Taem yumi kasem save fasin blong wan man, yumi save gud hem, mo yumi fren gud wetem hem. Sem mak taem yumi kasem save fasin blong Jehova, yumi save gud hem mo yumi save fren gud wetem hem. Jehova i gat plante gudfala fasin, be fo stamba fasin blong hem hemia: paoa, waes, stret fasin, mo lav.

“Hae God [Jehova]. Yu yu Masta blong mifala. Long bigfala paoa long yu, yu yu mekem wol ya, wetem skae.”—JEREMAEA 32:17.

Yumi luksave paoa blong God long ol samting we hem i wokem. Traem tingbaot: Taem yu stanap afsaed long wan dei we i gat gudfala san, hot blong san i mekem yu yu harem gud. Hemia samting we paoa blong Jehova i mekem. ?San i hot olsem wanem? Ol saentis oli talem se insaed long medel blong san i hot olsem 15 milian digri selsius. Paoa we i kamaot long san evri seken, i sem mak olsem we plante handred milian bigfala bom oli bosta.

Be san i smol nomo taem yumi skelem wetem plante milian narafala sta long skae. Ol saentis oli talem se i gat wan sta, nem blong hem UY Scuti, we i 1,700 taem moa bigwan bitim san. Sipos UY Scuti i stap long ples blong san, bambae i kavremap wol blong yumi mo i go kasem planet ya Jupiter. Maet hemia i givhan long yu blong yu kasem save moa long tok blong Jeremaea se, Jehova God i yusum bigfala paoa blong hem blong mekem skae mo wol.

 ?Paoa blong God i givhan long yumi olsem wanem? Blong stap laef, yumi nidim san mo ol narafala samting we God i wokem. Mo tu, God i yusum paoa blong hem blong mekem i gud long yumi wanwan. Traem tingbaot: Long taem bifo, God i givim paoa long Jisas blong i mekem ol merikel. Baebol i talem se: “Ol blaenman, naoia oli save lukluk, olgeta we leg blong olgeta i nogud, oli save wokbaot, olgeta we oli gat leprosi, oli kam klin bakegen, olgeta we sora blong olgeta i fas, oli harem samting, ol dedman oli laef bakegen.” (Matiu 11:5) ?Olsem wanem tede? Baebol i talem se: “Olgeta we oli taed, hem i stap givim paoa long olgeta,” mo i gohed se: ‘Olgeta we oli stap luk long Hae God blong hem i givhan long olgeta, bambae hem i givim paoa long olgeta.’ (Aesea 40:29, 31) God i save givim ‘paoa we i bigwan bitim mak,’ blong yumi naf blong stanap strong taem laef i had. (2 Korin 4:7) ?Olsem wanem? ?Yu yu harem se yu wantem kam fren blong God ya we i lavem yumi, mo i yusum bigfala paoa blong hem blong givhan long yumi?

“Hae God [Jehova]. Yu yu mekem plante naranarafala samting, mo olgeta evriwan oli stap soemaot we fasin blong yu blong wokem olgeta i waes we i waes.” —OL SAM 104:24.

Taem yumi gohed blong lanem moa long saed blong ol samting we God i wokem, yumi sapraes long waes blong hem. I gat sam saentis we oli stadi long ol samting we Jehova i wokem, mo oli traem kopi olgeta taem oli wokem ol smosmol samting olsem sipa long klos, go kasem ol bigfala samting olsem ol plen.

Nambawan eksampol blong waes blong God, hemia bodi blong yumi. Traem tingbaot olsem wanem wan bebi i stap gru insaed long mama blong hem. Hem i stat long wan smol sel we insaed long hem i gat olgeta save long saed blong bebi ya. Sel ya i seraot gogo i kam plante sel we evriwan oli sem mak. Be long stret taem, ol sel ya oli kam ol defdefren samting, olsem blad, ol nev, mo ol bun. I no longtaem ol haf insaed long bodi oli gru mo oli stat blong wok. Long naen manis, wan sel i kam wan ful bebi we i gat plante milian sel long bodi blong hem. Bigfala waes we God i soemaot taem hem i wokem bodi blong yumi, i mekem plante man oli agri wetem ol tok ya blong Baebol, se: “Yu yu mekem mi long fasin we i narafala, mo i nambawan olgeta. Mi mi ona long yu, mo mi presem nem blong yu from.”—Ol Sam 139:14.

?Waes blong God i givhan long yumi olsem wanem? God we i wokem yumi, i save samting we yumi nidim blong mekem yumi glad. From we hem i gat bigfala waes mo i kasem save gud long yumi, hem i givim ol waes advaes long Baebol, olsem hemia: “Yufala i mas glad blong fofogivim yufala.” (Kolosi 3:13) ?Olsem wanem? ?Advaes ya i waes? Yes. Ol dokta oli faenemaot se man we i glad blong fogivim narafala, hem i slip gud, i no gat hae blad presa, tingting i no foldaon, mo i no kasem plante narafala sik. God i olsem wan fren we i waes, i tingbaot yumi, mo i gohed blong givim ol waes advaes we i givhan long yumi. (2 Timoti 3:16, 17) ?Yu yu wantem gat wan fren olsem?

“Hae God i laekem ol fasin we i stret.”—OL SAM 37:28.

