tingting blong hem i stap stikim hem. Naoia hem i talem se: “Fasin ya i nogud, from we i mekem man i tingbaot hem wan nomo.”

Samuel i ridim wan haf blong ol yangfala long Websaet ya jw.org. Mo tu, hem i tingbaot ol tok blong Ol Proveb 20:11, se: ‘Nating we smol pikinini nomo, be ol samting we hem i mekem i stap soemaot se hem i no save giaman, mo fasin blong hem i stret.’ ?Olsem wanem vas ya i givhan long Samuel? Hem i kasem save se i no stret blong pleplei wetem filing blong ol gel, mo i wan giaman fasin. Naoia hem i talem se: “Mi lanem tu se i had blong yangfala we i pleplei wetem filing blong ol gel i kam wan gudfala hasban. Mi tingbaot sipos mi mared, nao woman blong mi i luk we mi stap pleplei wetem filing blong narafala woman. Bambae hem i harem nogud tumas. Long taem ya, mi luksave se fasin ya i save mekem plante trabol i kamaot. Nating se i isi blong mekem, be hemia i no min se i stret.” Samuel i lego fasin ya, nao samting ya i givhan long hem blong i blokem ol doti fasin blong seks.

Antonio i go moa, i stap lukluk ol doti pija. Hem i mared, mo i lavem tumas woman blong hem, be hem i stap foldaon oltaem long fasin ya blong lukluk ol doti pija. Hem i talem se ol tok blong 1 Pita 5:8 i givhan long hem, i se: “!Tingting blong yufala i mas klia gud oltaem mo yufala i mas rere! Enemi blong yufala, Setan, i stap goraon long yufala olsem wan laeon we i stap singaot bigwan, i stap lukaot man blong i kakae.” Antonio i talem se: “Ol doti pija oli stap raonabaot long yumi oltaem, mo oli save fasgud long tingting blong yumi. Be vas ya i mekem mi mi tingbaot se rabis enjel ya Setan i stamba blong ol pija ya. Mi save se Jehova nomo i save givhan long mi, blong mi gat ‘tingting we i klia gud mo i rere’ oltaem, blong blokem ol samting we i save spolem tingting, hat, mo mared blong mi.” Antonio i kasem help we hem i nidim, nao i lego rabis fasin ya. Hemia i blokem plante bigfala trabol.

I klia se advaes blong Baebol i save blokem bigfala trabol. ?Be olsem wanem sipos trabol i stap longtaem finis mo i stap gohed nomo? Bambae yumi luk olsem wanem Baebol i save stretem ol had samting olsem.