?Samtaem yu tingbaot se fiuja blong yu mo famle blong yu bambae i olsem wanem? ?Bambae yu kam rij o pua, bambae yu gat fren o yu stap yu wan? ?Laef blong yu bambae i longfala o i sot nomo? Plante taosen yia finis ol man oli stap lukaotem ansa blong ol kwestin ya.

Plante man oli stadi long ol niufala samting we oli kamaot, mo oli traem talemaot wanem bambae i kamaot long fiuja. Plante samting oli kamtru be plante nogat. Traem tingbaot, long 1912, Guglielmo Marconi we i wokem radio, i talem se: “Naoia we ol man oli stap yusum radio, bambae i no moa gat ol faet.” Wan man blong kampani ya Decca Record, we i agensem grup ya Beatles long 1962, i talem se i no longtaem bambae i no moa gat ol grup we oli plei gita.

Plante man oli go luk ol kleva blong traem faenemaot fiuja. Samfala oli askem advaes long ol man blong lukluk ol sta. Mo long plante magasin mo niuspepa i gat wan haf we i talemaot fiuja blong man folem dei we hem i bon. Sam narafala oli go luk ol man we oli makem ol saen, yusum ol kad o namba, mo lukluk ol mak long han.

Bifo, sam man oli go luk ol pris blong oli toktok long ol god blong olgeta blong faenemaot fiuja. King Kresus blong Lidia i givim ol sas presen long wan pris blong Delfi long Gris, blong faenemaot samting we bambae i hapen taem hem i mekem faet long King Sirus blong Pesia. Pris ya i talem se sipos Kresus i faet agensem Sirus, bambae hem i spolem “wan kantri we i rul long plante ples.” !Ale, Kresus i gat strong tingting se bambae hem i win, be taem hem i go faet, Sirus nao i spolem hem wetem ol ami blong hem!

Ol tok blong pris ya i no klia nating mo i no givhan long Kresus, from we tok ya i save kamtru long eni kantri we i winim faet ya. Kresus i kasem bigfala trabol from we hem i trastem giaman tok ya. ?Olsem wanem long olgeta tede we oli trastem ol man blong talemaot fiuja? ?Oli kasem gudfala samting from?