Oltaem God i mekem samting we i stret. Baebol i askem se: “?Yufala i ting se [God] i save mekem  samting we i no stret?” Nogat. (Job 34:10) Jehova i jajem man long stret fasin. Man blong raetem Sam i talem long Jehova se: “Yu yu stap jajem [ol man] long stret fasin.” (Ol Sam 67:4) Man we i gat tu fes i no save trikim Jehova. Hem i “stap lukluk long tingting blong [man],” taswe hem i luksave taem man i giaman mo i jajem hem long stret fasin. (1 Samuel 16:7) Mo tu, God i luk ol kruked fasin, taswe Baebol i promes se i no longtaem, “ol man nogud . . . bambae God i tekemaot olgeta.”—Ol Proveb 2:22.

Be God i no wan rabis jaj we i wantem tumas blong panisim man. Hem i soemaot sore taem hem i luk se i stret. Baebol i se: “Hae God, hem i gat sore, mo oltaem hem i glad tumas blong mekem i gud long man,” mo hem i mekem olsem long ol rabis man tu we oli tanem tingting. ?Olsem wanem? ?Hemia stret fasin?—Ol Sam 103:8; 2 Pita 3:9.

?Stret fasin blong God i givhan long yumi olsem wanem? Aposol Pita i talem se: “God i stap mekem i sem mak nomo long olgeta man. Sipos wan man i fraet gud long God mo i mekem samting we i stret, God i glad long hem nating se hem i blong defren neson.” (Ol Wok 10:34, 35) From we God i gat stret fasin, hem i no save mekem i gud moa long sam man i bitim ol narawan. Hem i save glad long yumi mo yumi save wosipim hem, nating se yumi kamaot long wanem laen o kantri, yumi no skul gud o yumi no gat haenem.

God i wantem se yumi kasem save stret fasin blong hem, mo stret fasin ya i givhan long yumi. Taswe hem i mekem yumi wetem wan tingting we i save stikim yumi. Baebol i talem se i olsem we hem i ‘raetem loa blong hem long hat blong yumi,’ we i ‘talem long yumi se yumi mekem i stret no yumi mekem i no stret.’ (Rom 2:15) ?Olsem wanem samting ya i givhan long yumi? Sipos yumi trenem gud tingting blong yumi, bambae i blokem yumi, blong yumi no mekem samting we i no stret o i spolem narafala. Mo sipos yumi mestem, yumi harem nogud long tingting blong yumi, hemia i save pulum yumi blong wantem stretem mastik blong yumi. !Tru ya, taem yumi kasem save long stret fasin blong God, yumi wantem kam klosap moa long hem!

“God hem i lav.”—1 JON 4:8.

Baebol i talem se God hem i lav, be i no talem se hem i paoa, waes, o stret fasin. ?From wanem? From we paoa i mekem se God i naf blong tekem aksen, stret fasin mo waes i lidim hem long ol aksen blong hem, be lav i pulum hem blong i wantem tekem aksen. Lav nao i pulum hem blong mekem evri samting.

Jehova i no nidim ol man, be lav nao i pulum hem blong i wokem ol man long heven mo long wol, blong oli save harem gud long lav mo kea blong hem. Hem i tingbaot ol man, taswe hem i wokem wol ya olsem wan gudfala ples blong olgeta. Mo hem i gohed blong soemaot lav taem “hem i mekem san blong hem i saen long ol rabis man mo ol gudfala man, mo hem i mekem ren i foldaon long ol stret man mo ol man we oli no stret.”—Matiu 5:45.

Baebol i se: “Jehova i lavem man tumas, mo i gat sore.” (Jemes 5:11) Hem i soemaot lav long olgeta we oli traehad blong save hem mo kam klosap long hem. Hem i lukluk laef blong ol man wanwan. Yes, ‘hem i stap tingbaot yu.’—1 Pita 5:7.

From we God i lavem man, ?hemia i givhan long yumi olsem wanem? Yumi laekem tumas blong wajem san i godaon. Yumi glad tumas blong harem wan bebi i laf. Yumi harem gud tumas long lav blong famle blong yumi. Yumi no nidim ol samting ya blong stap laef, be oli mekem laef blong yumi i gud moa.

Wan narafala samting we i soemaot lav blong God mo i givhan long yumi, hemia prea. Baebol i talem se: “Yufala i no mas letem tingting blong yufala i trabol from eni samting, be yufala i mas askem olgeta samting we yufala i wantem long God. Yufala i mas prea long hem, yufala i mas krae i go long hem blong hem i givhan long yufala, mo yufala i mas talem tangkiu long hem.” Olsem wan gudfala papa, Jehova i wantem se yumi lukluk i go long hem blong i halpem yumi wetem ol wari, we maet yumi no save talemaot long wan narafala man. From we Jehova i lavem yumi, hem i promes blong givim ‘pis we i bigwan tumas i bitim olgeta save blong yumi.’—Filipae 4:6, 7.

?Olsem wanem? ?Smol save ya long saed blong ol stamba fasin blong God, paoa, waes, stret fasin, mo lav, i givhan long yu blong kasem save long God? Blong kam klosap moa long God, i gud yu kasem save long ol samting we hem i mekem finis, mo ol samting we bambae hem i mekem long fiuja blong givhan long yu.